ਹਰ ਵਿਅਕਤੀ ਦਾ ਸੁਪਨਾ ਹੁੰਦਾ ਹੈ ਕਿ ਉਸਦਾ ਆਪਣਾ ਇੱਕ ਸ਼ਾਨਦਾਰ ਘਰ ਹੋਵੇ। ਪਰ ਸੋਚੋ ਜੇਕਰ ਕਿਸੇ ਨੇ ਕੋਈ ਘਰ ਖ੍ਰੀਦਿਆ ਹੋਵੇ ਪਰ ਉਹ ਰਹਿਣ ਦੇ ਯੋਗ ਹੀ ਨਾ ਹੋਵੇ ਤਾਂ ਉਸ ‘ਤੇ ਕੀ ਬੀਤੇਗੀ। ਅਜਿਹਾ ਹੀ ਇੱਕ ਮਾਮਲਾ ਵਾਇਕਾਟੋ ਤੋਂ ਸਾਹਮਣੇ ਆਇਆ ਹੈ। ਜਿੱਥੇ ਇੱਕ ਪਰਿਵਾਰ ਨੂੰ ਲਾਈਫਸਟਾਈਲ ਪ੍ਰਾਪਰਟੀ ਖਰੀਦਣ ਤੋਂ ਬਾਅਦ ਵੱਡੀ ਮੁਸੀਬਤ ਦਾ ਸਾਹਮਣਾ ਕਰਨਾ ਪਿਆ ਹੈ। ਦਰਅਸਲ ਪਰਿਵਾਰ ਨੇ ਜੋ ਘਰ ਖ੍ਰੀਦਿਆ ਹੈ ਉਹ ਨਾ ਤਾਂ ਰਹਿਣਯੋਗ ਹੈ ਨਾ ਹੀ ਘਰ ਦਾ ਬੀਮਾ ਮਿਲ ਰਿਹਾ ਹੈ ਅਤੇ ਸਭ ਤੋਂ ਹੈਰਾਨੀਜਨਕ ਗੱਲ ਹੈ ਕਿ ਵਾਇਕਾਟੋ ਡਿਸਟ੍ਰਿਕਟ ਕੌਂਸਲ ਵੱਲੋਂ ਇਸਨੂੰ ਢਾਉਣ ਦੇ ਹੁਕਮ ਜਾਰੀ ਹੋਏ ਹਨ।
ਇੱਕ ਰਿਪੋਰਟ ਮੁਤਾਬਿਕ 2022 ਦੀ ਵਿਕਰੀ ਵਿੱਚ ਸ਼ਾਮਿਲ ਰੀਅਲ ਅਸਟੇਟ ਪੇਸ਼ੇਵਰਾਂ ਨੂੰ “ਅਸੰਤੋਸ਼ਜਨਕ ਆਚਰਣ” ਵਿੱਚ ਸ਼ਾਮਲ ਪਾਇਆ ਗਿਆ ਹੈ। ਖਾਸ ਤੌਰ ‘ਤੇ ਛੱਤ ਦੀ ਸਥਿਤੀ ਬਾਰੇ ਜਾਣਕਾਰੀ ਨਾ ਦੇਣ ਅਤੇ ਐਸਬੈਸਟਸ ਦੀ ਸੰਭਾਵਿਤ ਮੌਜੂਦਗੀ ਅਤੇ ਡਰਾਈਵਵੇਅ ਬਾਰੇ ਗੁੰਮਰਾਹਕੁੰਨ ਜਾਣਕਾਰੀ ਦੇਣ ਦੇ ਮਾਮਲੇ ‘ਚ। ਇੱਕ ਸਥਾਨਕ ਰਿਪੋਰਟ ਦੇ ਅਨੁਸਾਰ ਜਾਰੀ ਕੀਤੇ ਇਸ਼ਤਿਹਾਰ ‘ਚ ਇਹ ਦੱਸਿਆ ਗਿਆ ਕਿ ਸ਼ੈਡਾਂ ਲਈ ਸ਼ੇਅਰਡ ਡਰਾਈਵਵੇਅ ਹੈ, ਪਰ ਅਸਲ ਵਿੱਚ ਉਹ ਗੁਆਂਢੀਆਂ ਦੀ ਸੀ। ਖਰੀਦਦਾਰਾਂ ਨੇ ਦੱਸਿਆ ਕਿ ਪੈਸਾ ਖਰਚ ਕੇ ਵੀ ਉਨ੍ਹਾਂ ਨੂੰ ਜਾਇਦਾਦ ਲਈ ਅਧਿਕਾਰ ਨਹੀਂ ਮਿਲਿਆ। ਰੀਅਲ ਐਸਟੇਟ ਅਥਾਰਟੀ ਨੇ ਜਾਂਚ ਮਗਰੋਂ ਹੁਣ ਤਿੰਨ ਲੋਕਾਂ ਨੂੰ ਦੋਸ਼ੀ ਮੰਨਿਆ ਹੈ। ਜਿਨ੍ਹਾਂ ‘ਚ ਸਟਿਵਨ ਮੈਥਿਸ ਨੂੰ $10,000 ਜੁਰਮਾਨਾ ਅਤੇ , ਉਸਦੇ ਪੁੱਤਰ ਸਕਾਟ ਮੈਥਿਸ ਨੂੰ $3000 ਜੁਰਮਾਨਾ, ਜਦਕਿ ਸੁਪਰਵਾਈਜ਼ਰ ਪੀਟ ਲਿਿਸ਼ੰਗਟਨ ਨੂੰ $8000 ਜੁਰਮਾਨਾ ਕੀਤਾ ਗਿਆ। ਕੁੱਲ ਮਿਲਾ ਕੇ $21,000 ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਮਾਮਲਾ ਹੁਣ ਰੀਅਲ ਐਸਟੇਟ ਏਜੰਟਸ ਡਿਸਪਲਿਨਰੀ ਟ੍ਰਾਈਬਿਊਨਲ ਨੂੰ ਭੇਜਿਆ ਗਿਆ ਹੈ, ਜਿੱਥੇ ਖਰੀਦਦਾਰਾਂ ਲਈ ਮੁਆਵਜ਼ੇ ‘ਤੇ ਵਿਚਾਰ ਕੀਤਾ ਜਾਵੇਗਾ।