ਨਿਊਜ਼ੀਲੈਂਡ ‘ਚ ਅੱਜ ਅਚਾਨਕ ਤਕਨੀਕੀ ਖਰਾਬੀ ਕਾਰਨ ਦੋ ਵੱਡੇ ਬੈਂਕਾਂ Westpac ਅਤੇ Kiwibank ਦੀਆਂ ਆਨਲਾਈਨ ਬੈਂਕਿੰਗ ਸੇਵਾਵਾਂ ਪ੍ਰਭਾਵਿਤ ਰਹੀਆਂ, ਜਿਸ ਨਾਲ ਗਾਹਕਾਂ ਨੂੰ ਕਾਫ਼ੀ ਮੁਸ਼ਕਲਾਂ ਦਾ ਸਾਹਮਣਾ ਕਰਨਾ ਪਿਆ। ਦੁਪਹਿਰ ਦੇ ਸਮੇਂ ਬੈਂਕਿੰਗ ਐਪਸ ਅਤੇ ਇੰਟਰਨੈੱਟ ਸੇਵਾਵਾਂ ਬੰਦ ਹੋਣ ਕਾਰਨ ਲੋਕ ਆਪਣੇ ਖਾਤਿਆਂ ਦਾ ਬੈਲੇਂਸ ਨਹੀਂ ਦੇਖ ਸਕੇ ਅਤੇ ਨਾ ਹੀ ਬਿੱਲਾਂ ਦਾ ਭੁਗਤਾਨ ਕਰ ਸਕੇ।
ਮਾਨੀਟਰਿੰਗ ਪਲੇਟਫਾਰਮ Downdetector ਮੁਤਾਬਿਕ, ਕਰੀਬ 2:20 ਵਜੇ ਤੱਕ ਸੈਂਕੜਿਆਂ ਗਾਹਕਾਂ ਨੇ ਵੈਸਟਪੈਕ ਦੀ ਐਪ ਸਬੰਧੀ ਸ਼ਿਕਾਇਤਾਂ ਦਰਜ ਕਰਵਾਈਆਂ। ਇਸ ਤੋਂ ਬਾਅਦ ਬੈਂਕ ਨੇ ਪੁਸ਼ਟੀ ਕੀਤੀ ਕਿ Westpac One ਸੇਵਾ ਵਿੱਚ ਤਕਨੀਕੀ ਦਿੱਕਤ ਆ ਰਹੀ ਹੈ ਅਤੇ ਮਾਹਿਰ ਟੀਮ ਇਸਨੂੰ ਠੀਕ ਕਰਨ ਵਿੱਚ ਜੁਟੀ ਹੋਈ ਹੈ। ਇਸੇ ਦੌਰਾਨ Kiwibank ਦੇ ਗਾਹਕਾਂ ਨੂੰ ਵੀ ਮਿਲਦੀਆਂ ਜੁਲਦੀਆਂ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪਿਆ। ਹਾਲਾਂਕਿ ਬੈਂਕ ਨੇ ਸਪੱਸ਼ਟ ਕੀਤਾ ਕਿ ਕਾਰਡ ਅਤੇ ਏਟੀਐਮ ਸੇਵਾਵਾਂ ਸਧਾਰਨ ਤੌਰ ’ਤੇ ਚੱਲਦੀਆਂ ਰਹੀਆਂ।
ਬਾਅਦ ਵਿੱਚ ਕੀਵੀਬੈਂਕ ਵੱਲੋਂ ਜਾਣਕਾਰੀ ਦਿੱਤੀ ਗਈ ਕਿ ਇੰਟਰਨੈੱਟ ਬੈਂਕਿੰਗ ਸੇਵਾਵਾਂ ਮੁੜ ਚਾਲੂ ਹੋ ਗਈਆਂ ਹਨ ਅਤੇ ਮੋਬਾਈਲ ਐਪ ਵੀ ਹੌਲੀ-ਹੌਲੀ ਸਹੀ ਤਰੀਕੇ ਨਾਲ ਕੰਮ ਕਰਨ ਲੱਗੀ ਹੈ। ਸੇਵਾਵਾਂ ਵਿੱਚ ਆਈ ਰੁਕਾਵਟ ਕਾਰਨ ਨਾਰਾਜ਼ ਗਾਹਕਾਂ ਨੇ ਸੋਸ਼ਲ ਮੀਡੀਆ ’ਤੇ ਆਪਣੀ ਨਾਰਾਜ਼ਗੀ ਜਤਾਈ। ਕੁਝ ਲੋਕਾਂ ਨੇ ਦੱਸਿਆ ਕਿ ਉਹ ਜ਼ਰੂਰੀ ਬਿੱਲ ਨਹੀਂ ਭਰ ਸਕੇ, ਜਦਕਿ ਹੋਰਾਂ ਨੇ ਕਿਹਾ ਕਿ ਪੈਸੇ ਟ੍ਰਾਂਸਫਰ ਨਾ ਹੋਣ ਕਾਰਨ ਕਿਰਾਏ ਵਰਗੀਆਂ ਭੁਗਤਾਨੀਆਂ ਵੀ ਰੁਕ ਗਈਆਂ। ਬੈਂਕਾਂ ਵੱਲੋਂ ਗਾਹਕਾਂ ਨੂੰ ਭਰੋਸਾ ਦਿੱਤਾ ਗਿਆ ਹੈ ਕਿ ਤਕਨੀਕੀ ਸਮੱਸਿਆ ਨੂੰ ਜਲਦੀ ਹੀ ਪੂਰੀ ਤਰ੍ਹਾਂ ਦੂਰ ਕਰ ਦਿੱਤਾ ਜਾਵੇਗਾ ਅਤੇ ਸੇਵਾਵਾਂ ਨਾਰਮਲ ਹੋ ਜਾਣਗੀਆਂ।