ਨਿਊਜ਼ੀਲੈਂਡ ਦੀ ਸੁਪਰਮਾਰਕੀਟ ਚੇਨ Woolworths New Zealand ਨੂੰ ਸਾਊਥ ਡੁਨੇਡਿਨ ਸਟੋਰ ਵਿੱਚ ਚੂਹਿਆਂ ਦੀ ਭਾਰੀ ਸਮੱਸਿਆ ਨੂੰ ਠੀਕ ਤਰੀਕੇ ਨਾਲ ਹੱਲ ਨਾ ਕਰਨ ਕਾਰਨ 33,000 ਡਾਲਰ ਜੁਰਮਾਨਾ ਭਰਨਾ ਪਿਆ ਹੈ। South Dunedin ਵਿੱਚ ਸਥਿਤ ਇਸ ਸਟੋਰ ਨੂੰ ਫਰਵਰੀ 2024 ਵਿੱਚ ਲਗਭਗ ਤਿੰਨ ਹਫ਼ਤਿਆਂ ਲਈ ਬੰਦ ਕਰਨਾ ਪਿਆ ਸੀ, ਜਿੱਥੇ 20 ਤੋਂ ਵੱਧ ਚੂਹੇ ਫੜੇ ਗਏ ਸਨ ਅਤੇ ਦੀਵਾਰਾਂ ਵਿੱਚ ਪੁਰਾਣੇ nests ਵੀ ਮਿਲੇ ਸੀ। ਕੰਪਨੀ ਨੇ ਪਿਛਲੇ ਸਾਲ ਦਸੰਬਰ ਵਿੱਚ Food Act ਦੀ ਉਲੰਘਣਾ ਮੰਨ ਲਈ ਸੀ, ਜਿਸ ਤੋਂ ਬਾਅਦ Ministry for Primary Industries ਵੱਲੋਂ ਲੰਬੀ ਜਾਂਚ ਕੀਤੀ ਗਈ।
ਸ਼ੁੱਕਰਵਾਰ ਨੂੰ Dunedin District Court ਵਿੱਚ ਜੱਜ David Robinson ਨੇ ਇਹ ਜੁਰਮਾਨਾ ਲਗਾਇਆ। ਜੱਜ ਨੇ ਕਿਹਾ ਕਿ ਕੰਪਨੀ ਦੀ ਲਾਪਰਵਾਹੀ ਕਾਰਨ ਲਗਭਗ ਚਾਰ ਮਹੀਨੇ ਤੱਕ ਗਾਹਕਾਂ ਅਤੇ ਕਰਮਚਾਰੀਆਂ ਦੀ ਸਿਹਤ ਖ਼ਤਰੇ ਵਿੱਚ ਪੈ ਸਕਦੀ ਸੀ। ਅਦਾਲਤ ਵਿੱਚ ਦੱਸਿਆ ਗਿਆ ਕਿ ਸਟਾਫ਼ ਨੇ ਇਸ ਸਮੱਸਿਆ ਨੂੰ ਫੂਡ ਸੇਫਟੀ ਮਾਮਲੇ ਦੀ ਬਜਾਏ ਸਿਰਫ਼ ਮੁਰੰਮਤ ਦਾ ਮਸਲਾ ਸਮਝਿਆ ਅਤੇ ਇਸਨੂੰ ਸਮੇਂ ‘ਤੇ ਉੱਚ ਅਧਿਕਾਰੀਆਂ ਤੱਕ ਨਹੀਂ ਪਹੁੰਚਾਇਆ। ਇਹ ਮਾਮਲਾ ਉਸ ਵੇਲੇ ਗੰਭੀਰ ਬਣਿਆ ਜਦੋਂ ਇੱਕ ਚੂਹੇ ਨੇ ਫੋਰਕਲਿਫਟ ਦੀਆਂ ਤਾਰਾਂ ਨੂੰ ਨੁਕਸਾਨ ਪਹੁੰਚਾਇਆ।
ਕੰਪਨੀ ਦੇ ਰਿਕਾਰਡ ਅਨੁਸਾਰ ਅਕਤੂਬਰ ਤੋਂ ਦਸੰਬਰ ਦਰਮਿਆਨ 110 ਤੋਂ ਵੱਧ ਵਾਰ ਚੂਹਿਆਂ ਨੂੰ ਦੇਖਿਆ ਗਿਆ ਸੀ ਅਤੇ ਕੁਝ ਚੂਹੇ ਫੜੇ ਵੀ ਗਏ ਸਨ। ਕੰਪਨੀ ਦੇ ਵਕੀਲ Joe Edwards ਨੇ ਮੰਨਿਆ ਕਿ ਸਮੱਸਿਆ ਨੂੰ ਜਲਦੀ ਨਾ ਸੁਲਝਾਉਣਾ ਗਲਤੀ ਸੀ ਅਤੇ ਕੰਪਨੀ ਨੇ ਇਸ ਲਈ ਮਾਫ਼ੀ ਵੀ ਮੰਗੀ ਹੈ। ਉਨ੍ਹਾਂ ਕਿਹਾ ਕਿ ਭਵਿੱਖ ਵਿੱਚ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਤੋਂ ਬਚਣ ਲਈ ਨਵੀਆਂ ਨੀਤੀਆਂ ਬਣਾਈਆਂ ਜਾ ਰਹੀਆਂ ਹਨ।
ਚੂਹਿਆਂ ਦੀ ਸਮੱਸਿਆ ਪਹਿਲਾਂ 2023 ਦੇ ਅੰਤ ਵਿੱਚ ਸਾਹਮਣੇ ਆਈ ਸੀ, ਜਦੋਂ ਇੱਕ ਤਸਵੀਰ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਈ ਜਿਸ ਵਿੱਚ ਚੂਹਾ ਬੇਕਨ ਉਤਪਾਦਾਂ ਕੋਲ ਬੈਠਾ ਦਿਖਾਈ ਦਿੱਤਾ। ਜਾਂਚ ਜਨਵਰੀ 2024 ਵਿੱਚ ਸ਼ੁਰੂ ਹੋਈ ਅਤੇ ਸਟੋਰ ਨੂੰ ਕਈ ਵਾਰ ਬੰਦ ਕਰਨਾ ਪਿਆ। ਆਖਿਰਕਾਰ 19 ਦਿਨਾਂ ਬਾਅਦ ਸਟੋਰ ਨੂੰ ਦੁਬਾਰਾ ਖੋਲ੍ਹਿਆ ਗਿਆ, ਜਦੋਂ 72 ਘੰਟਿਆਂ ਤੱਕ ਕੋਈ ਚੂਹਾ ਨਹੀਂ ਮਿਲਿਆ। ਹਾਲਾਂਕਿ ਦੁਬਾਰਾ ਖੁੱਲ੍ਹਣ ਤੋਂ ਬਾਅਦ ਵੀ ਗਾਹਕਾਂ ਦੀ ਪ੍ਰਤੀਕਿਰਿਆ ਮਿਲੀ-ਜੁਲੀ ਰਹੀ—ਕੁਝ ਲੋਕਾਂ ਨੇ ਸਟੋਰ ਤੋਂ ਦੂਰ ਰਹਿਣ ਦਾ ਫੈਸਲਾ ਕੀਤਾ, ਜਦਕਿ ਕੁਝ ਨੇ ਖਰੀਦਦਾਰੀ ਜਾਰੀ ਰੱਖੀ। ਸਰਕਾਰੀ ਖਾਦ ਸੁਰੱਖਿਆ ਏਜੰਸੀ ਨੇ ਕਿਹਾ ਕਿ ਕੰਪਨੀ ਹੁਣ ਪੈਸਟ ਕੰਟਰੋਲ ‘ਤੇ ਪੂਰਾ ਧਿਆਨ ਦੇ ਰਹੀ ਹੈ।