ਆਕਲੈਂਡ ‘ਚ ਜੂਨ ਮਹੀਨੇ ਦੌਰਾਨ ਬੱਸ ਸੇਵਾ ਦੀ ਵਰਤੋਂ ਨੇ ਨਵਾਂ ਰਿਕਾਰਡ ਕਾਇਮ ਕੀਤਾ ਹੈ। ਇਸ ਮਹੀਨੇ ਬੱਸਾਂ ਰਾਹੀਂ 63 ਲੱਖ (6.3 ਮਿਲੀਅਨ) ਯਾਤਰੀਆਂ ਨੇ ਸਫ਼ਰ ਕੀਤਾ, ਜੋ ਹੁਣ ਤੱਕ ਦਾ ਸਭ ਤੋਂ ਵੱਧ ਅੰਕੜਾ ਹੈ। ਕੋਵਿਡ-19 ਮਹਾਮਾਰੀ ਦੌਰਾਨ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਏ ਜਨਤਕ ਆਵਾਜਾਈ ਪ੍ਰਣਾਲੀ ਲਈ ਇਹ ਵੱਡੀ ਵਾਪਸੀ ਮੰਨੀ ਜਾ ਰਹੀ ਹੈ। ਆਕਲੈਂਡ ਟਰਾਂਸਪੋਰਟ (AT) ਮੁਤਾਬਿਕ, ਜੂਨ 2025 ਵਿੱਚ 55 ਲੱਖ ਯਾਤਰੀਆਂ ਨੇ ਬੱਸਾਂ ਦੀ ਵਰਤੋਂ ਕੀਤੀ ਸੀ, ਜਦਕਿ ਕੋਵਿਡ ਤੋਂ ਪਹਿਲਾਂ ਜੂਨ 2019 ਵਿੱਚ ਇਹ ਗਿਣਤੀ 61.9 ਲੱਖ ਸੀ। ਇਸ ਵਾਰ ਦਾ ਅੰਕੜਾ ਦੋਵਾਂ ਸਾਲਾਂ ਨਾਲੋਂ ਵੱਧ ਹੈ।
ਏਟੀ ਦੀ ਪਬਲਿਕ ਟਰਾਂਸਪੋਰਟ ਗਰੁੱਪ ਮੈਨੇਜਰ ਰੇਚਲ ਕਾਰਾ ਨੇ ਦੱਸਿਆ ਕਿ ਇਸ ਵਾਧੇ ਦਾ ਮੁੱਖ ਕਾਰਨ ਸਰਦੀਆਂ ਦੌਰਾਨ ਵਧੀਆ ਮੌਸਮ ਅਤੇ ਵਿਦਿਆਰਥੀਆਂ ਲਈ ਕਿਰਾਏ ਵਿੱਚ ਵੱਡੀ ਛੂਟ ਹੈ। ਉਨ੍ਹਾਂ ਕਿਹਾ ਕਿ ਸਰਦੀਆਂ ਵਿੱਚ ਚੰਗੇ ਮੌਸਮ ਕਾਰਨ ਲੋਕਾਂ ਨੇ ਬੱਸਾਂ ਦੀ ਵੱਧ ਵਰਤੋਂ ਕੀਤੀ। ਇਸ ਦੇ ਨਾਲ ਹੀ ਦਸੰਬਰ ਵਿੱਚ ਉੱਚ ਸਿੱਖਿਆ ਹਾਸਿਲ ਕਰ ਰਹੇ ਵਿਦਿਆਰਥੀਆਂ ਲਈ ਕਿਰਾਏ ਵਿੱਚ ਛੂਟ 20 ਫੀਸਦੀ ਤੋਂ ਵਧਾ ਕੇ 40 ਫੀਸਦੀ ਕਰ ਦਿੱਤੀ ਗਈ ਸੀ, ਜਿਸ ਨਾਲ ਵਿਦਿਆਰਥੀਆਂ ਦੀ ਯਾਤਰਾ ਵਿੱਚ ਵੱਡਾ ਵਾਧਾ ਹੋਇਆ।
ਜੂਨ ਮਹੀਨੇ ਵਿੱਚ ਵਿਦਿਆਰਥੀਆਂ ਦੀਆਂ ਬੱਸ ਯਾਤਰਾਵਾਂ ਪਿਛਲੇ ਸਾਲ ਦੇ ਮੁਕਾਬਲੇ 46.5 ਫੀਸਦੀ ਵਧੀਆਂ। ਦਸੰਬਰ ਤੋਂ ਹੁਣ ਤੱਕ 45 ਲੱਖ ਤੋਂ ਵੱਧ ਵਿਦਿਆਰਥੀ ਯਾਤਰਾਵਾਂ ਦਰਜ ਕੀਤੀਆਂ ਗਈਆਂ ਹਨ, ਜਿਸ ਨਾਲ 30 ਹਜ਼ਾਰ ਤੋਂ ਵੱਧ ਵਿਦਿਆਰਥੀਆਂ ਨੂੰ ਕਰੀਬ 4.6 ਮਿਲੀਅਨ ਡਾਲਰ ਦੀ ਬਚਤ ਹੋਈ ਹੈ। ਏਟੀ ਦੇ ਅਨੁਸਾਰ ਇਹ ਛੂਟ ਆਮ ਕਿਰਾਏ ਦੇ ਹਿਸਾਬ ਨਾਲ 9.1 ਮਿਲੀਅਨ ਡਾਲਰ ਦੇ ਬਰਾਬਰ ਹੈ। ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਯਾਤਰੀਆਂ ਦੀ ਵਧੀ ਗਿਣਤੀ ਕਾਰਨ ਦਿੱਤੀ ਜਾ ਰਹੀ ਵਾਧੂ ਛੂਟ ਦਾ ਖਰਚਾ ਵੀ ਕਾਫ਼ੀ ਹੱਦ ਤੱਕ ਪੂਰਾ ਹੋ ਗਿਆ ਹੈ।
ਏਟੀ ਨੇ ਦੱਸਿਆ ਕਿ ਹੁਣ ਸਿਰਫ਼ ਦਫ਼ਤਰੀ ਸਮੇਂ ਹੀ ਨਹੀਂ, ਸਗੋਂ ਵੀਕਐਂਡ ਅਤੇ ਹੋਰ ਸਮਿਆਂ ਵਿੱਚ ਵੀ ਲੋਕ ਵੱਡੀ ਗਿਣਤੀ ਵਿੱਚ ਜਨਤਕ ਆਵਾਜਾਈ ਦੀ ਵਰਤੋਂ ਕਰ ਰਹੇ ਹਨ।ਆਕਲੈਂਡ ਵਿੱਚ ਇਸ ਵੇਲੇ 45 ਫ੍ਰੀਕਵੈਂਟ ਬੱਸ ਰੂਟ ਚੱਲ ਰਹੇ ਹਨ, ਜਿੱਥੇ ਸਵੇਰੇ 7 ਵਜੇ ਤੋਂ ਸ਼ਾਮ 7 ਵਜੇ ਤੱਕ ਹਫ਼ਤੇ ਦੇ ਸੱਤੋਂ ਦਿਨ ਹਰ 15 ਮਿੰਟ ਬਾਅਦ ਬੱਸ ਸੇਵਾ ਉਪਲਬਧ ਹੈ। ਪਿਛਲੇ ਇੱਕ ਸਾਲ ਦੌਰਾਨ ਇਨ੍ਹਾਂ ਵਿੱਚ ਪੰਜ ਨਵੇਂ ਰੂਟ ਸ਼ਾਮਲ ਕੀਤੇ ਗਏ ਹਨ।
ਦੂਜੇ ਪਾਸੇ, ਰੇਲ ਸੇਵਾ ਹਾਲੇ ਵੀ ਕੋਵਿਡ ਤੋਂ ਪਹਿਲਾਂ ਵਾਲੇ ਪੱਧਰ ਤੱਕ ਨਹੀਂ ਪਹੁੰਚ ਸਕੀ। ਲੰਬੇ ਸਮੇਂ ਤੱਕ ਚੱਲੇ ਰੇਲ ਨੈੱਟਵਰਕ ਸੁਧਾਰ ਕਾਰਜਾਂ ਅਤੇ ਮੁਰੰਮਤ ਕਾਰਨ ਯਾਤਰੀਆਂ ਦੀ ਗਿਣਤੀ ਪ੍ਰਭਾਵਿਤ ਰਹੀ। ਹਾਲਾਂਕਿ ਅਧਿਕਾਰੀਆਂ ਨੂੰ ਉਮੀਦ ਹੈ ਕਿ ਜਲਦ ਸ਼ੁਰੂ ਹੋਣ ਵਾਲਾ ਸਿਟੀ ਰੇਲ ਲਿੰਕ (City Rail Link) ਪ੍ਰੋਜੈਕਟ ਰੇਲ ਯਾਤਰੀਆਂ ਦੀ ਗਿਣਤੀ ਵਿੱਚ ਵੱਡਾ ਵਾਧਾ ਲਿਆਵੇਗਾ।
ਇਸ ਦੌਰਾਨ, ਇਸ ਸ਼ਨੀਵਾਰ ਆਕਲੈਂਡ ਦੇ ਜਨਤਕ ਆਵਾਜਾਈ ਨੈੱਟਵਰਕ ਲਈ ਵੱਡੀ ਚੁਣੌਤੀ ਹੋਵੇਗੀ, ਕਿਉਂਕਿ ਇੱਕੋ ਸ਼ਾਮ ਤਿੰਨ ਵੱਡੇ ਸਮਾਗਮਾਂ ਵਿੱਚ 85 ਹਜ਼ਾਰ ਤੋਂ ਵੱਧ ਦਰਸ਼ਕਾਂ ਦੇ ਪਹੁੰਚਣ ਦੀ ਉਮੀਦ ਹੈ।