ਆਕਲੈਂਡ: ਆਕਲੈਂਡ ਦਾ ਸਭ ਤੋਂ ਵੱਡਾ ਗੰਦਾਪਾਣੀ (ਵੇਸਟਵਾਟਰ) ਬੁਨਿਆਦੀ ਢਾਂਚਾ ਪ੍ਰੋਜੈਕਟ ਸੈਂਟਰਲ ਇੰਟਰਸੈਪਟਰ ਹੁਣ ਪੂਰੀ ਤਰ੍ਹਾਂ ਚਾਲੂ ਹੋ ਗਿਆ ਹੈ। ਵਾਟਰਕੇਅਰ (Watercare) ਦਾ ਕਹਿਣਾ ਹੈ ਕਿ ਇਹ ਪ੍ਰੋਜੈਕਟ ਆਉਣ ਵਾਲਿਆਂ ਕਈ ਦਹਾਕਿਆਂ ਤੱਕ ਸ਼ਹਿਰ ਦੀਆਂ ਨਦੀਆਂ, ਨਾਲਿਆਂ ਅਤੇ ਸਮੁੰਦਰੀ ਤੱਟਾਂ ਵਿੱਚ ਗੰਦਾਪਾਣੀ ਦੇ ਓਵਰਫਲੋ ਨੂੰ ਵੱਡੇ ਪੱਧਰ ‘ਤੇ ਘਟਾਉਣ ਵਿੱਚ ਮਦਦ ਕਰੇਗਾ।
1.66 ਅਰਬ ਡਾਲਰ ਦੀ ਲਾਗਤ ਨਾਲ ਬਣੀ ਇਹ 16.2 ਕਿਲੋਮੀਟਰ ਲੰਬੀ ਟਨਲ ਹਰਨੇ ਬੇ ਦੇ ਪੌਇੰਟ ਐਰਿਨ ਤੋਂ ਮਾਂਗੇਰੇ ਵੇਸਟਵਾਟਰ ਟ੍ਰੀਟਮੈਂਟ ਪਲਾਂਟ ਤੱਕ ਜਾਂਦੀ ਹੈ। ਇਹ ਟਨਲ ਜ਼ਮੀਨ ਹੇਠਾਂ 15 ਤੋਂ 110 ਮੀਟਰ ਦੀ ਗਹਿਰਾਈ ਵਿੱਚ ਬਣਾਈ ਗਈ ਹੈ ਅਤੇ ਮਨੁਕਾਉ ਹਾਰਬਰ ਦੇ ਹੇਠੋਂ ਲੰਘਦੀ ਹੈ।
ਟਨਲ ਦਾ ਦੱਖਣੀ ਹਿੱਸਾ 2025 ਦੀ ਸ਼ੁਰੂਆਤ ਵਿੱਚ ਚਾਲੂ ਕੀਤਾ ਗਿਆ ਸੀ, ਜਿਸ ਨੇ ਇਸ ਸਾਲ 1 ਜੁਲਾਈ ਤੱਕ ਕਰੀਬ 7,41,000 ਘਣ ਮੀਟਰ ਗੰਦਾਪਾਣੀ ਅਤੇ ਤੂਫ਼ਾਨੀ ਪਾਣੀ ਨੂੰ ਵਾਤਾਵਰਣ ਵਿੱਚ ਵਹਿਣ ਤੋਂ ਰੋਕਿਆ। ਇਹ ਮਾਤਰਾ ਲਗਭਗ 300 ਓਲੰਪਿਕ ਆਕਾਰ ਦੇ ਤੈਰਨ ਵਾਲੇ ਪੂਲਾਂ ਦੇ ਬਰਾਬਰ ਹੈ। ਹੁਣ ਉੱਤਰੀ ਹਿੱਸਾ ਵੀ ਚਾਲੂ ਹੋਣ ਨਾਲ ਇਸ ਤੋਂ ਹੋਰ ਵੱਧ ਵਾਤਾਵਰਣਕ ਲਾਭ ਦੀ ਉਮੀਦ ਹੈ।
ਇਸ ਪ੍ਰੋਜੈਕਟ ਦਾ ਨਿਰਮਾਣ 2019 ਵਿੱਚ ਸ਼ੁਰੂ ਹੋਇਆ ਸੀ ਅਤੇ ਸੱਤ ਸਾਲਾਂ ਵਿੱਚ ਪੂਰਾ ਕੀਤਾ ਗਿਆ। ਕੋਵਿਡ-19 ਮਹਾਮਾਰੀ, ਖਰਾਬ ਮੌਸਮ ਅਤੇ ਮਹਿੰਗਾਈ ਵਰਗੀਆਂ ਚੁਣੌਤੀਆਂ ਦੇ ਬਾਵਜੂਦ ਇਹ ਪ੍ਰੋਜੈਕਟ ਤੈਅ ਸਮੇਂ ਅਤੇ ਲਗਭਗ ਮੂਲ ਬਜਟ ਅੰਦਰ ਹੀ ਮੁਕੰਮਲ ਕੀਤਾ ਗਿਆ।
ਵਾਟਰਕੇਅਰ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਜੇਮੀ ਸਿਨਕਲੇਅਰ ਨੇ ਇਸ ਨੂੰ ਆਕਲੈਂਡ ਲਈ ਇੱਕ ਇਤਿਹਾਸਕ ਅਤੇ ਬਦਲਾਅ ਲਿਆਉਣ ਵਾਲਾ ਪ੍ਰੋਜੈਕਟ ਕਰਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਇਹ ਟਨਲ ਨਾ ਸਿਰਫ਼ ਵਾਤਾਵਰਣ ਨੂੰ ਸੁਧਾਰੇਗੀ, ਸਗੋਂ ਭਵਿੱਖ ਵਿੱਚ ਸ਼ਹਿਰ ਦੇ ਵਿਕਾਸ ਲਈ ਵੀ ਮਜ਼ਬੂਤ ਬੁਨਿਆਦ ਸਾਬਿਤ ਹੋਵੇਗੀ। ਉਨ੍ਹਾਂ ਦੱਸਿਆ ਕਿ ਹਰਨੇ ਬੇ ਕਲੈਕਟਰ ਨਾਮਕ ਨਵਾਂ ਵੇਸਟਵਾਟਰ ਟਨਲ ਵੀ ਬਣਾਇਆ ਜਾ ਰਿਹਾ ਹੈ, ਜੋ ਸੈਂਟਰਲ ਇੰਟਰਸੈਪਟਰ ਨਾਲ ਜੁੜ ਕੇ ਬਰਸਾਤੀ ਮੌਸਮ ਦੌਰਾਨ ਹੋਣ ਵਾਲੇ ਓਵਰਫਲੋ ਨੂੰ ਹੋਰ ਘਟਾਏਗਾ।
ਆਕਲੈਂਡ ਦੇ ਮੇਅਰ ਵੇਨ ਬ੍ਰਾਊਨ ਨੇ ਕਿਹਾ ਕਿ ਇਸ ਪ੍ਰੋਜੈਕਟ ਨਾਲ ਸ਼ਹਿਰ ਦੇ ਹਾਰਬਰ, ਸਥਾਨਕ ਨਦੀਆਂ ਅਤੇ ਬੀਚਾਂ ਦਾ ਪਾਣੀ ਹੋਰ ਸਾਫ਼ ਹੋਵੇਗਾ। ਉਨ੍ਹਾਂ ਕਿਹਾ ਕਿ ਆਕਲੈਂਡ ਵਾਸੀ ਸਾਫ਼-ਸੁਥਰੇ ਜਲ ਮਾਰਗ ਅਤੇ ਸਮੁੰਦਰੀ ਵਾਤਾਵਰਣ ਦੀ ਉਮੀਦ ਕਰਦੇ ਹਨ ਅਤੇ ਇਹ ਪ੍ਰੋਜੈਕਟ ਉਸੇ ਦਿਸ਼ਾ ਵਿੱਚ ਇੱਕ ਮਹੱਤਵਪੂਰਨ ਕਦਮ ਹੈ।
ਜੇਮੀ ਸਿਨਕਲੇਅਰ ਨੇ ਪ੍ਰੋਜੈਕਟ ਨੂੰ ਸਫਲਤਾਪੂਰਵਕ ਪੂਰਾ ਕਰਨ ਵਾਲੀ ਟੀਮ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਇੰਨੇ ਵੱਡੇ ਪੱਧਰ ਦੇ ਪ੍ਰੋਜੈਕਟ ਦਾ ਸਮੇਂ ਅਤੇ ਬਜਟ ਅੰਦਰ ਮੁਕੰਮਲ ਹੋਣਾ ਬਹੁਤ ਵੱਡੀ ਉਪਲਬਧੀ ਹੈ। ਉਨ੍ਹਾਂ ਕਿਹਾ ਕਿ ਸਾਂਝੇ ਯਤਨਾਂ ਨਾਲ ਨਿਊਜ਼ੀਲੈਂਡ ਦੇ ਸਭ ਤੋਂ ਜਟਿਲ ਬੁਨਿਆਦੀ ਢਾਂਚਾ ਪ੍ਰੋਜੈਕਟਾਂ ਵਿੱਚੋਂ ਇੱਕ ਨੂੰ ਸੁਰੱਖਿਅਤ, ਪ੍ਰਭਾਵਸ਼ਾਲੀ ਅਤੇ ਵਾਤਾਵਰਣ-ਅਨੁਕੂਲ ਢੰਗ ਨਾਲ ਪੂਰਾ ਕੀਤਾ ਗਿਆ ਹੈ।