ਆਕਲੈਂਡ: ਨਿਊਜ਼ੀਲੈਂਡ ਵਿੱਚ ਇੱਕ ਮਹਿਲਾ ਦੀ ਕੈਂਸਰ ਦੀ ਗਲਤ ਪੈਥੋਲੋਜੀ ਰਿਪੋਰਟ ਨੇ ਉਸ ਦੀ ਜ਼ਿੰਦਗੀ ਨੂੰ ਪੂਰੀ ਤਰ੍ਹਾਂ ਬਦਲ ਕੇ ਰੱਖ ਦਿੱਤਾ। ਗਲਤ ਨਤੀਜਿਆਂ ਦੇ ਆਧਾਰ ‘ਤੇ ਉਸ ਨੂੰ ਕੀਮੋਥੈਰੇਪੀ, ਰੇਡੀਏਸ਼ਨ ਅਤੇ ਵੱਡੀ ਸਰਜਰੀ ਕਰਵਾਉਣੀ ਪਈ। ਬਾਅਦ ਵਿੱਚ ਸਾਹਮਣੇ ਆਇਆ ਕਿ ਮਹਿਲਾ ਨੂੰ ਅਸਲ ਵਿੱਚ ਕੈਂਸਰ ਸੀ ਹੀ ਨਹੀਂ। ਡਿਪਟੀ ਹੈਲਥ ਐਂਡ ਡਿਸਏਬਿਲਿਟੀ ਕਮਿਸ਼ਨਰ ਡਾ. ਵੈਨੈਸਾ ਕਾਲਡਵੈੱਲ ਵੱਲੋਂ ਜਾਰੀ ਰਿਪੋਰਟ ਵਿੱਚ Awanui Labs ਅਤੇ ਇੱਕ ਸੀਨੀਅਰ ਪੈਥੋਲੋਜਿਸਟ ਨੂੰ ਮਰੀਜ਼ ਨੂੰ ਲੋੜੀਂਦੀ ਸਾਵਧਾਨੀ ਅਤੇ ਪੇਸ਼ੇਵਰ ਮਿਆਰ ਅਨੁਸਾਰ ਸੇਵਾਵਾਂ ਨਾ ਦੇਣ ਲਈ ਜ਼ਿੰਮੇਵਾਰ ਠਹਿਰਾਇਆ ਗਿਆ ਹੈ।
ਰਿਪੋਰਟ ਮੁਤਾਬਿਕ ਅਕਤੂਬਰ 2023 ਵਿੱਚ ਕੀਤੀ ਗਈ ਬਾਇਓਪਸੀ ਤੋਂ ਬਾਅਦ ਮਹਿਲਾ ਨੂੰ ਦੱਸਿਆ ਗਿਆ ਕਿ ਉਸ ਨੂੰ ਅੰਨ ਨਲੀ ਦਾ ਐਡੀਨੋਕਾਰਸੀਨੋਮਾ ਹੈ। ਇਸ ਨਤੀਜੇ ਦੇ ਆਧਾਰ ‘ਤੇ ਤੁਰੰਤ ਕੀਮੋ-ਰੇਡੀਏਸ਼ਨ ਇਲਾਜ ਸ਼ੁਰੂ ਕਰ ਦਿੱਤਾ ਗਿਆ ਅਤੇ ਬਾਅਦ ਵਿੱਚ ਸਰਜਰੀ ਰਾਹੀਂ ਉਸ ਦੀ ਅੰਨ ਨਲੀ ਅਤੇ ਪੇਟ ਦਾ ਇੱਕ ਹਿੱਸਾ ਕੱਢ ਦਿੱਤਾ ਗਿਆ।
ਹੈਰਾਨੀਜਨਕ ਗੱਲ ਇਹ ਰਹੀ ਕਿ ਸਰਜਰੀ ਤੋਂ ਬਾਅਦ ਕੱਢੇ ਗਏ ਟਿਸ਼ੂ ਦੀ ਜਾਂਚ ਵਿੱਚ ਕੈਂਸਰ ਦਾ ਕੋਈ ਨਿਸ਼ਾਨ ਨਹੀਂ ਮਿਲਿਆ। ਇਸ ਤੋਂ ਬਾਅਦ ਜਦੋਂ ਪਹਿਲੀ ਬਾਇਓਪਸੀ ਦੀ ਮੁੜ ਸਮੀਖਿਆ ਕੀਤੀ ਗਈ ਤਾਂ ਸਪੱਸ਼ਟ ਹੋਇਆ ਕਿ ਸ਼ੁਰੂਆਤੀ ਰਿਪੋਰਟ ਗਲਤ ਸੀ ਅਤੇ ਮਹਿਲਾ ਨੂੰ ਕਦੇ ਵੀ ਕੈਂਸਰ ਨਹੀਂ ਸੀ।
ਡਾ. ਕਾਲਡਵੈੱਲ ਨੇ ਕਿਹਾ ਕਿ ਇਸ ਗਲਤੀ ਕਾਰਨ ਮਹਿਲਾ ਨੂੰ ਬੇਲੋੜਾ ਅਤੇ ਕਠਿਨ ਇਲਾਜ ਸਹਿਣਾ ਪਿਆ, ਜਿਸ ਨਾਲ ਉਸ ਨੂੰ ਸਰੀਰਕ ਅਤੇ ਮਾਨਸਿਕ ਤੌਰ ‘ਤੇ ਭਾਰੀ ਨੁਕਸਾਨ ਪਹੁੰਚਿਆ। ਇਸ ਦਾ ਅਸਰ ਅੱਜ ਵੀ ਉਸ ਅਤੇ ਉਸ ਦੇ ਪਰਿਵਾਰ ‘ਤੇ ਪੈ ਰਿਹਾ ਹੈ।
ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਪੈਥੋਲੋਜਿਸਟਾਂ ਨੇ ਪਹਿਲਾਂ ਤੋਂ ਬਣੀ ਕੈਂਸਰ ਦੀ ਧਾਰਨਾ ਦੇ ਪ੍ਰਭਾਵ ਹੇਠ ਨਤੀਜਾ ਕੱਢਿਆ, ਜਿਸ ਨੂੰ ਕਨਫਰਮੇਸ਼ਨ ਬਾਇਅਸ (Confirmation Bias) ਕਿਹਾ ਜਾਂਦਾ ਹੈ। ਇਸ ਦੇ ਨਾਲ ਹੀ ਮੈਡੀਕਲ ਟੀਮ ਵੱਲੋਂ ਜਲਦੀ ਰਿਪੋਰਟ ਦੀ ਮੰਗ ਕਾਰਨ ਸਮੇਂ ਦਾ ਦਬਾਅ ਵੀ ਬਣਿਆ, ਜਿਸ ਨੇ ਗਲਤੀ ਦੀ ਸੰਭਾਵਨਾ ਵਧਾ ਦਿੱਤੀ।
ਮਹਿਲਾ ਦੇ ਸੀਟੀ ਸਕੈਨ ਅਤੇ ਗੈਸਟ੍ਰੋਸਕੋਪੀ ਦੌਰਾਨ ਅੰਨ ਨਲੀ ਵਿੱਚ ਇੱਕ ਗੰਢ ਨਜ਼ਰ ਆਉਣ ਤੋਂ ਬਾਅਦ ਬਾਇਓਪਸੀ ਦਾ ਨਮੂਨਾ Awanui Labs ਭੇਜਿਆ ਗਿਆ ਸੀ। ਸ਼ੁਰੂਆਤੀ ਪੈਥੋਲੋਜਿਸਟ ਨੇ ਹੋਰ ਜਾਂਚਾਂ ਦੀ ਸਿਫ਼ਾਰਸ਼ ਕੀਤੀ ਸੀ, ਪਰ ਰਿਪੋਰਟ ਪੂਰੀ ਹੋਣ ਤੋਂ ਪਹਿਲਾਂ ਹੀ ਕੇਸ ਨੂੰ ਮਲਟੀਡਿਸ਼ਪਲਿਨਰੀ ਮੀਟਿੰਗ ਵਿੱਚ ਰੱਖਿਆ ਗਿਆ, ਜਿੱਥੇ ਸੀਨੀਅਰ ਪੈਥੋਲੋਜਿਸਟ ਨੇ ਕੈਂਸਰ ਦੀ ਪੁਸ਼ਟੀ ਕਰ ਦਿੱਤੀ।
ਬਾਅਦ ਵਿੱਚ ਸੀਨੀਅਰ ਪੈਥੋਲੋਜਿਸਟ ਨੇ ਖੁਦ ਮੰਨਿਆ ਕਿ ਉਸ ਨੂੰ ਜਲਦਬਾਜ਼ੀ ਵਿੱਚ ਫ਼ੈਸਲਾ ਨਹੀਂ ਕਰਨਾ ਚਾਹੀਦਾ ਸੀ ਅਤੇ ਪੂਰੀ ਜਾਂਚ ਤੋਂ ਬਾਅਦ ਹੀ ਰਿਪੋਰਟ ਜਾਰੀ ਕਰਨੀ ਚਾਹੀਦੀ ਸੀ।
Awanui Labs ਨੇ ਵੀ ਆਪਣੀ ਅੰਦਰੂਨੀ ਜਾਂਚ ਵਿੱਚ ਗਲਤੀ ਸਵੀਕਾਰ ਕਰਦੇ ਹੋਏ ਕਿਹਾ ਕਿ ਮੈਡੀਕਲ ਟੀਮ ਵੱਲੋਂ ਰਿਪੋਰਟ ਜਲਦੀ ਦੇਣ ਦੇ ਦਬਾਅ ਅਤੇ ਪਹਿਲਾਂ ਤੋਂ ਮੌਜੂਦ ਕਲੀਨਿਕਲ ਸ਼ੱਕ ਨੇ ਪੈਥੋਲੋਜਿਸਟਾਂ ਦੇ ਮੁਲਾਂਕਣ ਨੂੰ ਪ੍ਰਭਾਵਿਤ ਕੀਤਾ। ਲੈਬ ਨੇ ਮੰਨਿਆ ਕਿ ਅਜਿਹੇ ਮਾਮਲਿਆਂ ਵਿੱਚ ਜਲਦਬਾਜ਼ੀ ਗਲਤ ਨਤੀਜਿਆਂ ਦਾ ਖ਼ਤਰਾ ਕਾਫ਼ੀ ਵਧਾ ਦਿੰਦੀ ਹੈ।