ਟੌਰੰਗਾ ਤੋਂ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ ਜਿਸ ਨੇ ਮਾਪਿਆਂ ਦੀ ਚਿੰਤਾ ਵਧਾ ਦਿੱਤੀ ਹੈ। ਦਰਅਸਲ ਇੱਥੇ ਇੱਕ 13 ਸਾਲ ਦੇ ਮੁੰਡੇ ਨੇ ਟੇਮੂ ਤੋਂ ਖਰੀਦੇ ਗਏ 80 ਤੋਂ 100 ਛੋਟੇ ਚੁੰਬਕ ਖਾ ਲਏ ਸੀ ਜਿਸ ਤੋਂ ਬਾਅਦ ਉਸਦੀ ਇੱਕ ਵੱਡੀ ਸਰਜਰੀ ਹੋਈ ਹੈ। ਜ਼ਿਕਰਯੋਗ ਹੈ ਕਿ 2014 ਤੋਂ ਨਿਓਡੀਮੀਅਮ ਚੁੰਬਕ ‘ਤੇ ਪਾਬੰਦੀ ਲਗਾਈ ਗਈ ਹੈ ਪਰ ਅਜੇ ਵੀ ਇਹ ਔਨਲਾਈਨ ਬਾਜ਼ਾਰਾਂ ਰਾਹੀਂ ਉਪਲਬਧ ਹਨ। ਨਿਊਜ਼ੀਲੈਂਡ ਮੈਡੀਕਲ ਜਰਨਲ ਵਿੱਚ ਇੱਕ ਕੇਸ ਸਟੱਡੀ ਦੇ ਅਨੁਸਾਰ, ਟੌਰੰਗਾ ਹਸਪਤਾਲ ਦੇ ਸਰਜਨਾਂ ਨੂੰ ਮੁੰਡੇ ਦੇ ਅੰਤੜੀ ਦਾ ਇੱਕ ਹਿੱਸਾ ਹਟਾਉਣਾ ਪਿਆ ਹੈ। ਉਨ੍ਹਾਂ ਨੇ ਕਿਹਾ ਕਿ ਇਹ “ਚਿੰਤਾਜਨਕ” ਸੀ।
ਪਾਸੀਫਿਕਾ ਮੈਡੀਕਲ ਐਸੋਸੀਏਸ਼ਨ ਗਰੁੱਪ ਨੇ ਕਿਹਾ ਕਿ ਇਸ ਘਟਨਾ ਨੇ ਬੱਚਿਆਂ ਦੀ ਆਬਾਦੀ ਵਿੱਚ ਔਨਲਾਈਨ ਬਾਜ਼ਾਰਾਂ ਦੇ ਖ਼ਤਰਿਆਂ ਨੂੰ ਉਜਾਗਰ ਕੀਤਾ ਹੈ। ਜਦੋਂ ਕਿ ਨਿਊਜ਼ੀਲੈਂਡ ਵਿੱਚ ਉਤਪਾਦ ਸੁਰੱਖਿਆ ਕਾਨੂੰਨ ਮੌਜੂਦ ਹਨ ਜੋ ਉੱਚ-ਸ਼ਕਤੀ ਵਾਲੇ ਚੁੰਬਕਾਂ ਦੀ ਵਿਕਰੀ ‘ਤੇ ਪਾਬੰਦੀ ਲਗਾਉਂਦੇ ਹਨ, ਪਰ ਔਨਲਾਈਨ ਬਾਜ਼ਾਰਾਂ ‘ਤੇ ਵੇਚੇ ਜਾਣ ਵਾਲੇ ਉਤਪਾਦਾਂ ‘ਤੇ ਇਹਨਾਂ ਕਾਨੂੰਨਾਂ ਨੂੰ ਲਾਗੂ ਕਰਨਾ ਮਹੱਤਵਪੂਰਨ ਚੁਣੌਤੀ ਹੈ। ਇੱਕ ਬੁਲਾਰੇ ਨੇ ਕਿਹਾ ਕਿ, “ਇਹ ਸਾਡੇ ਤਾਮਾਰਕੀ ਲਈ ਖਾਸ ਤੌਰ ‘ਤੇ ਚਿੰਤਾਜਨਕ ਹੈ ਕਿਉਂਕਿ ਇਹ ਪਲੇਟਫਾਰਮ ਆਸਾਨੀ ਨਾਲ ਪਹੁੰਚਯੋਗ ਹਨ।”