ਨਿਊਜ਼ੀਲੈਂਡ ਦੇ ਪਾਲਮਰਸਟਨ ਨਾਰਥ ਵਿੱਚ ਇੱਕ ਜਾਇਦਾਦ ਮਾਲਕ ਨੂੰ ਐਸਬੈਸਟਸ ਨਾਲ ਸੰਬੰਧਿਤ ਰੋਕ ਹੁਕਮਾਂ ਨੂੰ ਵਾਰ-ਵਾਰ ਨਜ਼ਰਅੰਦਾਜ਼ ਕਰਨ ਦੇ ਮਾਮਲੇ ਵਿੱਚ 32,000 ਡਾਲਰ ਜੁਰਮਾਨਾ ਕੀਤਾ ਗਿਆ ਹੈ। ਸਨਲ ਲੋਨਾਪਨ ਨੇ ਐਸਬੈਸਟਸ ਪ੍ਰਭਾਵਿਤ ਇਲਾਕੇ ਵਿੱਚ ਕੰਮ ਬੰਦ ਕਰਨ ਦੇ ਹੁਕਮਾਂ ਦੀ ਪਾਲਣਾ ਨਹੀਂ ਕੀਤੀ ਅਤੇ ਚਿਤਾਵਨੀ ਨੋਟਿਸ ਵੀ ਹਟਾ ਦਿੱਤੇ ਸਨ। ਪਾਲਮਰਸਟਨ ਨਾਰਥ ਡਿਸਟ੍ਰਿਕਟ ਕੋਰਟ ਵਿੱਚ ਸੁਣਵਾਈ ਦੌਰਾਨ ਪਤਾ ਲੱਗਿਆ ਕਿ ਲੋਨਾਪਨ ਨੇ ਉਸ ਇਮਾਰਤ ਵਿੱਚ ਮੁਰੰਮਤ ਦਾ ਕੰਮ ਜਾਰੀ ਰੱਖਿਆ, ਜਿੱਥੇ WorkSafe ਵੱਲੋਂ ਸਾਰੇ ਕੰਮ ਤੁਰੰਤ ਰੋਕਣ ਦੇ ਹੁਕਮ ਜਾਰੀ ਕੀਤੇ ਗਏ ਸਨ।
WorkSafe ਨੇ ਦੱਸਿਆ ਕਿ ਮਈ 2022 ਵਿੱਚ ਐਸਬੈਸਟਸ ਦੀ ਮੌਜੂਦਗੀ ਨੂੰ ਲੈ ਕੇ ਪਹਿਲੀ ਵਾਰ ਨੋਟਿਸ ਜਾਰੀ ਕੀਤੇ ਗਏ ਸਨ। ਬਾਅਦ ਵਿੱਚ ਇੰਸਪੈਕਟਰਾਂ ਨੇ ਵੇਖਿਆ ਕਿ ਹੁਕਮਾਂ ਦੀ ਉਲੰਘਣਾ ਕਰਦੇ ਹੋਏ ਕੰਮ ਜਾਰੀ ਸੀ। ਇਸ ਤੋਂ ਇਲਾਵਾ, ਲੋਨਾਪਨ ਨੇ ਇਮਾਰਤ ਦੇ ਦਰਵਾਜ਼ਿਆਂ ‘ਤੇ ਲਗੇ ਸਰਕਾਰੀ ਨੋਟਿਸ ਹਟਾ ਦਿੱਤੇ ਅਤੇ ਮੰਗੀ ਗਈ ਜਾਣਕਾਰੀ ਵੀ ਨਹੀਂ ਦਿੱਤੀ। WorkSafe ਦੇ ਏਰੀਆ ਮੈਨੇਜਰ ਕਾਰਲ ਬੇਕਰ ਨੇ ਕਿਹਾ ਕਿ ਇਹ ਉਲੰਘਣਾ “ਬਾਰ-ਬਾਰ, ਜਾਣਬੁੱਝ ਕੇ ਕੀਤੀ ਗਈ ਸੀ।”
ਉਨ੍ਹਾਂ ਕਿਹਾ, “ਇਹ ਕੋਈ ਇੱਕ ਵਾਰ ਦੀ ਗਲਤੀ ਨਹੀਂ ਸੀ। ਮਾਮਲੇ ਨੂੰ ਠੀਕ ਕਰਨ ਅਤੇ ਸਹਿਯੋਗ ਦੇਣ ਦੇ ਕਈ ਮੌਕੇ ਦਿੱਤੇ ਗਏ ਸਨ। ਸਾਡੇ ਨੋਟਿਸਾਂ ਨੂੰ ਨਜ਼ਰਅੰਦਾਜ਼ ਕਰਨ ਨਾਲ ਜ਼ਿੰਮੇਵਾਰੀ ਤੋਂ ਬਚਿਆ ਨਹੀਂ ਜਾ ਸਕਿਆ, ਸਗੋਂ ਇਸ ਨਾਲ ਸਜ਼ਾ ਅਤੇ ਜੁਰਮਾਨਾ ਹੋਵੇਗਾ।” ਬੇਕਰ ਨੇ ਕਿਹਾ ਕਿ ਪ੍ਰੋਹਿਬਿਸ਼ਨ ਨੋਟਿਸ ਦਾ ਮਤਲਬ ਹੈ ਕਿ ਕੰਮ ਤੁਰੰਤ ਰੋਕਣਾ ਲਾਜ਼ਮੀ ਹੁੰਦਾ ਹੈ। ਉਨ੍ਹਾਂ ਨੇ ਕਿਹਾ, “ਇਹ ਨੋਟਿਸ ਇਸ ਲਈ ਜਾਰੀ ਕੀਤਾ ਜਾਂਦਾ ਹੈ ਕਿਉਂਕਿ ਗੰਭੀਰ ਨੁਕਸਾਨ ਦਾ ਖਤਰਾ ਹੁੰਦਾ ਹੈ। ਇਹ ਕਾਨੂੰਨੀ ਲੋੜ ਹੈ, ਕੋਈ ਸਲਾਹ ਨਹੀਂ।”
ਲੋਨਾਪਨ ਨੂੰ Health and Safety at Work Act 2015 ਦੀਆਂ ਕਈ ਧਾਰਾਵਾਂ ਤਹਿਤ ਦੋਸ਼ੀ ਕਰਾਰ ਦਿੱਤਾ ਗਿਆ, ਜਿਸ ਵਿੱਚ ਪ੍ਰੋਹਿਬਿਸ਼ਨ ਨੋਟਿਸ ਦੀ ਉਲੰਘਣਾ, ਇੰਸਪੈਕਟਰਾਂ ਦੀ ਮਦਦ ਨਾ ਕਰਨਾ ਅਤੇ ਸਰਕਾਰੀ ਨੋਟਿਸ ਜਾਣਬੁੱਝ ਕੇ ਹਟਾਉਣਾ ਸ਼ਾਮਿਲ ਹੈ।