ਅਮਰੀਕਾ ਦੇ ਦੱਖਣੀ ਕੈਲੀਫੋਰਨੀਆ ਵਿੱਚ ਇੱਕ ਏਅਰੋਸਪੇਸ ਫੈਸਿਲਟੀ ਵਿੱਚ ਜ਼ਹਿਰੀਲੇ ਕੈਮੀਕਲ ਨਾਲ ਭਰੇ ਟੈਂਕ ਵਿੱਚ ਰਿਸਾਅ ਹੋਣ ਕਾਰਨ ਹੜਕੰਪ ਮਚ ਗਿਆ। ਹਾਲਾਤ ਦੀ ਗੰਭੀਰਤਾ ਨੂੰ ਦੇਖਦੇ ਹੋਏ ਅਧਿਕਾਰੀਆਂ ਨੇ 44 ਹਜ਼ਾਰ ਤੋਂ ਵੱਧ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ ‘ਤੇ ਪਹੁੰਚਾਇਆ ਹੈ। ਅਧਿਕਾਰੀਆਂ ਮੁਤਾਬਿਕ ਆਰੈਂਜ ਕਾਊਂਟੀ ਦੇ ਗਾਰਡਨ ਗ੍ਰੋਵ ਇਲਾਕੇ ਵਿੱਚ ਸਥਿਤ ਫੈਸਿਲਟੀ ਦੇ ਇਕ ਟੈਂਕ ਵਿੱਚ ਲਗਭਗ 7,000 ਗੈਲਨ ਮਿਥਾਇਲ ਮੈਥੈਕ੍ਰਿਲੇਟ ਮੌਜੂਦ ਹੈ, ਜੋ ਪਲਾਸਟਿਕ ਬਣਾਉਣ ਲਈ ਵਰਤਿਆ ਜਾਣ ਵਾਲਾ ਬਹੁਤ ਜ਼ਿਆਦਾ ਜਲਣਸ਼ੀਲ ਅਤੇ ਜ਼ਹਿਰੀਲਾ ਰਸਾਇਣ ਹੈ।
ਆਰੈਂਜ ਕਾਊਂਟੀ ਫਾਇਰ ਅਥਾਰਟੀ ਦੇ ਮੁਖੀ ਕ੍ਰੇਗ ਕੋਵੇ ਨੇ ਕਿਹਾ ਕਿ ਇਹ ਸਥਿਤੀ ਬਹੁਤ ਖਤਰਨਾਕ ਹੈ ਅਤੇ ਕਿਸੇ ਵੀ ਵੇਲੇ ਵੱਡਾ ਹਾਦਸਾ ਵਾਪਰ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਜਦ ਤੱਕ ਕੋਈ ਪੱਕਾ ਹੱਲ ਨਹੀਂ ਲੱਭਿਆ ਜਾਂਦਾ, ਤਦ ਤੱਕ ਖਤਰਾ ਬਣਿਆ ਰਹੇਗਾ।
ਕਈ ਸ਼ਹਿਰਾਂ ਵਿੱਚ ਖਾਲੀ ਕਰਵਾਏ ਗਏ ਘਰ
ਪ੍ਰਸ਼ਾਸਨ ਵੱਲੋਂ ਗਾਰਡਨ ਗ੍ਰੋਵ, ਸਾਇਪ੍ਰਸ, ਸਟੈਂਟਨ, ਐਨਾਹਾਈਮ, ਬੁਏਨਾ ਪਾਰਕ ਅਤੇ ਵੈਸਟਮਿੰਸਟਰ ਸਮੇਤ ਕਈ ਇਲਾਕਿਆਂ ਦੇ ਲੋਕਾਂ ਨੂੰ ਤੁਰੰਤ ਆਪਣੇ ਘਰ ਛੱਡ ਕੇ ਸੁਰੱਖਿਅਤ ਥਾਵਾਂ ‘ਤੇ ਜਾਣ ਦੇ ਹੁਕਮ ਦਿੱਤੇ ਗਏ। ਕ੍ਰੇਗ ਕੋਵੇ ਨੇ ਮੀਡੀਆ ਨਾਲ ਗੱਲਬਾਤ ਦੌਰਾਨ ਕਿਹਾ ਕਿ ਉਹ 32 ਸਾਲਾਂ ਤੋਂ ਅੱਗ ਬੁਝਾਉ ਸੇਵਾ ਵਿੱਚ ਹਨ, ਪਰ ਇਸ ਤੋਂ ਵੱਧ ਖਤਰਨਾਕ ਘਟਨਾ ਉਹਨਾਂ ਨੇ ਪਹਿਲਾਂ ਕਦੇ ਨਹੀਂ ਵੇਖੀ।
ਟੈਂਕ ਫਟਣ ਦਾ ਖਤਰਾ
ਅਧਿਕਾਰੀਆਂ ਨੇ ਦੱਸਿਆ ਕਿ ਕੁੱਲ ਤਿੰਨ ਟੈਂਕ ਹਨ, ਜਿਨ੍ਹਾਂ ਵਿੱਚੋਂ ਇੱਕ ਦਾ ਕੂਲਿੰਗ ਸਿਸਟਮ ਖਰਾਬ ਹੋ ਗਿਆ ਹੈ। ਇਸ ਕਾਰਨ ਟੈਂਕ ਦੇ ਫਟਣ ਜਾਂ ਉਸ ਵਿੱਚ ਮੌਜੂਦ ਜ਼ਹਿਰੀਲਾ ਕੈਮੀਕਲ ਬਾਹਰ ਫੈਲਣ ਦਾ ਖਤਰਾ ਵੱਧ ਗਿਆ ਹੈ। ਜੇ ਟੈਂਕ ਫਟਦਾ ਹੈ ਤਾਂ ਲਗਭਗ 6,000 ਤੋਂ 7,000 ਗੈਲਨ ਖਤਰਨਾਕ ਰਸਾਇਣ ਆਲੇ-ਦੁਆਲੇ ਦੇ ਇਲਾਕੇ ਵਿੱਚ ਫੈਲ ਸਕਦਾ ਹੈ। ਇਸ ਨਾਲ ਨੇੜਲੇ ਹੋਰ ਟੈਂਕ ਵੀ ਪ੍ਰਭਾਵਿਤ ਹੋ ਸਕਦੇ ਹਨ, ਜਿਸ ਕਾਰਨ ਵੱਡਾ ਧਮਾਕਾ ਹੋਣ ਦੀ ਸੰਭਾਵਨਾ ਬਣ ਸਕਦੀ ਹੈ।
ਮਾਹਿਰਾਂ ਦੀ ਨਵੀਂ ਟੀਮ ਬਣਾਈ ਗਈ
ਫਾਇਰ ਅਧਿਕਾਰੀਆਂ ਨੇ ਦੱਸਿਆ ਕਿ ਹਾਲਾਤ ‘ਤੇ ਕਾਬੂ ਪਾਉਣ ਲਈ ਇੱਕ ਖਾਸ ਟੀਮ ਬਣਾਈ ਗਈ ਹੈ, ਜੋ ਦੇਸ਼ ਭਰ ਦੇ ਮਾਹਿਰਾਂ ਨਾਲ ਸੰਪਰਕ ਕਰ ਰਹੀ ਹੈ। ਇਹ ਟੀਮ ਟੈਂਕ ਦਾ ਦਬਾਅ ਘਟਾਉਣ ਅਤੇ ਵੱਡੇ ਹਾਦਸੇ ਨੂੰ ਰੋਕਣ ਲਈ ਹੱਲ ਲੱਭਣ ਵਿੱਚ ਜੁਟੀ ਹੋਈ ਹੈ।
ਅਧਿਕਾਰੀਆਂ ਨੇ ਕਿਹਾ ਕਿ ਉਹ ਸਭ ਤੋਂ ਬੁਰੇ ਹਾਲਾਤ ਲਈ ਤਿਆਰ ਹਨ, ਹਾਲਾਂਕਿ ਉਮੀਦ ਕੀਤੀ ਜਾ ਰਹੀ ਹੈ ਕਿ ਸਥਿਤੀ ਜਲਦੀ ਕਾਬੂ ਵਿੱਚ ਆ ਜਾਵੇਗੀ।