ਨਿਊਜ਼ੀਲੈਂਡ ਦੇ ਹੈਮਿਲਟਨ ਸ਼ਹਿਰ ਵਿੱਚ ਇੱਕ ਸੋਸ਼ਲ ਮੀਡੀਆ ਪੋਸਟ ਨੇ ਅਚਾਨਕ ਹੀ ਪੈਟਰੋਲ ਪੰਪ ‘ਤੇ ਭਾਰੀ ਭੀੜ ਇਕੱਠੀ ਕਰ ਦਿੱਤੀ। “Strongest Māori Gamer” ਨਾਮਕ ਯੂਜ਼ਰ ਵੱਲੋਂ ਦਿੱਤੇ ਗਏ ਸੱਦੇ ਤੋਂ ਬਾਅਦ ਲੋਕ ਵੱਡੀ ਗਿਣਤੀ ਵਿੱਚ ਮੁਫ਼ਤ ਫਿਊਲ ਦੀ ਉਮੀਦ ਨਾਲ ਪੰਪ ‘ਤੇ ਪਹੁੰਚਣ ਲੱਗ ਪਏ। ਇਹ ਘਟਨਾ Z Energy ਦੇ Te Papanui, Five Cross Roads ਸਥਿਤ ਪੈਟਰੋਲ ਪੰਪ ‘ਤੇ ਵਾਪਰੀ, ਜਿੱਥੇ ਸਵੇਰੇ 10 ਵਜੇ ਤੋਂ ਹੀ ਗੱਡੀਆਂ ਦੀਆਂ ਲੰਬੀਆਂ ਕਤਾਰਾਂ ਦੇਖਣ ਨੂੰ ਮਿਲੀਆਂ। ਹਾਲਾਤ ਇਹ ਬਣ ਗਏ ਕਿ ਨੇੜਲੇ ਰਸਤੇ ਅਤੇ ਰਾਊਂਡਅਬਾਊਟ ਵੀ ਟ੍ਰੈਫਿਕ ਨਾਲ ਜਾਮ ਹੋ ਗਏ।
ਕਈ ਲੋਕਾਂ ਵੱਲੋਂ ਸੋਸ਼ਲ ਮੀਡੀਆ ‘ਤੇ ਫਿਊਲ ਵਾਊਚਰਾਂ ਦੀਆਂ ਤਸਵੀਰਾਂ ਵੀ ਸਾਂਝੀਆਂ ਕੀਤੀਆਂ ਗਈਆਂ, ਜਿਸ ਨਾਲ ਹੋਰ ਲੋਕ ਵੀ ਉੱਥੇ ਪਹੁੰਚਦੇ ਗਏ। ਭਾਵੇਂ ਇਹ ਪੇਸ਼ਕਸ਼ ਸਿਰਫ਼ ਕਰੀਬ 20 ਮਿੰਟ ਲਈ ਹੀ ਸੀ, ਪਰ ਇਸ ਛੋਟੀ ਜਿਹੀ ਖ਼ਬਰ ਨੇ ਵੱਡੀ ਭੀੜ ਖਿੱਚ ਲਈ। ਇਹ ਘਟਨਾ ਦਰਸਾਉਂਦੀ ਹੈ ਕਿ ਵਧ ਰਹੀਆਂ ਫਿਊਲ ਦੀਆਂ ਕੀਮਤਾਂ ਕਾਰਨ ਲੋਕ ਕਿੰਨੇ ਪ੍ਰਭਾਵਿਤ ਹੋ ਰਹੇ ਹਨ ਅਤੇ ਕਿਵੇਂ ਛੋਟੀਆਂ ਸਹੂਲਤਾਂ ਵੀ ਉਨ੍ਹਾਂ ਲਈ ਵੱਡੀ ਰਾਹਤ ਬਣ ਸਕਦੀਆਂ ਹਨ।