ਨਿਊਜ਼ੀਲੈਂਡ ਦੇ Waiheke Island ਤੋਂ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ। ਦਰਅਸਲ ਇੱਥੇ ਕੰਮ ਦੌਰਾਨ ਸੁੱਤੀ ਹੋਈ ਮਹਿਲਾ ਕਰਮਚਾਰੀ ਨੂੰ ਨੌਕਰੀ ਤੋਂ ਕੱਢਣਾ ਕੰਪਨੀ ਨੂੰ ਮਹਿੰਗਾ ਪਿਆ ਹੈ। ਇੰਨਾਂ ਹੀ ਨਹੀਂ ਮਹਿਲਾ ਕਰਮਚਾਰੀ ਨੂੰ 6 ਮਹੀਨੇ ਦੀ ਤਨਖ਼ਾਹ ਅਤੇ $18,750 ਮੁਆਵਜ਼ਾ ਦੇਣ ਦਾ ਹੁਕਮ ਵੀ ਦਿੱਤਾ ਗਿਆ ਹੈ। Employment Relations Authority ਦੇ ਫੈਸਲੇ ਅਨੁਸਾਰ ਵਾਈਹੇਕੇ ਆਇਲੈਂਡ ਸਪੋਰਟਡ ਹੋਮਜ਼ ਟਰੱਸਟ (Wish) ਵਿੱਚ ਨਾਈਟ ਸ਼ਿਫ਼ਟਾਂ ਕਰਨ ਵਾਲੀ ਇੱਕ ਰਿਕਵਰੀ ਸਪੋਰਟ ਵਰਕਰ ਨੂੰ ਗਲਤ ਤਰੀਕੇ ਨਾਲ ਨੌਕਰੀ ਤੋਂ ਕੱਢਿਆ ਗਿਆ ਸੀ। 70 ਸਾਲਾ ਲਿਲੀਅਨ ਸ਼ਾਰਟਰ Wish ਦੇ 24-ਘੰਟੇ ਰਿਹਾਇਸ਼ੀ ਕੇਅਰ ਸੈਂਟਰ ’ਚ ਉੱਚ ਜ਼ਰੂਰਤਾਂ ਵਾਲੇ ਨਿਵਾਸੀਆਂ ਲਈ ਹਫ਼ਤੇ ‘ਚ ਤਿੰਨ ਰਾਤਾਂ ਦੀਆਂ ਸ਼ਿਫ਼ਟਾਂ ‘ਤੇ ਕੰਮ ਕਰਦੀ ਸੀ।
ਪਰ ਪਿਛਲੇ ਸਾਲ 12 ਫ਼ਰਵਰੀ 2025 ਨੂੰ ਨੌਕਰੀ ਤੋਂ ਕੱਢੇ ਜਾਣ ਤੋਂ ਬਾਅਦ, ਸ਼ਾਰਟਰ ਨੇ ਗੈਰ-ਵਾਜ਼ਬ ਨੁਕਸਾਨ ਅਤੇ ਗੈਰ-ਵਾਜ਼ਬ ਬਰਖ਼ਾਸਤਗੀ ਬਾਰੇ ਅਥਾਰਟੀ ਕੋਲ ਸ਼ਿਕਾਇਤ ਕੀਤੀ ਸੀ। ਸ਼ਾਰਟਰ ਦਾ ਕਹਿਣਾ ਸੀ ਕਿ 12 ਘੰਟਿਆਂ ਦੀ ਸ਼ਿਫ਼ਟ ਦੌਰਾਨ ਮਿਲਣ ਵਾਲੀਆਂ ਬ੍ਰੇਕਾਂ ‘ਚ ਉਸ ਨੂੰ ਸੌਣ ਦੇਣ ਦੀ ਸਹਿਮਤੀ ਜਾਂ ਸਮਝੌਤਾ ਸੀ। ਦੱਸ ਦੇਈਏ ਮਹਿਲਾ ਕਰਮਚਾਰੀ 18 ਸਾਲਾਂ ਤੋਂ ਇਸ ਚੈਰਿਟੀ ਨਾਲ ਕੰਮ ਕਰ ਰਹੀ ਸੀ ਅਤੇ ਤਿੰਨ ਵੱਖ-ਵੱਖ ਸ਼ਿਫ਼ਟਾਂ ਦੌਰਾਨ ਸੁੱਤੀ ਹੋਈ ਰਿਕਾਰਡ ਹੋਣ ਤੋਂ ਬਾਅਦ ਉਸਨੂੰ ਨੌਕਰੀ ਤੋਂ ਕੱਢ ਦਿੱਤਾ ਗਿਆ ਸੀ।