ਇਨਵਰਕਾਰਗਿਲ: ਨਿਊਜ਼ੀਲੈਂਡ ਦੇ ਸਾਊਥਲੈਂਡ ਇਲਾਕੇ ਵਿੱਚ ਜ਼ਖ਼ਮੀ ਬਲਦਾਂ ਦਾ ਸਮੇਂ ਸਿਰ ਅਤੇ ਢੁੱਕਵਾਂ ਇਲਾਜ ਨਾ ਕਰਵਾਉਣ ਦੇ ਮਾਮਲੇ ਵਿੱਚ ਇੱਕ 62 ਸਾਲਾ ਕਿਸਾਨ ਨੂੰ $7500 ਦਾ ਜੁਰਮਾਨਾ ਕੀਤਾ ਗਿਆ ਹੈ। ਇਲਾਜ ਦੀ ਘਾਟ ਕਾਰਨ ਚਾਰ ਬਲਦ ਇੰਨੀ ਤਕਲੀਫ਼ ਵਿੱਚ ਸਨ ਕਿ ਉਨ੍ਹਾਂ ਦੀ ਪੀੜਾ ਖ਼ਤਮ ਕਰਨ ਲਈ ਉਨ੍ਹਾਂ ਨੂੰ ਯੂਥਨੇਜ਼ੀਆ ਦੇਣਾ ਪਿਆ।
ਡੇਵਿਡ ਮਾਈਕਲ ਚਰਚ ਨੂੰ ਇਨਵਰਕਾਰਗਿਲ ਡਿਸਟ੍ਰਿਕਟ ਕੋਰਟ ਨੇ Animal Welfare Act ਤਹਿਤ ਪੰਜ ਦੋਸ਼ਾਂ ਵਿੱਚ ਸਜ਼ਾ ਸੁਣਾਈ। ਇਹ ਕਾਰਵਾਈ ਨਿਊਜ਼ੀਲੈਂਡ ਦੇ Ministry for Primary Industries (MPI) ਵੱਲੋਂ ਕੀਤੀ ਗਈ ਸੀ।
MPI ਦੇ ਪਸ਼ੂ ਭਲਾਈ ਇੰਸਪੈਕਟਰਾਂ ਅਤੇ ਦੋ ਵੈਟਰਨਰੀ ਡਾਕਟਰਾਂ ਨੇ ਚਰਚ ਦੇ ਫਾਰਮ ਦੀ ਜਾਂਚ ਦੌਰਾਨ ਇਨ੍ਹਾਂ ਪਸ਼ੂਆਂ ਨੂੰ ਗੰਭੀਰ ਹਾਲਤ ਵਿੱਚ ਪਾਇਆ।
ਇਨ੍ਹਾਂ ਵਿੱਚ ਇੱਕ ਜਰਸੀ ਨਸਲ ਦਾ ਬਲਦ ਵੀ ਸੀ, ਜਿਸ ਦੇ ਚਿਹਰੇ, ਗੱਲ੍ਹਾਂ ਅਤੇ ਜਬਾੜੇ ’ਤੇ ਬਹੁਤ ਜ਼ਿਆਦਾ ਸੋਜ ਸੀ ਅਤੇ ਉਹ ਸਪੱਸ਼ਟ ਤੌਰ ’ਤੇ ਦਰਦ ਵਿੱਚ ਸੀ। ਵੈਟਰਨਰੀ ਜਾਂਚ ਤੋਂ ਬਾਅਦ ਉਸ ਨੂੰ ਪੀੜਾ ਤੋਂ ਮੁਕਤੀ ਦਿਵਾਉਣ ਲਈ ਯੂਥਨੇਜ਼ੀਆ ਦੇਣਾ ਪਿਆ।
ਇਸੇ ਤਰ੍ਹਾਂ ਦੋ ਹੋਰ ਜਰਸੀ ਬਲਦਾਂ ਨੂੰ ਵੀ ਯੂਥਨੇਜ਼ੀਆ ਦੇਣਾ ਪਿਆ। ਇੱਕ ਦੀ ਪਿਛਲੀ ਲੱਤ ਵਿੱਚ ਪੱਟ ਦੀ ਹੱਡੀ ਟੁੱਟਣ ਕਾਰਨ ਭਾਰੀ ਸੋਜ ਸੀ ਅਤੇ ਉਹ ਲੱਤ ’ਤੇ ਭਾਰ ਨਹੀਂ ਪਾ ਸਕਦਾ ਸੀ। ਦੂਜਾ ਬਲਦ ਠੀਕ ਤਰ੍ਹਾਂ ਖੜ੍ਹਾ ਜਾਂ ਤੁਰ ਨਹੀਂ ਸਕਦਾ ਸੀ ਅਤੇ ਤੁਰਦਿਆਂ ਉਸ ਦਾ ਸਰੀਰ ਲਗਾਤਾਰ ਡੋਲ ਰਿਹਾ ਸੀ।
ਇੱਕ ਹੇਅਰਫੋਰਡ ਬਲਦ ਦੀਆਂ ਦੋਵੇਂ ਪਿਛਲੀਆਂ ਲੱਤਾਂ ਲੰਗੜੀਆਂ ਸਨ ਅਤੇ ਉਸ ਦਾ ਕੂਲ੍ਹਾ ਆਪਣੀ ਥਾਂ ਤੋਂ ਖਿਸਕਿਆ ਹੋਇਆ ਸੀ। ਉਸ ਨੂੰ ਵੀ ਪੀੜਾ ਖ਼ਤਮ ਕਰਨ ਲਈ ਯੂਥਨੇਜ਼ੀਆ ਦਿੱਤਾ ਗਿਆ।
ਇੱਕ ਹੋਰ ਹੇਅਰਫੋਰਡ ਬਲਦ ਦੇ ਮੂੰਹ ਵਿੱਚ ਇਨਫੈਕਸ਼ਨ, ਫੋੜਾ ਫਟਣ ਅਤੇ ਹੇਠਲੇ ਜਬਾੜੇ ’ਤੇ ਸੋਜ ਸੀ। ਹਾਲਾਂਕਿ, ਵੈਟਰਨਰੀ ਇਲਾਜ ਮਿਲਣ ਤੋਂ ਬਾਅਦ ਉਹ ਠੀਕ ਹੋ ਗਿਆ।
MPI ਦੇ ਸਾਊਥ ਡਿਸਟ੍ਰਿਕਟ ਮੈਨੇਜਰ ਕੈਲੇਬ ਟ੍ਰੈਂਟ ਨੇ ਕਿਹਾ ਕਿ ਕਿਸਾਨ ਨੂੰ ਇਨ੍ਹਾਂ ਜਾਨਵਰਾਂ ਦੀ ਹਾਲਤ ਵਿਗੜਨ ਤੋਂ ਕਾਫ਼ੀ ਪਹਿਲਾਂ ਕਾਰਵਾਈ ਕਰਨੀ ਚਾਹੀਦੀ ਸੀ। ਉਨ੍ਹਾਂ ਕਿਹਾ ਕਿ ਚਰਚ ਕੋਲ ਪਸ਼ੂਆਂ ਦੀ ਜਾਂਚ ਆਪਣੇ ਵੈਟਰਨਰੀ ਡਾਕਟਰ ਤੋਂ ਕਰਵਾਉਣ ਦਾ ਵਿਕਲਪ ਸੀ, ਪਰ ਉਸ ਨੇ ਅਜਿਹਾ ਨਹੀਂ ਕੀਤਾ।
ਟ੍ਰੈਂਟ ਨੇ ਕਿਹਾ ਕਿ ਪਸ਼ੂਆਂ ਦੀ ਦੇਖਭਾਲ ਦੀ ਜ਼ਿੰਮੇਵਾਰੀ ਮਾਲਕ ਦੀ ਹੁੰਦੀ ਹੈ ਅਤੇ ਚਰਚ ਇਹ ਯਕੀਨੀ ਬਣਾਉਣ ਵਿੱਚ ਅਸਫਲ ਰਿਹਾ ਕਿ ਜ਼ਖ਼ਮੀ ਪਸ਼ੂਆਂ ਨੂੰ ਦਰਦ ਅਤੇ ਤਕਲੀਫ਼ ਘਟਾਉਣ ਲਈ ਲੋੜੀਂਦਾ ਇਲਾਜ ਮਿਲੇ।
$7500 ਦੇ ਜੁਰਮਾਨੇ ਤੋਂ ਇਲਾਵਾ ਅਦਾਲਤ ਨੇ ਚਰਚ ਨੂੰ $4,267.50 ਵੈਟਰਨਰੀ ਖਰਚੇ ਅਤੇ $750 ਵਕੀਲਾਂ ਦੀ ਫੀਸ ਤੇ ਅਦਾਲਤੀ ਖਰਚੇ ਵਜੋਂ ਅਦਾ ਕਰਨ ਦੇ ਹੁਕਮ ਵੀ ਦਿੱਤੇ ਹਨ।