ਨਿਊਜ਼ੀਲੈਂਡ ਵਿੱਚ ਨਵੇਂ Anti-Stalking ਕਾਨੂੰਨ ਲਾਗੂ ਹੋਣ ਦੇ ਕੁਝ ਹੀ ਘੰਟਿਆਂ ਬਾਅਦ ਆਕਲੈਂਡ ਪੁਲਿਸ ਨੇ ਪਹਿਲਾ ਮਾਮਲਾ ਦਰਜ ਕਰਦੇ ਹੋਏ ਇੱਕ 39 ਸਾਲਾ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਦੋਸ਼ ਹੈ ਕਿ ਇਸ ਵਿਅਕਤੀ ਨੇ ਪਿਛਲੇ ਦੋ ਸਾਲਾਂ ਦੌਰਾਨ ਇੱਕ ਮਹਿਲਾ ਦਾ ਲਗਾਤਾਰ ਪਿੱਛਾ ਕੀਤਾ ਅਤੇ ਉਸ ਨਾਲ ਬਾਰ-ਬਾਰ ਅਣਚਾਹਾ ਸੰਪਰਕ ਕਰਕੇ ਉਸਨੂੰ ਮਾਨਸਿਕ ਤੌਰ ‘ਤੇ ਪਰੇਸ਼ਾਨ ਕੀਤਾ।
ਅਦਾਲਤੀ ਦਸਤਾਵੇਜ਼ਾਂ ਮੁਤਾਬਕ ਦੋਸ਼ੀ ਨੇ ਇੱਕ ਵਾਰ ਮਹਿਲਾ ਦਾ ਬੱਸ ਤੋਂ ਉਤਰਣ ਮਗਰੋਂ ਪਿੱਛਾ ਕੀਤਾ ਅਤੇ ਬਾਅਦ ਵਿੱਚ ਮੁੜ ਉਸ ਨਾਲ ਅਣਚਾਹੀ ਗੱਲਬਾਤ ਸ਼ੁਰੂ ਕੀਤੀ। ਇੱਕ ਹੋਰ ਘਟਨਾ ਵਿੱਚ ਉਸ ‘ਤੇ ਮਹਿਲਾ ਦਾ ਦੂਜੀ ਬੱਸ ਤੋਂ ਉਤਰਣ ਮਗਰੋਂ ਵੀ ਪਿੱਛਾ ਕਰਨ ਦੇ ਦੋਸ਼ ਹਨ। ਪੁਲਿਸ ਦਾ ਕਹਿਣਾ ਹੈ ਕਿ ਦੋਸ਼ੀ ਦੀਆਂ ਹਰਕਤਾਂ ਨਾਲ ਮਹਿਲਾ ਵਿੱਚ ਡਰ ਅਤੇ ਮਾਨਸਿਕ ਤਣਾਅ ਪੈਦਾ ਹੋਣਾ ਸਵਭਾਵਿਕ ਸੀ। ਇਸ ਤੋਂ ਇਲਾਵਾ ਉਸ ‘ਤੇ ਮਹਿਲਾ ਨਾਲ ਅਸ਼ਲੀਲ ਹਰਕਤ ਕਰਨ ਦਾ ਦੋਸ਼ ਵੀ ਲਗਾਇਆ ਗਿਆ ਹੈ। ਮਾਮਲੇ ਦੀ ਸੁਣਵਾਈ ਲਈ ਦੋਸ਼ੀ ਨੂੰ ਆਕਲੈਂਡ ਡਿਸਟ੍ਰਿਕਟ ਕੋਰਟ ਵਿੱਚ ਪੇਸ਼ ਕੀਤਾ ਜਾਣਾ ਹੈ।
ਇਹ ਨਿਊਜ਼ੀਲੈਂਡ ਦੇ ਨਵੇਂ ਕਾਨੂੰਨ ਤਹਿਤ ਦਰਜ ਹੋਇਆ ਪਹਿਲਾ Stalking ਕੇਸ ਹੈ। ਮੰਗਲਵਾਰ ਤੋਂ ਲਾਗੂ ਹੋਏ ਇਸ ਕਾਨੂੰਨ ਅਨੁਸਾਰ ਹੁਣ Stalking ਨੂੰ ਵੱਖਰਾ ਅਪਰਾਧ ਮੰਨਿਆ ਗਿਆ ਹੈ, ਜਿਸ ਲਈ ਪੰਜ ਸਾਲ ਤੱਕ ਦੀ ਕੈਦ ਦੀ ਸਜ਼ਾ ਹੋ ਸਕਦੀ ਹੈ। ਪੁਲਿਸ ਦੀ Acting Director of Prevention Natasha Allan ਨੇ ਕਿਹਾ ਕਿ ਇਹ ਕਾਰਵਾਈ ਦਰਸਾਉਂਦੀ ਹੈ ਕਿ ਪੁਲਿਸ ਨਵੇਂ ਕਾਨੂੰਨ ਤਹਿਤ ਪੀੜਤਾਂ ਦੀ ਸੁਰੱਖਿਆ ਲਈ ਤੁਰੰਤ ਅਤੇ ਸਖ਼ਤ ਕਦਮ ਚੁੱਕੇਗੀ।
ਨਿਆਂ ਮੰਤਰੀ Paul Goldsmith ਨੇ ਪਹਿਲਾਂ Stalking ਨੂੰ “ਖ਼ਤਰਨਾਕ” ਅਤੇ “ਮਾਨਸਿਕ ਤੌਰ ‘ਤੇ ਤਬਾਹ ਕਰਨ ਵਾਲਾ” ਅਪਰਾਧ ਦੱਸਿਆ ਸੀ। ਉਨ੍ਹਾਂ ਕਿਹਾ ਸੀ ਕਿ ਖ਼ਾਸ ਕਰਕੇ ਮਹਿਲਾਵਾਂ ਸਾਲਾਂ ਤੋਂ ਇਸ ਤਰ੍ਹਾਂ ਦੀਆਂ ਘਟਨਾਵਾਂ ਕਾਰਨ ਡਰ ਅਤੇ ਮਾਨਸਿਕ ਪੀੜਾ ਦਾ ਸਾਹਮਣਾ ਕਰ ਰਹੀਆਂ ਸਨ, ਜਦਕਿ ਦੋਸ਼ੀਆਂ ਖ਼ਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਕਰਨਾ ਮੁਸ਼ਕਲ ਹੁੰਦਾ ਸੀ। ਸਰਕਾਰ ਮੁਤਾਬਕ ਇਹ ਨਵੇਂ ਕਾਨੂੰਨੀ ਸੁਧਾਰ ਲੰਬੇ ਸਮੇਂ ਤੋਂ ਚੱਲ ਰਹੀਆਂ ਮੰਗਾਂ ਅਤੇ ਪੀੜਤਾਂ ਵੱਲੋਂ ਦਿੱਤੀਆਂ ਗਈਆਂ ਸੈਂਕੜੇ ਅਪੀਲਾਂ ਤੋਂ ਬਾਅਦ ਲਿਆਂਦੇ ਗਏ ਹਨ।