ਟੌਰਾਂਗਾ: ਟੀ ਪੁੱਕੀ ਦੇ ਪ੍ਰਸਿੱਧ ਕੀਵੀਫਰੂਟ ਉਤਪਾਦਕ ਗੋਪਾ ਬੈਂਸ (ਗੁਰਵਿੰਦਰ ਸਿੰਘ ਬੈਂਸ) ਨੂੰ ਨਗਰ ਕੀਰਤਨ ਦੌਰਾਨ ਹੋਏ ਕਥਿਤ ਹਮਲੇ ਅਤੇ ਚੋਰੀ ਦੇ ਮਾਮਲੇ ਵਿੱਚ ਵੱਡੀ ਕਾਨੂੰਨੀ ਰਾਹਤ ਮਿਲੀ ਹੈ। ਟੌਰਾਂਗਾ ਜ਼ਿਲ੍ਹਾ ਅਦਾਲਤ ਨੇ ਉਨ੍ਹਾਂ ਖ਼ਿਲਾਫ਼ ਦਰਜ ਹਮਲੇ ਅਤੇ ਚੋਰੀ ਨਾਲ ਸਬੰਧਿਤ ਸਾਰੇ ਚਾਰ ਦੋਸ਼ ਖਾਰਜ ਕਰ ਦਿੱਤੇ ਹਨ। ਅਦਾਲਤ ਨੇ ਇਹ ਫੈਸਲਾ ਉਸ ਵੇਲੇ ਸੁਣਾਇਆ ਜਦੋਂ ਕਰਾਊਨ ਪੱਖ ਨੇ ਮੰਨਿਆ ਕਿ ਦੋਸ਼ੀ ਦੀ ਪਛਾਣ ਨਾਲ ਜੁੜੇ ਸਬੂਤ ਭਰੋਸੇਯੋਗ ਨਹੀਂ ਸਨ। ਇਹ ਮਾਮਲਾ 27 ਸਤੰਬਰ 2025 ਨੂੰ ਟੀ ਪੁੱਕੀ ਵਿੱਚ ਸਜਾਏ ਗਏ ਨਗਰ ਕੀਰਤਨ ਨਾਲ ਸਬੰਧਿਤ ਸੀ, ਜਿਸ ਵਿੱਚ ਬੈਂਸ ਉੱਤੇ ਦੋ ਆਮ ਹਮਲੇ (Common Assault) ਅਤੇ ਦੋ ਚੋਰੀ (Theft) ਦੇ ਦੋਸ਼ ਲਗਾਏ ਗਏ ਸਨ।
15 ਜੁਲਾਈ 2026 ਨੂੰ ਹੋਈ ਸੁਣਵਾਈ ਦੌਰਾਨ ਕਰਾਊਨ ਵੱਲੋਂ ਈ. ਥਾਮਪਸਨ ਅਤੇ ਬਚਾਅ ਪੱਖ ਵੱਲੋਂ ਐਸ. ਲੈਕ ਨੇ ਦਲੀਲਾਂ ਪੇਸ਼ ਕੀਤੀਆਂ। ਇਸ ਤੋਂ ਬਾਅਦ ਜੱਜ ਆਈ.ਡੀ.ਆਰ. ਕੈਮਰਨ ਨੇ ਧਾਰਾ 147, ਕ੍ਰਿਮਿਨਲ ਪ੍ਰੋਸੀਜਰ ਐਕਟ 2011 ਤਹਿਤ ਸਾਰੇ ਦੋਸ਼ ਰੱਦ ਕਰ ਦਿੱਤੇ।
ਪਛਾਣ ਪ੍ਰਕਿਰਿਆ ‘ਤੇ ਉੱਠੇ ਸਵਾਲ
ਅਦਾਲਤ ਵਿੱਚ ਸਾਹਮਣੇ ਆਇਆ ਕਿ ਦੋਵੇਂ ਸ਼ਿਕਾਇਤਕਰਤਾ ਘਟਨਾ ਤੋਂ ਪਹਿਲਾਂ ਗੁਰਵਿੰਦਰ ਸਿੰਘ ਬੈਂਸ ਨੂੰ ਨਹੀਂ ਜਾਣਦੇ ਸਨ। ਪੁਲਿਸ ਵੱਲੋਂ ਕਾਨੂੰਨੀ ਨਿਯਮਾਂ ਅਨੁਸਾਰ ਕੋਈ ਰਸਮੀ ਵਿਜ਼ੂਅਲ ਪਛਾਣ ਪ੍ਰਕਿਰਿਆ ਜਾਂ ਫੋਟੋ ਲਾਈਨ-ਅੱਪ ਨਹੀਂ ਕਰਵਾਇਆ ਗਿਆ। ਅਦਾਲਤ ਨੇ ਇਹ ਵੀ ਨੋਟ ਕੀਤਾ ਕਿ ਸ਼ਿਕਾਇਤਕਰਤਾਵਾਂ ਨੇ ਮੌਕੇ ‘ਤੇ ਬੈਂਸ ਦੀ ਪਛਾਣ ਨਹੀਂ ਕੀਤੀ ਸੀ। ਬਾਅਦ ਵਿੱਚ ਹੋਰ ਲੋਕਾਂ ਤੋਂ ਜਾਣਕਾਰੀ ਮਿਲਣ ਅਤੇ ਸੋਸ਼ਲ ਮੀਡੀਆ ‘ਤੇ ਤਸਵੀਰਾਂ ਦੇਖਣ ਤੋਂ ਬਾਅਦ ਉਨ੍ਹਾਂ ਨੇ ਬੈਂਸ ਦਾ ਨਾਮ ਲਿਆ। ਕਰਾਊਨ ਨੇ ਵੀ ਅਦਾਲਤ ਵਿੱਚ ਮੰਨਿਆ ਕਿ ਇਸ ਤਰ੍ਹਾਂ ਹੋਈ ਪਛਾਣ “ਦੂਸ਼ਿਤ (Contaminated)” ਹੋ ਚੁੱਕੀ ਸੀ ਅਤੇ ਇਸ ਨੂੰ ਭਰੋਸੇਯੋਗ ਸਬੂਤ ਨਹੀਂ ਮੰਨਿਆ ਜਾ ਸਕਦਾ।
ਅਦਾਲਤ ਨੇ ਕੀ ਕਿਹਾ?
ਜੱਜ ਕੈਮਰਨ ਨੇ ਆਪਣੇ ਫੈਸਲੇ ਵਿੱਚ ਕਿਹਾ ਕਿ ਭਵਿੱਖ ਵਿੱਚ ਵੀ ਕੋਈ ਨਵਾਂ ਅਤੇ ਭਰੋਸੇਯੋਗ ਪਛਾਣ ਸਬੂਤ ਸਾਹਮਣੇ ਆਉਣ ਦੀ ਸੰਭਾਵਨਾ ਬਹੁਤ ਘੱਟ ਹੈ। ਇਸ ਲਈ ਕੇਸ ਨੂੰ ਸਿਰਫ਼ ਵਾਪਸ ਲੈਣ ਦੀ ਬਜਾਏ ਪੂਰੀ ਤਰ੍ਹਾਂ ਖਾਰਜ ਕਰਨਾ ਉਚਿਤ ਹੈ। ਇਸ ਨਾਲ ਗੁਰਵਿੰਦਰ ਸਿੰਘ ਬੈਂਸ ਖ਼ਿਲਾਫ਼ ਚੱਲ ਰਹੀ ਅਦਾਲਤੀ ਕਾਰਵਾਈ ਦਾ ਅੰਤ ਹੋ ਗਿਆ।
ਭਾਈਚਾਰੇ ਨੇ ਕੀਤਾ ਫੈਸਲੇ ਦਾ ਸਵਾਗਤ
ਟੀ ਪੁੱਕੀ ਸਿੱਖ ਸੁਸਾਇਟੀ ਅਤੇ ਕਬੱਡੀ ਫੈਡਰੇਸ਼ਨ ਆਫ਼ ਨਿਊਜ਼ੀਲੈਂਡ ਦੇ ਨੁਮਾਇੰਦਿਆਂ ਨੇ ਅਦਾਲਤ ਦੇ ਫੈਸਲੇ ਦਾ ਸਵਾਗਤ ਕਰਦਿਆਂ ਕਿਹਾ ਕਿ ਬੈਂਸ ਨੂੰ ਬੇਵਜ੍ਹਾ ਇਸ ਮਾਮਲੇ ਵਿੱਚ ਘਸੀਟਿਆ ਗਿਆ ਸੀ। ਉਨ੍ਹਾਂ ਕਿਹਾ ਕਿ ਗੁਰਵਿੰਦਰ ਸਿੰਘ ਬੈਂਸ ਲੰਬੇ ਸਮੇਂ ਤੋਂ ਧਾਰਮਿਕ, ਸਮਾਜਿਕ ਅਤੇ ਚੈਰਿਟੀ ਕਾਰਜਾਂ ਨਾਲ ਜੁੜੇ ਹੋਏ ਹਨ ਅਤੇ ਭਾਈਚਾਰੇ ਵਿੱਚ ਇੱਕ ਸੇਵਾਭਾਵੀ ਵਿਅਕਤੀ ਵਜੋਂ ਜਾਣੇ ਜਾਂਦੇ ਹਨ।
ਬੇ ਆਫ਼ ਪਲੈਂਟੀ ਖੇਤਰ ਦੇ ਪ੍ਰਮੁੱਖ ਕੀਵੀਫਰੂਟ ਉਤਪਾਦਕ ਵਜੋਂ ਜਾਣੇ ਜਾਂਦੇ ਬੈਂਸ ਕਈ ਸਾਲਾਂ ਤੋਂ ਖੇਡਾਂ, ਧਾਰਮਿਕ ਸਮਾਗਮਾਂ ਅਤੇ ਸਮਾਜ ਸੇਵਾ ਵਿੱਚ ਸਰਗਰਮ ਭੂਮਿਕਾ ਨਿਭਾ ਰਹੇ ਹਨ। ਭਾਈਚਾਰੇ ਦੇ ਮੈਂਬਰਾਂ ਦਾ ਕਹਿਣਾ ਹੈ ਕਿ ਉਹ ਲੋੜਵੰਦਾਂ ਦੀ ਮਦਦ, ਖਿਡਾਰੀਆਂ ਨੂੰ ਆਰਥਿਕ ਸਹਾਇਤਾ ਅਤੇ ਸਮਾਜਿਕ ਭਲਾਈ ਦੇ ਕੰਮਾਂ ਵਿੱਚ ਹਮੇਸ਼ਾਂ ਅੱਗੇ ਰਹੇ ਹਨ।