ਵੈਲਿੰਗਟਨ: ਨਿਊਜ਼ੀਲੈਂਡ ਵਿੱਚ ਜੂਨ ਮਹੀਨੇ ਦੌਰਾਨ ਸਾਲਾਨਾ ਮਹਿੰਗਾਈ ਦਰ ਵੱਧ ਕੇ 4.1% ਹੋ ਗਈ ਹੈ, ਜੋ ਪਿਛਲੇ ਦੋ ਸਾਲਾਂ ਤੋਂ ਵੱਧ ਸਮੇਂ ਵਿੱਚ ਸਭ ਤੋਂ ਉੱਚਾ ਪੱਧਰ ਹੈ। ਇਸ ਵਾਧੇ ਦਾ ਸਭ ਤੋਂ ਵੱਡਾ ਕਾਰਨ ਮੱਧ ਪੂਰਬ ਵਿੱਚ ਚੱਲ ਰਹੇ ਸੰਘਰਸ਼ ਕਾਰਨ ਪੈਟਰੋਲ ਦੀਆਂ ਕੀਮਤਾਂ ਵਿੱਚ ਆਇਆ ਤੇਜ਼ ਉਛਾਲ ਹੈ। ਸਟੈਟਸ ਨਿਊਜ਼ੀਲੈਂਡ ਦੇ ਅੰਕੜਿਆਂ ਮੁਤਾਬਿਕ ਪੈਟਰੋਲ ਦੀਆਂ ਕੀਮਤਾਂ ਵਿੱਚ ਸਾਲਾਨਾ ਆਧਾਰ ‘ਤੇ 27.5% ਦਾ ਵਾਧਾ ਹੋਇਆ, ਜਿਸ ਨੇ ਕੁੱਲ ਮਹਿੰਗਾਈ ਵਿੱਚ ਲਗਭਗ 23.5% ਯੋਗਦਾਨ ਪਾਇਆ। ਇਸ ਤੋਂ ਇਲਾਵਾ, ਬਿਜਲੀ ਦੀਆਂ ਕੀਮਤਾਂ 12% ਵਧੀਆਂ, ਜਿਸ ਨਾਲ ਮਹਿੰਗਾਈ ਵਿੱਚ 8.4% ਦਾ ਯੋਗਦਾਨ ਰਿਹਾ, ਜਦਕਿ ਡੀਜ਼ਲ 71% ਮਹਿੰਗਾ ਹੋਇਆ ਅਤੇ ਇਸ ਦਾ ਯੋਗਦਾਨ 7.7% ਰਿਹਾ।
ਦੂਜੇ ਪਾਸੇ, ਕੁਝ ਖੇਤਰਾਂ ਵਿੱਚ ਕੀਮਤਾਂ ਵਿੱਚ ਕਮੀ ਵੀ ਦਰਜ ਕੀਤੀ ਗਈ। ਤੇਲ ਅਤੇ ਚਰਬੀ ਵਾਲੇ ਉਤਪਾਦਾਂ ਦੀਆਂ ਕੀਮਤਾਂ 9.1% ਘਟੀਆਂ, ਜਦਕਿ ਰੀਅਲ ਐਸਟੇਟ ਸੇਵਾਵਾਂ ਦੀਆਂ ਕੀਮਤਾਂ 4.6% ਘਟੀਆਂ। ਸਟੈਟਸ ਨਿਊਜ਼ੀਲੈਂਡ ਦੀ ਪ੍ਰਾਈਸਜ਼ ਐਂਡ ਡਿਫਲੇਟਰਜ਼ ਬੁਲਾਰੇ ਨਿਕੋਲਾ ਗਰੋਡਨ ਨੇ ਕਿਹਾ ਕਿ ਪੈਟਰੋਲ ਦੀਆਂ ਵਧੀਆਂ ਕੀਮਤਾਂ ਨੇ ਸਾਲਾਨਾ ਮਹਿੰਗਾਈ ਵਿੱਚ ਲਗਭਗ ਇੱਕ ਚੌਥਾਈ ਹਿੱਸਾ ਪਾਇਆ ਹੈ।
ਵਿੱਤ ਮੰਤਰੀ ਨਿਕੋਲਾ ਵਿਲਿਸ ਨੇ ਕੀ ਕਿਹਾ?
ਨਿਊਜ਼ੀਲੈਂਡ ਦੀ ਵਿੱਤ ਮੰਤਰੀ ਨਿਕੋਲਾ ਵਿਲਿਸ ਨੇ ਕਿਹਾ ਕਿ ਜੇ ਪੈਟਰੋਲ ਅਤੇ ਡੀਜ਼ਲ ਦੀਆਂ ਕੀਮਤਾਂ ਵਿੱਚ ਵਾਧਾ ਨਾ ਹੁੰਦਾ ਤਾਂ ਸਾਲਾਨਾ ਮਹਿੰਗਾਈ ਦਰ 2.9% ਰਹਿੰਦੀ, ਜੋ ਸਰਕਾਰ ਦੇ ਨਿਸ਼ਾਨੇ ਵਾਲੀ ਹੱਦ ਵਿੱਚ ਸੀ।
ਉਨ੍ਹਾਂ ਕਿਹਾ ਕਿ ਇਸ ਰਿਪੋਰਟ ਵਿੱਚ ਕੁਝ ਹੌਸਲਾਅਫਜ਼ਾ ਅੰਕੜੇ ਵੀ ਹਨ। ਖਾਦ ਪਦਾਰਥਾਂ ਦੀ ਮਹਿੰਗਾਈ 4% ਤੋਂ ਘਟ ਕੇ 2.8% ਰਹਿ ਗਈ ਹੈ, ਜਦਕਿ ਸਾਲਾਨਾ ਕਿਰਾਏ ਵਿੱਚ ਵਾਧਾ ਸਿਰਫ਼ 0.5% ਰਿਹਾ, ਜੋ ਕਰੀਬ 25 ਸਾਲਾਂ ਵਿੱਚ ਸਭ ਤੋਂ ਘੱਟ ਹੈ।
ਵਿਲਿਸ ਨੇ ਕਿਹਾ ਕਿ ਇਹ ਅੰਕੜੇ ਦਰਸਾਉਂਦੇ ਹਨ ਕਿ ਸਰਕਾਰ ਨੂੰ ਵਿੱਤੀ ਅਨੁਸ਼ਾਸਨ ਜਾਰੀ ਰੱਖਣ ਦੀ ਲੋੜ ਹੈ। ਉਨ੍ਹਾਂ ਇਹ ਵੀ ਕਿਹਾ ਕਿ ਜਦੋਂ ਡੋਨਾਲਡ ਟਰੰਪ ਅਮਰੀਕਾ ਦੇ ਰਾਸ਼ਟਰਪਤੀ ਹਨ, ਤਾਂ ਭਵਿੱਖ ਦੀਆਂ ਆਰਥਿਕ ਸਥਿਤੀਆਂ ਦਾ ਸਹੀ ਅੰਦਾਜ਼ਾ ਲਗਾਉਣਾ ਮੁਸ਼ਕਿਲ ਹੈ।
ਲੇਬਰ ਪਾਰਟੀ ਦਾ ਸਰਕਾਰ ‘ਤੇ ਹਮਲਾ
ਲੇਬਰ ਪਾਰਟੀ ਦੀ ਵਿੱਤ ਅਤੇ ਅਰਥਵਿਵਸਥਾ ਬੁਲਾਰੇ ਬਾਰਬਰਾ ਐਡਮੰਡਜ਼ ਨੇ ਪ੍ਰਧਾਨ ਮੰਤਰੀ ਕ੍ਰਿਸਟੋਫਰ ਲਕਸਨ ‘ਤੇ ਨਿਸ਼ਾਨਾ ਸਾਧਦਿਆਂ ਕਿਹਾ ਕਿ ਉਨ੍ਹਾਂ ਨੇ ਮਹਿੰਗਾਈ ਅਤੇ ਜੀਵਨ-ਯਾਪਨ ਦੀ ਲਾਗਤ ਘਟਾਉਣ ਦਾ ਵਾਅਦਾ ਕੀਤਾ ਸੀ, ਪਰ ਹਾਲਾਤ ਹੋਰ ਵੀ ਖਰਾਬ ਹੋ ਗਏ ਹਨ।
ਉਨ੍ਹਾਂ ਕਿਹਾ ਕਿ ਹੁਣ ਮਹਿੰਗਾਈ ਦਰ 4.1% ‘ਤੇ ਪਹੁੰਚ ਗਈ ਹੈ ਅਤੇ ਆਮ ਲੋਕਾਂ ਲਈ ਰੋਜ਼ਾਨਾ ਦੀਆਂ ਜ਼ਰੂਰੀ ਚੀਜ਼ਾਂ ਖਰੀਦਣਾ ਹੋਰ ਮਹਿੰਗਾ ਹੋ ਗਿਆ ਹੈ। ਦੁੱਧ, ਰੋਟੀ ਅਤੇ ਮਿੰਸ ਵਰਗੀਆਂ ਖਾਦ ਵਸਤੂਆਂ ਦੀਆਂ ਕੀਮਤਾਂ ਵਧੀਆਂ ਹਨ, ਜਦਕਿ ਤਨਖ਼ਾਹਾਂ ਉਸੇ ਰਫ਼ਤਾਰ ਨਾਲ ਨਹੀਂ ਵਧ ਰਹੀਆਂ।
ਹੋਰ ਦੇਸ਼ਾਂ ਨਾਲ ਤੁਲਨਾ
ਸਟੈਟਸ ਨਿਊਜ਼ੀਲੈਂਡ ਮੁਤਾਬਕ ਨਿਊਜ਼ੀਲੈਂਡ ਦੀ ਮਹਿੰਗਾਈ ਦਰ ਆਸਟ੍ਰੇਲੀਆ, ਯੂਕੇ, ਅਮਰੀਕਾ ਅਤੇ ਯੂਰਪੀ ਯੂਨੀਅਨ ਨਾਲੋਂ ਵੱਧ ਰਹੀ, ਹਾਲਾਂਕਿ ਇਹ ਓਈਸੀਡੀ (OECD) ਦੀ ਔਸਤ 4.6% ਤੋਂ ਹੇਠਾਂ ਹੈ।