ਨਿਊਜ਼ੀਲੈਂਡ ਦੀ ਲੇਬਰ ਪਾਰਟੀ ਨੇ ਚੋਣਾਂ ਤੋਂ ਪਹਿਲਾਂ ਇੱਕ ਵੱਡਾ ਸਿਹਤ ਸੰਬੰਧੀ ਵਾਅਦਾ ਕੀਤਾ ਹੈ। ਪਾਰਟੀ ਨੇ ਐਲਾਨ ਕੀਤਾ ਹੈ ਕਿ ਜੇਕਰ ਉਹ ਸੱਤਾ ਵਿੱਚ ਆਉਂਦੀ ਹੈ ਤਾਂ ਜੁਲਾਈ 2028 ਤੋਂ ਗਰਭਵਤੀ ਮਹਿਲਾਵਾਂ ਲਈ ਡਾਕਟਰ ਜਾਂ ਦਾਈ (ਮਿਡਵਾਈਫ਼) ਵੱਲੋਂ ਸਿਫ਼ਾਰਸ਼ ਕੀਤੇ ਗਏ ਸਾਰੇ ਜ਼ਰੂਰੀ ਮੈਟਰਨਿਟੀ ਸਕੈਨ ਮੁਫ਼ਤ ਕਰ ਦਿੱਤੇ ਜਾਣਗੇ। ਇਹ ਸੁਵਿਧਾ ਲੇਬਰ ਪਾਰਟੀ ਦੀ ਪ੍ਰਸਤਾਵਿਤ ‘ਮੇਡੀਕਾਰਡ’ (Medicard) ਯੋਜਨਾ ਦੇ ਤਹਿਤ ਦਿੱਤੀ ਜਾਵੇਗੀ। ਨਵੀਂ ਨੀਤੀ ਅਨੁਸਾਰ ਗਰਭ ਅਵਸਥਾ ਦੌਰਾਨ ਲੋੜੀਂਦੇ ਸਕੈਨਾਂ ਦੀ ਗਿਣਤੀ ‘ਤੇ ਕੋਈ ਸੀਮਾ ਨਹੀਂ ਹੋਵੇਗੀ ਅਤੇ ਹਰ ਮੈਡੀਕਲ ਤੌਰ ‘ਤੇ ਜ਼ਰੂਰੀ ਸਕੈਨ ਦਾ ਖਰਚਾ ਸਰਕਾਰ ਵੱਲੋਂ ਭਰਿਆ ਜਾਵੇਗਾ।
ਲੇਬਰ ਪਾਰਟੀ ਦੇ ਨੇਤਾ ਕ੍ਰਿਸ ਹਿਪਕਿਨਜ਼ ਨੇ ਕਿਹਾ ਕਿ ਮਹਿਲਾਵਾਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਨੂੰ ਆਪਣੇ ਅਤੇ ਆਪਣੇ ਬੱਚੇ ਦੀ ਸਿਹਤ ਬਾਰੇ ਚਿੰਤਾ ਕਰਦੇ ਸਮੇਂ ਪੈਸਿਆਂ ਦੀ ਫਿਕਰ ਨਹੀਂ ਹੋਣੀ ਚਾਹੀਦੀ। ਉਨ੍ਹਾਂ ਕਿਹਾ ਕਿ ਗਰਭ ਅਵਸਥਾ ਪਹਿਲਾਂ ਹੀ ਕਾਫ਼ੀ ਖਰਚਿਆਂ ਅਤੇ ਤਣਾਅ ਨਾਲ ਭਰੀ ਹੁੰਦੀ ਹੈ, ਇਸ ਲਈ ਸਰਕਾਰ ਦਾ ਫਰਜ਼ ਹੈ ਕਿ ਪਰਿਵਾਰਾਂ ‘ਤੇ ਇਹ ਵਾਧੂ ਬੋਝ ਘਟਾਇਆ ਜਾਵੇ। ਉਨ੍ਹਾਂ ਦੇ ਅਨੁਸਾਰ, ਮੌਜੂਦਾ ਸਮੇਂ ਵਿੱਚ ਕੁਝ ਖੇਤਰਾਂ ਵਿੱਚ ਇੱਕ ਮੈਟਰਨਿਟੀ ਸਕੈਨ ਲਈ 90 ਡਾਲਰ ਤੱਕ ਭੁਗਤਾਨ ਕਰਨਾ ਪੈਂਦਾ ਹੈ, ਪਰ ਲੇਬਰ ਸਰਕਾਰ ਹੇਠ ਇਹ ਸੇਵਾ ਦੇਸ਼ ਭਰ ਵਿੱਚ ਪੂਰੀ ਤਰ੍ਹਾਂ ਮੁਫ਼ਤ ਹੋਵੇਗੀ।
ਮੌਜੂਦਾ ਪ੍ਰਣਾਲੀ ਅਧੀਨ ਟੈਰਾਵਹੀਤੀ, ਨੇਲਸਨ ਅਤੇ ਵੈਸਟ ਕੋਸਟ ਵਰਗੇ ਖੇਤਰਾਂ ਵਿੱਚ ਸਕੈਨ ਮੁਫ਼ਤ ਹਨ, ਜਦਕਿ ਆਕਲੈਂਡ, ਕੈਂਟਰਬਰੀ ਅਤੇ ਵਾਈਕਾਟੋ ਸਮੇਤ ਕਈ ਇਲਾਕਿਆਂ ਵਿੱਚ ਕਮਿਊਨਿਟੀ ਸਰਵਿਸ ਕਾਰਡ ਧਾਰਕਾਂ ਲਈ 30 ਡਾਲਰ ਅਤੇ ਹੋਰ ਲੋਕਾਂ ਲਈ 90 ਡਾਲਰ ਤੱਕ ਫੀਸ ਲੱਗਦੀ ਹੈ। ਲੇਬਰ ਪਾਰਟੀ ਵੱਲੋਂ ਜਾਰੀ ਤੱਥ-ਪੱਤਰ ਅਨੁਸਾਰ, ਆਮ ਗਰਭ ਅਵਸਥਾ ਦੌਰਾਨ ਦੋ ਰੁਟੀਨ ਸਕੈਨ ਕਰਵਾਉਣ ਵਾਲੇ ਪਰਿਵਾਰ 180 ਡਾਲਰ ਤੱਕ ਦੀ ਬਚਤ ਕਰ ਸਕਣਗੇ, ਜਦਕਿ ਪੰਜ ਸਕੈਨਾਂ ਦੀ ਲੋੜ ਪੈਣ ਵਾਲੇ ਵਿਅਕਤੀ ਨੂੰ ਮੌਜੂਦਾ ਪ੍ਰਣਾਲੀ ਅਨੁਸਾਰ 450 ਡਾਲਰ ਤੱਕ ਖਰਚਣਾ ਪੈ ਸਕਦਾ ਹੈ।
ਪਾਰਟੀ ਦੀ ਸਿਹਤ ਬੁਲਾਰਾ ਆਏਸ਼ਾ ਵੈਰਾਲ ਨੇ ਕਿਹਾ ਕਿ ਸਕੈਨਾਂ ਰਾਹੀਂ ਸਮੱਸਿਆਵਾਂ ਦਾ ਸਮੇਂ ਸਿਰ ਪਤਾ ਲੱਗ ਜਾਂਦਾ ਹੈ, ਜਿਸ ਨਾਲ ਪਰਿਵਾਰਾਂ ਨੂੰ ਜਨਮ ਲਈ ਤਿਆਰੀ ਕਰਨ ਵਿੱਚ ਮਦਦ ਮਿਲਦੀ ਹੈ ਅਤੇ ਕਈ ਵਾਰ ਜਾਨਾਂ ਵੀ ਬਚਾਈਆਂ ਜਾ ਸਕਦੀਆਂ ਹਨ। ਲੇਬਰ ਪਾਰਟੀ ਮੁਤਾਬਿਕ ਇਸ ਯੋਜਨਾ ‘ਤੇ ਹਰ ਸਾਲ ਕਰੀਬ 28.6 ਮਿਲੀਅਨ ਡਾਲਰ ਦਾ ਖਰਚ ਆਵੇਗਾ। ਪਾਰਟੀ ਦਾ ਕਹਿਣਾ ਹੈ ਕਿ ਇਹ ਰਕਮ ਉਸਦੇ ਪ੍ਰਸਤਾਵਿਤ ਕੈਪੀਟਲ ਗੇਨਜ਼ ਟੈਕਸ ਰਾਹੀਂ ਇਕੱਠੀ ਕੀਤੀ ਜਾ ਸਕਦੀ ਹੈ।
ਇਸ ਦੇ ਨਾਲ ਹੀ ਹੈਲਥ ਨਿਊਜ਼ੀਲੈਂਡ ਵਿੱਚ ਮੰਗ ਨੂੰ ਪੂਰਾ ਕਰਨ ਲਈ 24 ਵਾਧੂ ਤਨਖ਼ਾਹਦਾਰ ਟ੍ਰੇਨੀ ਸੋਨੋਗ੍ਰਾਫ਼ਰ ਅਸਾਮੀਆਂ ਲਈ ਸਾਲਾਨਾ ਤਿੰਨ ਮਿਲੀਅਨ ਡਾਲਰ ਤੋਂ ਘੱਟ ਦੀ ਵਾਧੂ ਫੰਡਿੰਗ ਵੀ ਦਿੱਤੀ ਜਾਵੇਗੀ। ਲੇਬਰ ਪਾਰਟੀ ਪਹਿਲਾਂ ਹੀ ਆਪਣੇ ਮੇਡੀਕਾਰਡ ਤਹਿਤ ਹਰ ਸਾਲ ਤਿੰਨ ਮੁਫ਼ਤ ਡਾਕਟਰੀ ਮੁਲਾਕਾਤਾਂ ਅਤੇ 25 ਤੋਂ 69 ਸਾਲ ਦੀ ਉਮਰ ਦੇ ਲੋਕਾਂ ਲਈ ਮੁਫ਼ਤ ਸਰਵਾਈਕਲ ਸਕ੍ਰੀਨਿੰਗ ਦਾ ਵਾਅਦਾ ਕਰ ਚੁੱਕੀ ਹੈ।
ਹੈਲਥ ਨਿਊਜ਼ੀਲੈਂਡ ਦੇ ਅੰਕੜਿਆਂ ਮੁਤਾਬਕ, ਸਾਲ 2024 ਦੌਰਾਨ ਦੇਸ਼ ਵਿੱਚ ਲਗਭਗ 2.7 ਲੱਖ ਮੈਟਰਨਿਟੀ ਸਕੈਨ ਕੀਤੇ ਗਏ ਸਨ। ਲੇਬਰ ਪਾਰਟੀ ਦੀ ਯੋਜਨਾ ਅਨੁਸਾਰ 1 ਜੁਲਾਈ 2027 ਤੋਂ ਬਾਅਦ ਵਪਾਰਕ ਅਤੇ ਰਿਹਾਇਸ਼ੀ ਜਾਇਦਾਦਾਂ ਦੀ ਵਿਕਰੀ ਤੋਂ ਹੋਣ ਵਾਲੇ ਮੁਨਾਫ਼ੇ ‘ਤੇ 28 ਫੀਸਦੀ ਕੈਪੀਟਲ ਗੇਨਜ਼ ਟੈਕਸ ਲਾਗੂ ਕੀਤਾ ਜਾਵੇਗਾ। ਹਾਲਾਂਕਿ ਪਰਿਵਾਰਕ ਘਰ, ਖੇਤ, ਕੀਵੀਸੇਵਰ, ਸ਼ੇਅਰ, ਕਾਰੋਬਾਰੀ ਸੰਪਤੀਆਂ ਅਤੇ ਵਿਰਾਸਤ ਵਿੱਚ ਮਿਲੀ ਸੰਪਤੀ ਨੂੰ ਇਸ ਤੋਂ ਬਾਹਰ ਰੱਖਿਆ ਜਾਵੇਗਾ। ਪਾਰਟੀ ਦਾ ਦਾਅਵਾ ਹੈ ਕਿ ਇਸ ਟੈਕਸ ਰਾਹੀਂ ਔਸਤਨ 700 ਮਿਲੀਅਨ ਡਾਲਰ ਸਾਲਾਨਾ ਆਮਦਨ ਹੋ ਸਕਦੀ ਹੈ, ਜਿਸ ਨਾਲ ਅਜਿਹੀਆਂ ਸਮਾਜਿਕ ਅਤੇ ਸਿਹਤ ਯੋਜਨਾਵਾਂ ਨੂੰ ਫੰਡ ਕੀਤਾ ਜਾ ਸਕੇਗਾ।