ਨਿਊਜ਼ੀਲੈਂਡ ਦੇ Mackenzie District ਦੇ ਮੇਅਰ Scott Aronson ਨੇ New Zealand Transport Agency ਵੱਲੋਂ State Highway 8 ‘ਤੇ ਲਗਾਏ ਗਏ ਨਵੇਂ ਸਪੀਡ ਕੈਮਰਿਆਂ ਨੂੰ ਲੈ ਕੇ ਤਿੱਖੀ ਪ੍ਰਤੀਕਿਰਿਆ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਕੈਮਰੇ ਸੜਕ ਸੁਰੱਖਿਆ ਨਾਲੋਂ ਵੱਧ ਜੁਰਮਾਨਿਆਂ ਰਾਹੀਂ ਪੈਸਾ ਇਕੱਠਾ ਕਰਨ ਦਾ ਜਰੀਆ ਬਣ ਰਹੇ ਹਨ।
ਮੇਅਰ ਦਾ ਕਹਿਣਾ ਹੈ ਕਿ Lake Tekapo ਅਤੇ Twizel ਦਰਮਿਆਨ ਹਾਦਸਿਆਂ ਦਾ ਮੁੱਖ ਕਾਰਨ ਤੇਜ਼ ਰਫ਼ਤਾਰ ਨਹੀਂ, ਸਗੋਂ ਸੜਕਾਂ ਦੀਆਂ ਹੋਰ ਕਮੀਆਂ ਹਨ। ਉਨ੍ਹਾਂ ਮੁਤਾਬਿਕ ਇਸ ਖੇਤਰ ਵਿੱਚ ਵਧੀਆ Passing Bays, Rest Stops, ਸੁਰੱਖਿਅਤ ਚੌਰਾਹੇ ਅਤੇ ਸਪੱਸ਼ਟ ਸਾਈਨ ਬੋਰਡਾਂ ਦੀ ਘਾਟ ਹੈ, ਜਿਸ ਕਾਰਨ ਡਰਾਈਵਰਾਂ ਨੂੰ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ।
Scott Aronson ਨੇ ਕਿਹਾ ਕਿ ਸਿਰਫ਼ ਕੈਮਰੇ ਲਗਾ ਕੇ ਸੜਕ ਹਾਦਸਿਆਂ ਨੂੰ ਨਹੀਂ ਰੋਕਿਆ ਜਾ ਸਕਦਾ। ਉਨ੍ਹਾਂ ਨੇ ਸਰਕਾਰ ਨੂੰ ਬੁਨਿਆਦੀ ਢਾਂਚੇ ਵਿੱਚ ਸੁਧਾਰ ਕਰਨ ਦੀ ਅਪੀਲ ਕੀਤੀ ਹੈ।
ਦੂਜੇ ਪਾਸੇ New Zealand Transport Agency ਨੇ ਕੈਮਰਿਆਂ ਦਾ ਬਚਾਅ ਕਰਦਿਆਂ ਕਿਹਾ ਕਿ ਇਹ ਥਾਵਾਂ ਸਪੀਡ ਡਾਟਾ ਅਤੇ ਹਾਦਸਿਆਂ ਦੇ ਖਤਰੇ ਨੂੰ ਧਿਆਨ ਵਿੱਚ ਰੱਖ ਕੇ ਚੁਣੀਆਂ ਗਈਆਂ ਹਨ। ਏਜੰਸੀ ਮੁਤਾਬਕ Tekapo-Twizel ਰੂਟ ‘ਤੇ ਕੇਵਲ 81 ਫੀਸਦੀ ਡਰਾਈਵਰ ਹੀ ਨਿਰਧਾਰਤ ਗਤੀ ਸੀਮਾ ਦੀ ਪਾਲਣਾ ਕਰ ਰਹੇ ਸਨ।
NZTA ਦੇ ਡਰਾਈਵਿੰਗ ਰੈਗੂਲੇਸ਼ਨ ਮੁਖੀ Chris Rodley ਨੇ ਕਿਹਾ ਕਿ ਸਪੀਡ ਕੈਮਰਿਆਂ ਨਾਲ ਹਾਦਸਿਆਂ ਵਿੱਚ ਕਮੀ ਆਉਂਦੀ ਹੈ ਅਤੇ ਲੋਕ ਨਿਯਮਾਂ ਦੀ ਵੱਧ ਪਾਲਣਾ ਕਰਦੇ ਹਨ। ਉਨ੍ਹਾਂ ਦੱਸਿਆ ਕਿ Auckland ਵਿੱਚ ਕੈਮਰੇ ਲੱਗਣ ਤੋਂ ਬਾਅਦ ਸਪੀਡ ਸੀਮਾ ਦੀ ਪਾਲਣਾ ਕਰਨ ਵਾਲੇ ਡਰਾਈਵਰਾਂ ਦੀ ਗਿਣਤੀ 88 ਫੀਸਦੀ ਤੋਂ ਵੱਧ ਕੇ 99 ਫੀਸਦੀ ਤੱਕ ਪਹੁੰਚ ਗਈ ਹੈ।
ਇਸ ਮਾਮਲੇ ਨੂੰ ਲੈ ਕੇ ਹੁਣ ਸਥਾਨਕ ਪ੍ਰਸ਼ਾਸਨ ਅਤੇ NZTA ਵਿਚਾਲੇ ਚਰਚਾ ਤੇਜ਼ ਹੋ ਗਈ ਹੈ ਕਿ ਸਪੀਡ ਕੈਮਰੇ ਸੜਕ ਸੁਰੱਖਿਆ ਲਈ ਹਨ ਜਾਂ ਸਰਕਾਰੀ ਆਮਦਨ ਵਧਾਉਣ ਦਾ ਸਾਧਨ।