ਨਿਊਜ਼ੀਲੈਂਡ ਦੇ Port of Tauranga ’ਤੇ ਕਸਟਮ ਅਧਿਕਾਰੀਆਂ ਵੱਲੋਂ ਵੱਡੀ ਕਾਰਵਾਈ ਕਰਦਿਆਂ ਲਗਭਗ 50 ਕਿੱਲੋ ਕੋਕੀਨ ਜ਼ਬਤ ਕੀਤੀ ਗਈ ਹੈ, ਜਿਸਦੀ ਕੀਮਤ ਤਕਰੀਬਨ 16.8 ਮਿਲੀਅਨ ਡਾਲਰ ਦੱਸੀ ਜਾ ਰਹੀ ਹੈ। ਕਸਟਮ ਵਿਭਾਗ ਮੁਤਾਬਕ ਇਹ ਕੋਕੀਨ ਇੱਕ ਰਿਫ੍ਰਿਜਰੇਟਡ ਕੰਟੇਨਰ ਦੀ ਛੱਤ ਵਾਲੀ ਲਾਈਨਿੰਗ ਵਿੱਚ ਲੁਕਾਈ ਹੋਈ ਸੀ। ਇਹ ਕੰਟੇਨਰ ਪਨਾਮਾ ਦੇ Balboa ਤੋਂ ਕਾਨੂੰਨੀ ਸਮਾਨ ਨਾਲ ਨਿਊਜ਼ੀਲੈਂਡ ਪਹੁੰਚਿਆ ਸੀ, ਜਿਸਦੀ ਜਾਂਚ ਦੌਰਾਨ ਇਹ ਖੁਲਾਸਾ ਹੋਇਆ।
ਅਧਿਕਾਰੀਆਂ ਨੇ ਦੱਸਿਆ ਕਿ ਕੁੱਲ 48 ਕਿੱਲੋ ਕਲਾਸ ਏ ਡਰੱਗ ਕੰਟੇਨਰ ਦੀ ਇੰਸੂਲੇਟਿਡ ਛੱਤ ਦੀ ਲਾਈਨਿੰਗ ਵਿੱਚ ਲੁਕਾਈ ਗਈ ਸੀ। ਇਹ ਤਰੀਕਾ ਆਮ “ਰਿਪ-ਆਨ, ਰਿਪ-ਆਫ” ਮੈਥਡ ਤੋਂ ਵੱਖਰਾ ਸੀ, ਜਿਸ ਵਿੱਚ ਨਸ਼ਾ ਸਿੱਧਾ ਸਮਾਨ ਵਿੱਚ ਲੁਕਾਇਆ ਜਾਂਦਾ ਹੈ। ਇਸ ਮਾਮਲੇ ਵਿੱਚ ਡਰੱਗਜ਼ ਕੰਟੇਨਰ ਦੀ ਅੰਦਰਲੀ ਛੱਤ ਅਤੇ ਉੱਪਰੀ ਹਿੱਸੇ ਦੇ ਵਿਚਕਾਰ ਲੁਕਾਈ ਗਈ ਸੀ।
ਕਸਟਮ ਦੇ ਮੈਰੀਟਾਈਮ ਗਰੁੱਪ ਮੈਨੇਜਰ Paul Campbell ਨੇ ਕਿਹਾ ਕਿ ਅੰਤਰਰਾਸ਼ਟਰੀ ਅਪਰਾਧੀ ਗਿਰੋਹ ਨਸ਼ਾ ਤਸਕਰੀ ਲਈ ਹੋਰ ਵੀ ਜ਼ਿਆਦਾ ਪੇਚੀਦਾ ਤਰੀਕੇ ਅਪਣਾ ਰਹੇ ਹਨ। ਉਨ੍ਹਾਂ ਕਿਹਾ, “ਇਹ ਤਰੀਕਾ ਦੱਸਦਾ ਹੈ ਕਿ ਅਪਰਾਧੀ ਗਰੁੱਪ ਸਪਲਾਈ ਚੇਨ ਦਾ ਫਾਇਦਾ ਚੁੱਕਦਿਆਂ ਨਸ਼ਾ ਤਸਕਰੀ ਲਈ ਕਿੰਨੇ ਹੱਦ ਤੱਕ ਜਾ ਰਹੇ ਹਨ। ਇਸ ਨਾਲ ਸਾਨੂੰ ਆਪਣੀਆਂ ਤਕਨੀਕਾਂ ਨੂੰ ਲਗਾਤਾਰ ਅਪਡੇਟ ਕਰਨ ਦੀ ਲੋੜ ਹੈ।”
ਕਸਟਮ ਵਿਭਾਗ ਨੇ ਕਿਹਾ ਕਿ ਉਹ ਸਮੁੰਦਰੀ ਸਰਹੱਦਾਂ ’ਤੇ ਆਪਣੀ ਨਿਗਰਾਨੀ ਹੋਰ ਮਜ਼ਬੂਤ ਕਰਦੇ ਰਹਿਣਗੇ ਅਤੇ ਨਿਊਜ਼ੀਲੈਂਡ ਦੇ ਬੰਦਰਗਾਹਾਂ ਨੂੰ ਅਪਰਾਧੀ ਗਿਰੋਹਾਂ ਲਈ ਅਸੁਰੱਖਿਅਤ ਬਣਾਉਣ ਲਈ ਵਚਨਬੱਧ ਹਨ। ਉਦਯੋਗ ਨਾਲ ਜੁੜੇ ਕਰਮਚਾਰੀਆਂ ਅਤੇ ਆਮ ਲੋਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਉਹ ਸਚੇਤ ਰਹਿਣ ਅਤੇ ਕਿਸੇ ਵੀ ਸ਼ੱਕੀ ਗਤੀਵਿਧੀ ਬਾਰੇ ਤੁਰੰਤ ਸੂਚਨਾ ਦੇਣ। ਨਸ਼ਾ ਤਸਕਰੀ ਸਬੰਧੀ ਜਾਣਕਾਰੀ 0800 WE PROTECT (0800 937 768) ’ਤੇ ਗੁਪਤ ਤੌਰ ’ਤੇ ਜਾਂ Crimestoppers ’ਤੇ 0800 555 111 ’ਤੇ ਅਨਾਮੀ ਤੌਰ ’ਤੇ ਦਿੱਤੀ ਜਾ ਸਕਦੀ ਹੈ।