ਬੁਹਚਰਚਿਤ “ਹਨੀ ਬੀਅਰ” ਮਾਮਲੇ ‘ਚ ਦੋ ਸਾਲਾਂ ਦੀ ਜਾਂਚ ਤੋਂ ਬਾਅਦ ਕ੍ਰਿਮੀਨਲ ਪ੍ਰੋਸੀਡਜ਼ (ਰਿਕਵਰੀ) ਐਕਟ 2009 ਦੇ ਤਹਿਤ ਪੁਲਿਸ ਨੇ 36 ਮਿਲੀਅਨ ਡਾਲਰ ਦੀਆਂ ਚਾਰ ਆਕਲੈਂਡ ਜਾਇਦਾਦਾਂ ਜ਼ਬਤ ਕੀਤੀਆਂ ਹਨ। ਪੁਲਿਸ ਨੇ “ਹਨੀ ਬੀਅਰ” ਵਿੱਚ ਮੈਥਾਮਫੈਟਾਮੀਨ ਮਿਲਣ ਕਾਰਨ ਹੋਈ ਨੌਜਵਾਨ ਦੀ ਮੌਤ ਮਾਮਲੇ ‘ਚ ਇਹ ਵੱਡੀ ਕਾਰਵਾਈ ਕੀਤੀ ਹੈ। ਇਸ ਹਫ਼ਤੇ, ਪੁਲਿਸ ਕਮਿਸ਼ਨਰ ਨੇ ਹਨੀ ਬੀਅਰ ਮੈਥਾਮਫੇਟਾਮਾਈਨ-ਲੇਸਡ ਬੀਅਰ ਕਤਲੇਆਮ ਅਤੇ ਨਸ਼ੀਲੇ ਪਦਾਰਥਾਂ ਦੀ ਦਰਾਮਦ ਜਾਂਚ, ਜਿਸਨੂੰ ਆਪ੍ਰੇਸ਼ਨ ਲੈਵੈਂਡਰ ਵੀ ਕਿਹਾ ਜਾਂਦਾ ਹੈ, ਨਾਲ ਜੁੜੇ ਪੰਜ ਲੋਕਾਂ ਅਤੇ ਇੱਕ ਕੰਪਨੀ ਦੇ ਖਿਲਾਫ ਐਕਟ ਦੇ ਅਨੁਸਾਰ ਸਿਵਲ ਕਾਰਵਾਈ ਸ਼ੁਰੂ ਕੀਤੀ ਹੈ। ਦੱਸ ਦੇਈਏ ਇਹੀ ਮਾਮਲਾ ਸੀ ਜਦੋਂ 7 ਮਾਰਚ 2023 ਨੂੰ ਫੋਂਟੇਰਾ ਦੇ 21 ਸਾਲਾ ਕਰਮਚਾਰੀ ਐਡਨ ਸਾਗਾਲਾ ਦੀ ਮੌਤ ਹੋ ਗਈ ਸੀ, ਜਦੋਂ ਉਸਨੇ ਗਲਤੀ ਨਾਲ “ਹਨੀ ਬੀਅਰ ਹਾਊਸ ਬੀਅਰ” ਦਾ ਕੈਨ ਪੀ ਲਿਆ ਸੀ ਜਿਸ ਵਿੱਚ ਨਸ਼ੀਲਾ ਪਦਾਰਥ ਮਿਲਿਆ ਹੋਇਆ ਸੀ।
ਫਾਇਨੈਂਸ਼ਲ ਕਰਾਈਮ ਗਰੁੱਪ ਦੇ ਡਿਟੈਕਟਿਵ ਇੰਸਪੈਕਟਰ ਕ੍ਰਿਸ ਐਲਨਜ਼ ਨੇ ਦੱਸਿਆ ਕਿ ਮੌਤ ਤੋਂ ਬਾਅਦ ਹੋਈ ਜਾਂਚ ਵਿੱਚ ਇੱਕ ਗੁਪਤ ਲੈਬ ਅਤੇ ਸੈਂਕੜਿਆਂ ਕਿਲੋ ਮੈਥ ਦੀਆਂ ਖੇਪਾਂ ਦਾ ਪਤਾ ਲੱਗਾ। ਪੁਲਿਸ ਵੱਲੋਂ ਹੁਣ ਤੱਕ 4 ਇਲਾਕਿਆਂ — ਵਿਟਫੋਰਡ, ਟੋਟਰਾ ਹਾਈਟਸ, ਕਰਾਕਾ ਅਤੇ ਬੌਂਬੇ — ‘ਚ ਸਬੰਧਿਤ ਜਾਇਦਾਦਾਂ ਸੀਜ਼ ਕੀਤੀ ਗਈਆਂ ਹਨ। ਜਾਂਚ ਦੌਰਾਨ ਪੁਲਿਸ ਨੇ 700 ਕਿਲੋਗ੍ਰਾਮ ਤੋਂ ਵੱਧ ਮੈਥਾਮਫੈਟਾਮੀਨ ਜ਼ਬਤ ਕੀਤੀ — ਜੋ ਨਿਊਜ਼ੀਲੈਂਡ ਦੇ ਇਤਿਹਾਸ ਦਾ ਸਭ ਤੋਂ ਵੱਡਾ ਇਕ-ਵਾਰ ਦਾ ਜ਼ਬਤੀ ਮਾਮਲਾ ਹੈ। 42 ਸਾਲਾ ਹਿੰਮਤਜੀਤ ਸਿੰਘ ਕਾਹਲੋਂ ਨੂੰ ਮੈਥਾਮਫੇਟਾਮਾਈਨ ਦੀ ਸਪਲਾਈ ਲਈ ਕਤਲ ਅਤੇ ਕਬਜ਼ੇ ਦੇ ਦੋਸ਼ ਵਿੱਚ 21 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ। ਜਦਕਿ ਇੱਕ ਹੋਰ ਦੋਸ਼ੀ ਜਿਸਦੀ ਪਹਿਚਾਣ ‘ਤੇ ਪਾਬੰਦੀ ਹੈ, ਨੂੰ 22 ਸਾਲ ਦੀ ਕੈਦ ਹੋਈ ਹੈ। ਪੁਲਿਸ ਦਾ ਕਹਿਣਾ ਹੈ ਕਿ ਮਾਮਲਾ ਅਦਾਲਤ ਵਿੱਚ ਹੋਣ ਕਾਰਨ ਹੁਣ ਵਧੇਰੇ ਟਿੱਪਣੀ ਨਹੀਂ ਕੀਤੀ ਜਾ ਸਕਦੀ।