ਨਿਊਜ਼ੀਲੈਂਡ ਪੁਲਿਸ ਦੀ ਵੱਡੀ ਜਾਂਚ ‘ਚ ਦੇਸ਼-ਪੱਧਰੀ ਡਰੱਗ ਆਯਾਤ ਅਤੇ ਸਪਲਾਈ ਨੈੱਟਵਰਕ ਦਾ ਪਰਦਾਫਾਸ਼ ਕੀਤਾ ਗਿਆ ਹੈ। ਨੌ ਮਹੀਨੇ ਚੱਲੀ ਕਾਰਵਾਈ, ਜਿਸਨੂੰ ਓਪਰੇਸ਼ਨ ਸੋਲਾਨਾ ਨਾਮ ਦਿੱਤਾ ਗਿਆ ਅਤੇ ਜਿਸਦੀ ਅਗਵਾਈ National Organised Crime Group ਵੱਲੋਂ ਕੀਤੀ ਗਈ, ਡਾਰਕ ਵੈੱਬ ਰਾਹੀਂ ਮੈਥਐਮਫੈਟਾਮਾਈਨ, ਕੋਕੇਨ, MDMA ਅਤੇ ਕੇਟਾਮਾਈਨ ਦੀ ਆਯਾਤ ਅਤੇ ਸਪਲਾਈ ‘ਤੇ ਕੇਂਦ੍ਰਿਤ ਸੀ। ਪੁਲਿਸ ਨੇ ਵੀਰਵਾਰ ਅਤੇ ਸ਼ੁੱਕਰਵਾਰ ਨੂੰ Auckland ਅਤੇ Hamilton ਵਿੱਚ 16 ਥਾਵਾਂ ‘ਤੇ ਤਲਾਸ਼ੀ ਵਾਰੰਟ ਜਾਰੀ ਕਰਕੇ 11 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।
ਕਾਰਵਾਈ ਦੌਰਾਨ ਵੱਡੀ ਮਾਤਰਾ ਵਿੱਚ ਨਸ਼ੀਲੇ ਪਦਾਰਥ, ਲਗਭਗ 5 ਲੱਖ ਡਾਲਰ ਨਕਦ ਅਤੇ ਤਿੰਨ ਹਥਿਆਰ ਜ਼ਬਤ ਕੀਤੇ ਗਏ, ਜਿਨ੍ਹਾਂ ਵਿੱਚ ਇੱਕ 3D-ਪ੍ਰਿੰਟ ਕੀਤਾ ਗਨ ਵੀ ਸ਼ਾਮਿਲ ਹੈ। ਗ੍ਰਿਫ਼ਤਾਰ ਕੀਤੇ ਗਏ 11 ਵਿਅਕਤੀਆਂ ਜਿਨ੍ਹਾਂ ਦੀ ਉਮਰ 24 ਤੋਂ 42 ਸਾਲ ਦੇ ਵਿਚਕਾਰ ਹੈ, ਨੂੰ ਅੱਜ ਆਕਲੈਂਡ ਜ਼ਿਲ੍ਹਾ ਅਤੇ ਹੈਮਿਲਟਨ ਜ਼ਿਲ੍ਹਾ ਅਦਾਲਤਾਂ ਵਿੱਚ ਪੇਸ਼ ਕੀਤਾ ਜਾਣਾ ਸੀ।