ਨੌਰਥਲੈਂਡ: ਨੌਰਥਲੈਂਡ ਦੇ ਦੋ ਪ੍ਰਸਿੱਧ ਤੱਟੀ ਇਲਾਕਿਆਂ ਵਿੱਚ ਪਬਲਿਕ ਟਾਇਲਟਾਂ ਨੂੰ ਤਾਂਬੇ ਦੀਆਂ ਪਾਈਪਾਂ ਚੋਰੀ ਹੋਣ ਕਾਰਨ ਅਸਥਾਈ ਤੌਰ ’ਤੇ ਬੰਦ ਕਰ ਦਿੱਤਾ ਗਿਆ ਹੈ। ਇਹ ਘਟਨਾ ਮੰਗਲਵਾਰ ਰਾਤ ਵਾਪਰੀ।
ਫਾਰ ਨੌਰਥ ਡਿਸਟ੍ਰਿਕਟ ਕੌਂਸਲ ਦੇ ਅਨੁਸਾਰ, ਪਾਈਹੀਆ ਦੇ ਟੀਈ ਬੀਚ (Tii Beach) ਅਤੇ ਨੇੜਲੇ ਤੇ ਹਾਉਮੀ (Te Haumi) ਦੇ ਟਾਇਲਟਾਂ ਵਿੱਚੋਂ ਤਾਂਬੇ ਦੀਆਂ ਪਾਈਪਾਂ ਚੋਰੀ ਕਰ ਲਈਆਂ ਗਈਆਂ ਹਨ। ਚੋਰੀ ਕਾਰਨ ਪਾਈਪਲਾਈਨ ਨੂੰ ਨੁਕਸਾਨ ਵੀ ਪਹੁੰਚਿਆ, ਜਿਸ ਦੇ ਚਲਦਿਆਂ ਦੋਵੇਂ ਸਹੂਲਤਾਂ ਨੂੰ ਬੰਦ ਕਰਨਾ ਪਿਆ।
ਕੌਂਸਲ ਨੇ ਨੁਕਸਾਨੀ ਪਾਈਪਲਾਈਨ ਨੂੰ ਬਦਲਣ ਲਈ ਪਲੰਬਰਾਂ ਦਾ ਪ੍ਰਬੰਧ ਕਰ ਦਿੱਤਾ ਹੈ। ਕੌਂਸਲ ਨੇ ਕਿਹਾ ਕਿ ਮੁਰੰਮਤ ਦੌਰਾਨ ਤਾਂਬੇ ਦੀਆਂ ਪਾਈਪਾਂ ਦੀ ਵਰਤੋਂ ਨਹੀਂ ਕੀਤੀ ਜਾਵੇਗੀ। ਮੁਰੰਮਤ ਪੂਰੀ ਹੁੰਦੇ ਹੀ ਟਾਇਲਟ ਮੁੜ ਲੋਕਾਂ ਲਈ ਖੋਲ੍ਹ ਦਿੱਤੇ ਜਾਣਗੇ।
ਕੌਂਸਲ ਨੇ ਕਿਹਾ ਕਿ ਟਾਇਲਟ ਬੰਦ ਹੋਣ ਕਾਰਨ ਸਥਾਨਕ ਲੋਕਾਂ ਅਤੇ ਇਲਾਕੇ ਵਿੱਚ ਆਉਣ ਵਾਲੇ ਸੈਲਾਨੀਆਂ ਨੂੰ ਪਰੇਸ਼ਾਨੀ ਹੋ ਸਕਦੀ ਹੈ। ਕੌਂਸਲ ਨੇ ਲੋਕਾਂ ਦੇ ਸਬਰ ਲਈ ਧੰਨਵਾਦ ਕੀਤਾ ਹੈ।
ਫਾਰ ਨੌਰਥ ਡਿਸਟ੍ਰਿਕਟ ਕੌਂਸਲ ਪੂਰੇ ਇਲਾਕੇ ਵਿੱਚ 75 ਪਬਲਿਕ ਟਾਇਲਟਾਂ ਦੀ ਦੇਖਭਾਲ ਕਰਦੀ ਹੈ।
ਚੋਰੀ ਸਬੰਧੀ ਕਿਸੇ ਵੀ ਜਾਣਕਾਰੀ ਵਾਲੇ ਵਿਅਕਤੀ ਨੂੰ ਕੌਂਸਲ ਨਾਲ 0800 920 029 ’ਤੇ ਸੰਪਰਕ ਕਰਨ ਦੀ ਅਪੀਲ ਕੀਤੀ ਗਈ ਹੈ।