ਕਾਪਿਟੀ ਕੋਸਟ: ਨਿਊਜ਼ੀਲੈਂਡ ਦੇ ਕਾਪਿਟੀ ਕੋਸਟ ਖੇਤਰ ਵਿੱਚ ਸਰਕਾਰੀ ਟਾਇਲਟਾਂ ਦੀ ਕੀਤੀ ਜਾ ਰਹੀ ਤੋੜਭੰਨ ਕਾਰਨ ਸਥਾਨਕ Ratepayers ਨੂੰ ਹਰ ਸਾਲ ਲਗਭਗ 1,60,000 ਨਿਊਜ਼ੀਲੈਂਡ ਡਾਲਰ ਦਾ ਵਾਧੂ ਖਰਚਾ ਝੱਲਣਾ ਪੈ ਰਿਹਾ ਹੈ। ਕਾਪਿਟੀ ਕੋਸਟ ਡਿਸਟ੍ਰਿਕਟ ਕੌਂਸਲ ਦੇ ਅਨੁਸਾਰ, ਪਿਛਲੇ 12 ਮਹੀਨਿਆਂ ਦੌਰਾਨ ਜੁਲਾਈ ਤੱਕ ਸਰਕਾਰੀ ਟਾਇਲਟਾਂ ਵਿੱਚ ਤੋੜਭੰਨ ਦੀਆਂ 27 ਘਟਨਾਵਾਂ ਦਰਜ ਕੀਤੀਆਂ ਗਈਆਂ। ਇਨ੍ਹਾਂ ਵਿੱਚ ਟਾਇਲਟ ਪੈਨ ਤੋੜਨਾ, ਪਾਈਪਾਂ ਨੂੰ ਜਾਣਬੁੱਝ ਕੇ ਜਾਮ ਕਰਨਾ ਅਤੇ ਹੋਰ ਨੁਕਸਾਨ ਸ਼ਾਮਿਲ ਹਨ। ਕਈ ਥਾਵਾਂ ਨੂੰ ਇੱਕ ਤੋਂ ਵੱਧ ਵਾਰ ਨਿਸ਼ਾਨਾ ਬਣਾਇਆ ਗਿਆ, ਜਿਸ ਕਾਰਨ ਟਾਇਲਟ ਕਈ ਦਿਨਾਂ ਜਾਂ ਹਫ਼ਤਿਆਂ ਲਈ ਬੰਦ ਰੱਖਣੇ ਪਏ।
ਇੱਕ ਘਟਨਾ ਵਿੱਚ ਪਾਰਾਪਾਰਾਉਮੂ ਸਥਿਤ ਮੈਜ਼ੇਂਗਾਰਬ ਹਾਲ ਸਪੋਰਟਸ ਕੰਪਲੈਕਸ ਦੇ ਦਿਵਿਆਂਗਾਂ ਲਈ ਬਣੇ ਟਾਇਲਟ ਵਿੱਚ ਸ਼ਰਾਰਤੀ ਅਨਸਰਾਂ ਨੇ ਟਾਇਲਟ ਪੈਨ ਤੋੜ ਦਿੱਤਾ, ਦਰਵਾਜ਼ੇ ਦਾ ਹੈਂਡਲ ਉਖਾੜ ਦਿੱਤਾ, ਦਰਵਾਜ਼ਾ ਲੱਤਾਂ ਮਾਰ ਕੇ ਤੋੜਿਆ ਅਤੇ ਕੱਚ ਤੋੜ ਕੇ ਅੰਦਰ ਖਿਲਾਰ ਦਿੱਤਾ। ਇਸ ਨੁਕਸਾਨ ਦੀ ਮੁਰੰਮਤ ‘ਤੇ ਕਰੀਬ 5,000 ਡਾਲਰ ਦਾ ਖਰਚਾ ਆਇਆ।
ਕੌਂਸਲ ਨੇ ਦੱਸਿਆ ਕਿ ਸਰਕਾਰੀ ਟਾਇਲਟਾਂ ਤੋਂ ਇਲਾਵਾ ਕਮਿਊਨਿਟੀ ਹਾਲਾਂ ਅਤੇ ਚੇਂਜਿੰਗ ਰੂਮਾਂ ਵਿੱਚ ਹੋਈ ਤੋੜਭੰਨ ਦੀ ਮੁਰੰਮਤ ‘ਤੇ ਵੀ ਹਰ ਸਾਲ ਵੱਡੀ ਰਕਮ ਖਰਚ ਹੁੰਦੀ ਹੈ। ਕੁਝ ਮਾਮਲਿਆਂ ਵਿੱਚ ਇੱਕੋ ਵਾਰ ਦੀ ਮੁਰੰਮਤ ਦਾ ਖਰਚਾ 40,000 ਡਾਲਰ ਤੱਕ ਪਹੁੰਚ ਗਿਆ। ਕੌਂਸਲ ਦੇ ਪ੍ਰਾਪਰਟੀ ਅਤੇ ਫੈਸਿਲਿਟੀਜ਼ ਮੈਨੇਜਰ ਕੇਲਵਿਨ ਇਰਵਿਨ ਨੇ ਕਿਹਾ ਕਿ ਤੋੜਭੰਨ ਹੁਣ ਇਕੱਲੀਆਂ ਘਟਨਾਵਾਂ ਨਹੀਂ ਰਹੀਆਂ, ਸਗੋਂ ਇਹ ਸਮੱਸਿਆ ਹਰ ਹਫ਼ਤੇ ਸਾਹਮਣੇ ਆ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਮੁਰੰਮਤ ਲਈ ਠੇਕੇਦਾਰਾਂ ਦਾ ਪ੍ਰਬੰਧ ਕਰਨਾ, ਕੰਮ ਦੀ ਨਿਗਰਾਨੀ ਕਰਨਾ ਅਤੇ ਜਨਤਾ ਲਈ ਸੂਚਨਾਵਾਂ ਲਗਾਉਣਾ ਵੀ ਕਾਫ਼ੀ ਸਮਾਂ ਅਤੇ ਸਰੋਤਾਂ ਦੀ ਮੰਗ ਕਰਦਾ ਹੈ।
ਉਨ੍ਹਾਂ ਚਿਤਾਵਨੀ ਦਿੱਤੀ ਕਿ ਜੇਕਰ ਇਹ ਤੋੜਭੰਨ ਜਾਰੀ ਰਹੀ ਤਾਂ ਕੌਂਸਲ ਲਈ ਮੁਰੰਮਤ ਦਾ ਖਰਚਾ ਚੁਕਾਉਣਾ ਅਤੇ ਸਰਕਾਰੀ ਟਾਇਲਟਾਂ ਨੂੰ ਖੁੱਲ੍ਹਾ ਰੱਖਣਾ ਮੁਸ਼ਕਿਲ ਹੋ ਸਕਦਾ ਹੈ. ਕੌਂਸਲ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜੇਕਰ ਉਹ ਕਿਸੇ ਵੀ ਸਰਕਾਰੀ ਸਹੂਲਤ ਦੇ ਨੇੜੇ ਤੋੜਭੰਨ ਜਾਂ ਸ਼ੱਕੀ ਗਤੀਵਿਧੀ ਦੇਖਣ ਤਾਂ ਤੁਰੰਤ ਪੁਲਿਸ ਨੂੰ ਸੂਚਿਤ ਕਰਨ।