ਨਿਊਜ਼ੀਲੈਂਡ ਇਮੀਗ੍ਰੇਸ਼ਨ ਦੇ ਫ਼ੈਸਲਿਆਂ ਨੂੰ ਲੈ ਕੇ ਇੱਕ ਵਾਰ ਫਿਰ ਚਰਚਾ ਛਿੜ ਗਈ ਹੈ। ਬੰਗਲਾਦੇਸ਼ ਦੀ ਇੱਕ ਮਹਿਲਾ ਨੂੰ ਦੋ ਵਾਰ ਵੀਜ਼ਾ ਰੱਦ ਕਰਨ ਤੋਂ ਬਾਅਦ ਆਖ਼ਰਕਾਰ ਤੀਜੀ ਅਰਜ਼ੀ ਵਿੱਚ ਵੀਜ਼ਾ ਜਾਰੀ ਕਰ ਦਿੱਤਾ ਗਿਆ, ਜਿਸ ਤੋਂ ਬਾਅਦ ਇਮੀਗ੍ਰੇਸ਼ਨ ਪ੍ਰਕਿਰਿਆ ‘ਤੇ ਸਵਾਲ ਉੱਠ ਰਹੇ ਹਨ। ਆਕਲੈਂਡ ਦੇ ਇਮੀਗ੍ਰੇਸ਼ਨ ਸਲਾਹਕਾਰ Ankur Sabharwal ਵੱਲੋਂ ਸਾਂਝੀ ਕੀਤੀ ਜਾਣਕਾਰੀ ਅਨੁਸਾਰ, ਬੰਗਲਾਦੇਸ਼ ਦੀ ਰਹਿਣ ਵਾਲੀ ਆਇਸ਼ਾ ਨੇ ਮਾਰਚ 2025 ਵਿੱਚ ਨਿਊਜ਼ੀਲੈਂਡ ਵਿੱਚ ਰਹਿੰਦੇ ਬੰਗਲਾਦੇਸ਼ੀ ਮੂਲ ਦੇ ਨਦੀਮ ਨਾਲ ਰਵਾਇਤੀ ਤਰੀਕੇ ਨਾਲ ਵਿਆਹ ਕੀਤਾ ਸੀ। ਦੋਵਾਂ ਦੀ ਮੁਲਾਕਾਤ ਪਰਿਵਾਰਾਂ ਰਾਹੀਂ ਹੋਈ ਸੀ।
ਵਿਆਹ ਤੋਂ ਬਾਅਦ ਆਇਸ਼ਾ ਨੇ ਸਭ ਤੋਂ ਪਹਿਲਾਂ “Culturally Arranged Marriage (CAM)” ਵੀਜ਼ੇ ਲਈ ਅਰਜ਼ੀ ਦਿੱਤੀ। ਪਰ Immigration New Zealand ਨੇ ਇਹ ਕਹਿੰਦੇ ਹੋਏ ਅਰਜ਼ੀ ਰੱਦ ਕਰ ਦਿੱਤੀ ਕਿ ਵਿਆਹ ਦੇ ਰਵਾਇਤੀ ਤਰੀਕੇ ਨਾਲ ਤੈਅ ਹੋਣ ਦੇ ਪੂਰੇ ਸਬੂਤ ਨਹੀਂ ਦਿੱਤੇ ਗਏ।
ਇਸ ਤੋਂ ਬਾਅਦ ਉਸਨੇ “Partner of a New Zealander” ਵੀਜ਼ੇ ਲਈ ਅਪਲਾਈ ਕੀਤਾ, ਪਰ ਇਹ ਅਰਜ਼ੀ ਵੀ ਖ਼ਾਰਜ ਹੋ ਗਈ। ਇਮੀਗ੍ਰੇਸ਼ਨ ਦਾ ਮੰਨਣਾ ਸੀ ਕਿ ਦੋਵੇਂ ਪਤੀ-ਪਤਨੀ ਇਕੱਠੇ ਲੰਬੇ ਸਮੇਂ ਤੱਕ ਨਹੀਂ ਰਹੇ, ਜਿਸ ਕਾਰਨ ਰਿਸ਼ਤੇ ਦੀ ਸੱਚਾਈ ਸਾਬਿਤ ਨਹੀਂ ਹੋ ਸਕੀ। ਰਿਪੋਰਟ ਅਨੁਸਾਰ ਕੁਝ ਚੈਟਾਂ ਦਾ ਅਨੁਵਾਦ ਨਹੀਂ ਕੀਤਾ ਗਿਆ ਸੀ ਅਤੇ ਕੁਝ ਸਕ੍ਰੀਨਸ਼ਾਟਾਂ ‘ਤੇ ਤਾਰੀਖਾਂ ਮੌਜੂਦ ਨਹੀਂ ਸਨ, ਜਿਸ ਕਾਰਨ ਸਬੂਤਾਂ ਨੂੰ ਲੈ ਕੇ ਸ਼ੱਕ ਜਤਾਇਆ ਗਿਆ।
ਦੋ ਵਾਰ ਵੀਜ਼ਾ ਰੱਦ ਹੋਣ ਮਗਰੋਂ ਮਾਮਲਾ ਇਮੀਗ੍ਰੇਸ਼ਨ ਸਲਾਹਕਾਰ ਕੋਲ ਪਹੁੰਚਿਆ। ਇਸ ਵਾਰ CAM ਜਾਂ partnership visa ਦੀ ਥਾਂ ਇੱਕ ਆਮ visitor visa ਲਈ ਅਰਜ਼ੀ ਦਿੱਤੀ ਗਈ। ਅਰਜ਼ੀ ਦੇ ਨਾਲ sponsorship documents, tenancy agreement ਅਤੇ ਆਇਸ਼ਾ ਦੇ ਕਾਲਜ ਵੱਲੋਂ ਜਾਰੀ ਪੱਤਰ ਵੀ ਸ਼ਾਮਲ ਕੀਤਾ ਗਿਆ, ਜਿਸ ਵਿੱਚ ਕਿਹਾ ਗਿਆ ਸੀ ਕਿ ਉਹ ਪੜ੍ਹਾਈ ਲਈ ਵਾਪਸ ਬੰਗਲਾਦੇਸ਼ ਜਾਵੇਗੀ।
ਇਸ ਦੇ ਬਾਵਜੂਦ ਵੀ Immigration New Zealand ਵੱਲੋਂ ਇੱਕ ਚਿੰਤਾ ਪੱਤਰ ਭੇਜਿਆ ਗਿਆ, ਜਿਸ ਵਿੱਚ visitor visa ਉੱਤੇ partnership visa ਦੇ ਨਿਯਮ ਲਾਗੂ ਕਰ ਦਿੱਤੇ ਗਏ। ਬਾਅਦ ਵਿੱਚ ਸਲਾਹਕਾਰ ਵੱਲੋਂ ਮਾਮਲਾ senior manager ਤੱਕ ਲਿਜਾਇਆ ਗਿਆ, ਜਿੱਥੇ ਇਹ ਮੰਨਿਆ ਗਿਆ ਕਿ ਗਲਤ ਵੀਜ਼ਾ category ਦੇ ਨਿਯਮ ਲਗਾਏ ਗਏ ਸਨ।
ਆਖ਼ਰਕਾਰ ਆਇਸ਼ਾ ਨੂੰ ਵੀਜ਼ਾ ਜਾਰੀ ਕਰ ਦਿੱਤਾ ਗਿਆ। ਇਹ ਮਾਮਲਾ ਇੱਕ ਵਾਰ ਫਿਰ ਦਰਸਾਉਂਦਾ ਹੈ ਕਿ ਗਲਤ ਵੀਜ਼ਾ category ਦੀ ਚੋਣ ਜਾਂ ਇਮੀਗ੍ਰੇਸ਼ਨ ਵੱਲੋਂ ਨਿਯਮਾਂ ਦੀ ਗਲਤ ਵਿਆਖਿਆ, ਪਰਵਾਸੀ ਪਰਿਵਾਰਾਂ ਲਈ ਵੱਡੀਆਂ ਮੁਸ਼ਕਿਲਾਂ ਪੈਦਾ ਕਰ ਸਕਦੀ ਹੈ।