ਕ੍ਰਾਈਸਚਰਚ ਦੇ ਇੱਕ ਸਕੂਲ ਨੇ ਮਾਪਿਆਂ ਨੂੰ “ਮਹੱਤਵਪੂਰਨ ਸਿਹਤ ਅਤੇ ਸੁਰੱਖਿਆ ਉਲੰਘਣਾ” ਬਾਰੇ ਚਿਤਾਵਨੀ ਦਿੱਤੀ ਹੈ ਕਿਉਂਕਿ ਸੋਮਵਾਰ ਨੂੰ ਸਕੂਲ ਵੱਲੋਂ ਦਿੱਤਾ ਗਿਆ ਦੁਪਹਿਰ ਦਾ ਖਾਣਾ ਬਹੁਤ ਹੀ ਸੜਿਆ ਹੋਇਆ ਸੀ ਤੇ ਫਂਗਸ ਲੱਗੀ ਹੋਈ ਸੀ। ਹੇਆਟਾ ਕਮਿਊਨਿਟੀ ਕੈਂਪਸ ਦੀ ਪ੍ਰਿੰਸੀਪਲ ਪੈਗੀ ਬਰੋਜ਼ ਨੇ ਕਿਹਾ ਕਿ ਸਾਰੇ ਦੁਪਹਿਰ ਦੇ ਖਾਣੇ ਵਾਪਸ ਮੰਗਵਾ ਲਏ ਗਏ ਸਨ ਪਰ ਕੁਝ ਪਹਿਲਾਂ ਹੀ ਵਿਦਿਆਰਥੀਆਂ ਦੁਆਰਾ ਖਾਧੇ ਜਾ ਚੁੱਕੇ ਸਨ। ਉਨ੍ਹਾਂ ਦੱਸਿਆ ਕਿ ਸਟਾਫ ਮੈਂਬਰ ਆਮ ਤੌਰ ‘ਤੇ ਬੱਚਿਆਂ ਨਾਲ ਖਾਂਦੇ ਸਨ ਅਤੇ ਜਦੋਂ ਇੱਕ ਸਟਾਫ ਮੈਂਬਰ ਨੇ ਲੰਚ ਖੋਲ੍ਹਿਆ ਤਾਂ ਉਨ੍ਹਾਂ ਨੇ ਇਸ ‘ਚ ਉੱਲੀ ਲੱਗੀ ਦੇਖੀ। ਉਨ੍ਹਾਂ ਨੇ ਸਕੂਲ ਵਿੱਚ ਵਿਦਿਆਰਥੀਆਂ ਦੇ ਮਾਪਿਆਂ ਨੂੰ ਉਲਟੀਆਂ ਅਤੇ ਦਸਤ ਸਮੇਤ ਭੋਜਨ ਦੇ ਜ਼ਹਿਰ ਦੇ ਲੱਛਣਾਂ ‘ਤੇ ਨਜ਼ਰ ਰੱਖਣ ਦੀ ਚਿਤਾਵਨੀ ਦਿੱਤੀ ਹੈ।
ਬਰੋਵਜ਼ ਨੇ ਸ਼ੱਕ ਜਤਾਇਆ ਕਿ ਇਹ ਭੋਜਨ ਸਪਲਾਇਰ Compass Group ਵੱਲੋਂ ਪਹਿਲਾਂ ਵਾਪਸ ਆਏ ਖਾਣੇ ਨੂੰ ਗਲਤੀ ਨਾਲ ਜਾਂ ਲਾਪਰਵਾਹੀ ਕਾਰਨ ਦੁਬਾਰਾ ਓਵਨ ਵਿੱਚ ਗਰਮ ਕਰਕੇ ਭੇਜਿਆ ਗਿਆ ਹੋ ਸਕਦਾ ਹੈ। Compass ਨੇ ਬਾਕੀ ਬਚੇ ਲੰਚ ਇਕੱਠੇ ਕਰ ਲਏ ਹਨ ਅਤੇ ਕਿਹਾ ਹੈ ਕਿ ਉਹ ਸਾਰੇ ਭੋਜਨ ਦੀ ਜਾਂਚ ਕਰਨਗੇ।