ਨਿਊਜ਼ੀਲੈਂਡ ਦੇ ਰੋਟੋਰੂਆ ਸ਼ਹਿਰ ਵਿੱਚ ਪੁਲਿਸ ਅਤੇ ਇਮੀਗ੍ਰੇਸ਼ਨ ਨਿਊਜ਼ੀਲੈਂਡ ਵੱਲੋਂ ਕੀਤੀ ਗਈ ਸਾਂਝੀ ਕਾਰਵਾਈ ਦੌਰਾਨ 14 ਵੱਡੇ ਕੈਨਾਬਿਸ (ਭੰਗ) ਗ੍ਰੋ ਹਾਊਸਾਂ ਦਾ ਪਰਦਾਫਾਸ਼ ਕੀਤਾ ਗਿਆ ਹੈ। ਇਸ ਮਾਮਲੇ ਵਿੱਚ 16 ਵੀਅਤਨਾਮੀ ਨਾਗਰਿਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਬੇ ਆਫ਼ ਪਲੈਂਟੀ ਦੇ ਫ਼ੀਲਡ ਕ੍ਰਾਈਮ ਮੈਨੇਜਰ ਡਿਟੈਕਟਿਵ ਇੰਸਪੈਕਟਰ ਲਿੰਡਸੇ ਪਿਲਬਰੋ ਨੇ ਦੱਸਿਆ ਕਿ ਇਹ ਇੱਕ ਸੁਚੱਜੇ ਢੰਗ ਨਾਲ ਚਲਾਇਆ ਜਾ ਰਿਹਾ ਵੱਡਾ ਅਪਰਾਧਿਕ ਨੈੱਟਵਰਕ ਸੀ। ਪੁਲਿਸ ਨੇ ਅੰਦਾਜ਼ਾ ਲਗਾਇਆ ਹੈ ਕਿ ਇਸ ਕਾਰਵਾਈ ਨਾਲ ਕਰੀਬ 65 ਲੱਖ ਨਿਊਜ਼ੀਲੈਂਡ ਡਾਲਰ ਮੁੱਲ ਦੀ ਕੈਨਾਬਿਸ ਕਾਲੇ ਬਾਜ਼ਾਰ ਵਿੱਚ ਜਾਣ ਤੋਂ ਰੋਕੀ ਗਈ ਹੈ।
ਪੁਲਿਸ ਨੇ 5 ਰਿਹਾਇਸ਼ੀ ਜਾਇਦਾਦਾਂ, 21 ਬੈਂਕ ਖਾਤਿਆਂ ਅਤੇ 2 ਵਾਹਨਾਂ ਨੂੰ ਕ੍ਰਿਮਿਨਲ ਪ੍ਰੋਸੀਡਜ਼ (ਰਿਕਵਰੀ) ਐਕਟ ਤਹਿਤ ਜ਼ਬਤ ਕਰ ਲਿਆ ਹੈ। ਗ੍ਰਿਫ਼ਤਾਰ ਕੀਤੇ ਗਏ 16 ਵੀਅਤਨਾਮੀ ਨਾਗਰਿਕਾਂ ਵਿੱਚੋਂ 14 ‘ਤੇ ਕੈਨਾਬਿਸ ਦੀ ਖੇਤੀ ਅਤੇ ਇਸ ਨਾਲ ਸੰਬੰਧਿਤ ਅਪਰਾਧਾਂ ਦੇ ਦੋਸ਼ ਲਗਾਏ ਗਏ ਹਨ, ਜਦਕਿ 2 ਹੋਰਾਂ ਨੂੰ ਇਮੀਗ੍ਰੇਸ਼ਨ ਐਕਟ ਦੀ ਉਲੰਘਣਾ ਦੇ ਦੋਸ਼ਾਂ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।
ਆਪਰੇਸ਼ਨ “ਹਾਰਵੇ” ਦੇ ਤਹਿਤ ਪੁਲਿਸ ਅਤੇ ਇਮੀਗ੍ਰੇਸ਼ਨ ਨਿਊਜ਼ੀਲੈਂਡ (MBIE) ਨੇ ਉਹਨਾਂ ਕਿਰਾਏ ਦੇ ਮਕਾਨਾਂ ਨੂੰ ਨਿਸ਼ਾਨਾ ਬਣਾਇਆ ਜਿੱਥੇ ਵੀਅਤਨਾਮੀ ਸੰਗਠਿਤ ਅਪਰਾਧਿਕ ਗਰੁੱਪ ਵਪਾਰਕ ਪੱਧਰ ‘ਤੇ ਕੈਨਾਬਿਸ ਦੀ ਖੇਤੀ ਕਰ ਰਹੇ ਸਨ।
ਮੰਗਲਵਾਰ ਨੂੰ ਰੋਟੋਰੂਆ ਅਤੇ ਆਕਲੈਂਡ ਵਿੱਚ 25 ਸਰਚ ਵਾਰੰਟ ਲਾਗੂ ਕੀਤੇ ਗਏ। ਇਸ ਦੌਰਾਨ 220 ਤੋਂ ਵੱਧ ਪੁਲਿਸ ਅਤੇ ਹੋਰ ਵਿਭਾਗਾਂ ਦੇ ਕਰਮਚਾਰੀਆਂ ਨੇ ਕਾਰਵਾਈ ਵਿੱਚ ਹਿੱਸਾ ਲਿਆ। ਬਿਜਲੀ ਕੰਪਨੀਆਂ ਦੀ ਮਦਦ ਨਾਲ ਘਰਾਂ ਨੂੰ ਸੁਰੱਖਿਅਤ ਬਣਾਇਆ ਗਿਆ ਅਤੇ ਜਾਂਚ ਕੀਤੀ ਗਈ।
ਤਲਾਸ਼ੀ ਦੌਰਾਨ 21 ਰਿਹਾਇਸ਼ੀ ਜਾਇਦਾਦਾਂ ਵਿੱਚੋਂ 14 ਵਿੱਚ ਸਰਗਰਮ ਕੈਨਾਬਿਸ ਗ੍ਰੋ ਹਾਊਸ ਮਿਲੇ, ਜਿਨ੍ਹਾਂ ਵਿੱਚੋਂ 10 ਕਿਰਾਏ ਦੇ ਘਰ ਸਨ ਅਤੇ ਇਹ ਸਾਰੇ ਰਿਹਾਇਸ਼ੀ ਇਲਾਕਿਆਂ ਵਿੱਚ ਸਥਿਤ ਸਨ।
ਪੁਲਿਸ ਦਾ ਦਾਅਵਾ ਹੈ ਕਿ ਦੋਸ਼ੀਆਂ ਨੇ ਨੇੜਲੇ ਬਿਜਲੀ ਬਾਕਸਾਂ ਤੋਂ ਗੈਰਕਾਨੂੰਨੀ ਤਰੀਕੇ ਨਾਲ ਬਿਜਲੀ ਚੋਰੀ ਕਰਕੇ ਗ੍ਰੋ ਹਾਊਸ ਚਲਾਏ। ਅੰਦਾਜ਼ੇ ਮੁਤਾਬਿਕ ਹਰ ਹਫ਼ਤੇ ਲਗਭਗ 30,000 ਨਿਊਜ਼ੀਲੈਂਡ ਡਾਲਰ ਦੀ ਬਿਜਲੀ ਗੈਰਕਾਨੂੰਨੀ ਤਰੀਕੇ ਨਾਲ ਵਰਤੀ ਜਾ ਰਹੀ ਸੀ। ਕਾਰਵਾਈ ਦੌਰਾਨ ਪੁਲਿਸ ਨੇ 3,500 ਤੋਂ ਵੱਧ ਉੱਚ ਗੁਣਵੱਤਾ ਵਾਲੇ ਕੈਨਾਬਿਸ ਦੇ ਪੌਦੇ ਅਤੇ 97 ਪੌਂਡ ਸੁੱਕੀ ਕੈਨਾਬਿਸ, ਜੋ ਥੋਕ ਵਿਕਰੀ ਲਈ ਪੈਕ ਕੀਤੀ ਗਈ ਸੀ, ਬਰਾਮਦ ਕੀਤੀ ਹੈ।
ਪੁਲਿਸ ਮੁਤਾਬਿਕ ਜ਼ਬਤ ਕੀਤੀ ਗਈ ਕੈਨਾਬਿਸ ਦੀ ਥੋਕ ਕੀਮਤ ਕਰੀਬ 18 ਲੱਖ ਨਿਊਜ਼ੀਲੈਂਡ ਡਾਲਰ ਹੈ, ਜਦਕਿ ਗਲੀ ਬਾਜ਼ਾਰ ਵਿੱਚ ਇਸ ਦੀ ਕੀਮਤ 65 ਲੱਖ ਨਿਊਜ਼ੀਲੈਂਡ ਡਾਲਰ ਤੋਂ ਵੀ ਵੱਧ ਹੋ ਸਕਦੀ ਹੈ। ਇਸ ਤੋਂ ਇਲਾਵਾ ਪੁਲਿਸ ਨੇ ਹਜ਼ਾਰਾਂ ਡਾਲਰ ਦੀ ਨਕਦੀ ਅਤੇ ਕੈਨਾਬਿਸ ਦੀ ਖੇਤੀ ਵਿੱਚ ਵਰਤਿਆ ਜਾਣ ਵਾਲਾ ਵੱਡੀ ਮਾਤਰਾ ਵਿੱਚ ਸਾਜ਼ੋ-ਸਾਮਾਨ ਵੀ ਜ਼ਬਤ ਕੀਤਾ ਹੈ।