ਆਕਲੈਂਡ ਦੇ ਬੋਟਨੀ ਵਿੱਚ ਮੰਗਲਵਾਰ ਦੁਪਹਿਰ ਵੇਲੇ ਮਾਈਕਲ ਹਿੱਲ ਸਟੋਰ ਵਿੱਚ ਹੋਈ ਭੰਨਤੋੜ ਤੇ ਲੁੱਟ-ਖੋਹ ਤੋਂ ਬਾਅਦ ਪੁਲਿਸ ਘਟਨਾ ਵੇਲੇ ਇਲਾਕੇ ‘ਚ ਮੌਜੂਦ ਲੋਕਾਂ ਨਾਲ ਗੱਲਬਾਤ ਕਰ ਰਹੀ ਹੈ। ਪੁਲਿਸ ਇੰਸਪੈਕਟਰ ਡੈਨੀ ਮੀਡ ਨੇ ਕਿਹਾ ਕਿ ਉਨ੍ਹਾਂ ਨੂੰ ਸ਼ਾਮ 4.20 ਵਜੇ ਦੇ ਕਰੀਬ ਸੱਤ ਅਪਰਾਧੀਆਂ ਦੇ ਸਟੋਰ ਵਿੱਚ ਦਾਖਲ ਹੋਣ ਦੀਆਂ ਰਿਪੋਰਟਾਂ ਮਿਲੀਆਂ ਸਨ। ਉਨ੍ਹਾਂ ਕਿਹਾ ਕਿ, “ਸਮੂਹ ਨੇ ਸ਼ੀਸ਼ੇ ਦੀਆਂ ਅਲਮਾਰੀਆਂ ਨੂੰ ਤੋੜਨ ਲਈ ਕਈ ਹਥਿਆਰਾਂ ਦੀ ਵਰਤੋਂ ਕੀਤੀ ਹੈ ਅਤੇ ਕਾਫ਼ੀ ਮਾਤਰਾ ਵਿੱਚ ਗਹਿਣੇ ਚੋਰੀ ਕੀਤੇ ਹਨ।” ਮੀਡ ਨੇ ਕਿਹਾ ਕਿ ਅਪਰਾਧੀ ਦੋ ਕਥਿਤ ਤੌਰ ‘ਤੇ ਚੋਰੀ ਕੀਤੇ ਵਾਹਨਾਂ ਵਿੱਚ ਮੌਕੇ ਤੋਂ ਭੱਜ ਗਏ, ਜੋ ਕਿ ਬੋਟਨੀ ਡਾਊਨਜ਼ ਸੈਕੰਡਰੀ ਕਾਲਜ ਦੇ ਨੇੜੇ ਥੋੜ੍ਹੀ ਦੂਰੀ ‘ਤੇ ਛੱਡੇ ਹੋਏ ਮਿਲੇ ਸਨ। ਫਿਲਹਾਲ ਪੁੱਛਗਿੱਛ ਜਾਰੀ ਹੈ। ਪੁਲਿਸ ਨੇ ਘਟਨਾ ਨਾਲ ਸਬੰਧਿਤ ਜਾਣਕਾਰੀ ਰੱਖਣ ਵਾਲੇ ਕਿਸੇ ਵੀ ਵਿਅਕਤੀ ਨੂੰ ਅੱਗੇ ਆਉਣ ਅਤੇ ਜਾਣਕਾਰੀ ਸਾਂਝੀ ਕਰਨ ਦੀ ਅਪੀਲ ਕੀਤੀ ਹੈ।
