ਨਿਊਜ਼ੀਲੈਂਡ ਦੇ Christchurch ਅਤੇ Hamilton ਵਿੱਚ ਸਵੇਰੇ ਸਵੇਰੇ ਹੋਈਆਂ ਵੱਖ-ਵੱਖ ਇੰਧਨ ਚੋਰੀਆਂ ਦੇ ਮਾਮਲਿਆਂ ‘ਚ ਪੁਲਿਸ ਨੇ ਦੋ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਦੇ ਅਨੁਸਾਰ, ਦੋਹਾਂ ਮਾਮਲਿਆਂ ਵਿੱਚ ਗ੍ਰਿਫ਼ਤਾਰੀ ਲੋਕਾਂ ਵੱਲੋਂ ਕੀਤੀਆਂ ਤੁਰੰਤ ਸ਼ਿਕਾਇਤਾਂ ਦੇ ਆਧਾਰ ’ਤੇ ਹੋਈ ਹੈ। ਕ੍ਰਾਈਸਚਰਚ ਦੇ ਸਾਕਬਰਨ ਇਲਾਕੇ ਵਿੱਚ ਸਵੇਰੇ ਕਰੀਬ 4 ਵਜੇ ਇੱਕ ਰਹਾਇਸ਼ੀ ਨੇ ਦੇਖਿਆ ਕਿ ਇੱਕ ਵਿਅਕਤੀ ਉਸਦੀ ਗੱਡੀ ਵਿੱਚੋਂ ਪੈਟਰੋਲ ਕੱਢਣ ਦੀ ਕੋਸ਼ਿਸ਼ ਕਰ ਰਿਹਾ ਸੀ। ਇਸ ਸੂਚਨਾ ’ਤੇ ਕਾਰਵਾਈ ਕਰਦਿਆਂ ਪੁਲਿਸ ਨੇ ਨੇੜੇ ਹੀ ਇੱਕ ਕਾਰ ਨੂੰ ਰੋਕਿਆ। ਕਾਰ ਵਿੱਚੋਂ 60-ਲੀਟਰ ਦੇ ਪੰਜ ਡੱਬੇ, ਇੱਕ ਬੈਟਰੀ ਨਾਲ ਚੱਲਣ ਵਾਲਾ ਸਾਇਫਨ ਪੰਪ ਅਤੇ ਥੋੜ੍ਹੀ ਮਾਤਰਾ ਵਿੱਚ ਮੈਥਐਮਫੈਟਾਮਾਈਨ ਬਰਾਮਦ ਕੀਤੀ।
31 ਸਾਲਾ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕਰਕੇ ਅੱਜ ਕ੍ਰਾਈਸਚਰਚ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ, ਜਿੱਥੇ ਉਸ ’ਤੇ ਮੋਟਰ ਵਾਹਨ ਨਾਲ ਗੈਰਕਾਨੂੰਨੀ ਛੇੜਛਾੜ, ਧੋਖਾਧੜੀ ਲਈ ਸਾਮਾਨ ਰੱਖਣ ਅਤੇ ਮੈਥਐਮਫੈਟਾਮਾਈਨ ਰੱਖਣ ਦੇ ਦੋਸ਼ ਲਗਾਏ ਗਏ ਹਨ।
ਇਸ ਤੋਂ ਲਗਭਗ 20 ਮਿੰਟ ਬਾਅਦ ਹੈਮਿਲਟਨ ਦੇ ਪੀਕਾਕੇ ਇਲਾਕੇ ਵਿੱਚ ਇੱਕ ਵਰਕਸਾਈਟ ਤੋਂ ਡੀਜ਼ਲ ਚੋਰੀ ਦੀ ਘਟਨਾ ਦੀ ਸੂਚਨਾ ਮਿਲੀ। ਕਿਸੇ ਵਿਅਕਤੀ ਨੇ ਲਾਈਵ ਕੈਮਰੇ ਰਾਹੀਂ ਇੱਕ ਸ਼ੱਕੀ ਨੂੰ ਡੀਜ਼ਲ ਚੋਰੀ ਕਰਦੇ ਵੇਖਿਆ ਅਤੇ ਪੁਲਿਸ ਨੂੰ ਜਾਣਕਾਰੀ ਦਿੱਤੀ। ਸ਼ੱਕੀ ਵਿਅਕਤੀ ਹੈਚਬੈਕ ਕਾਰ ਵਿੱਚ ਮੌਕੇ ਤੋਂ ਫਰਾਰ ਹੋ ਗਿਆ ਸੀ, ਜਿਸਨੂੰ ਪੁਲਿਸ ਨੇ ਸਵੇਰੇ 4:35 ਵਜੇ ਸ਼ਹਿਰ ਦੇ ਦੱਖਣੀ ਹਿੱਸੇ ਵਿੱਚ ਰੋਕ ਲਿਆ। ਕਾਰ ਵਿੱਚੋਂ ਤਿੰਨ ਡੀਜ਼ਲ ਦੇ ਡੱਬੇ, ਕੁਝ ਸੰਦ, ਨਸ਼ੀਲੇ ਪਦਾਰਥ ਅਤੇ ਛੁਰੀਆਂ ਮਿਲੀਆਂ। 35 ਸਾਲਾ ਵਿਅਕਤੀ ਨੂੰ ਗ੍ਰਿਫ਼ਤਾਰ ਕਰਕੇ ਹੈਮਿਲਟਨ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ ਹੈ। ਉਸ ’ਤੇ ਲੱਗਣ ਵਾਲੇ ਦੋਸ਼ ਅਜੇ ਤੈਅ ਨਹੀਂ ਹੋਏ।
ਅਸਿਸਟੈਂਟ ਕਮਿਸ਼ਨਰ Tusha Penny ਨੇ ਕਿਹਾ ਕਿ ਪੁਲਿਸ ਇੰਧਨ ਚੋਰੀ ਦੇ ਮਾਮਲਿਆਂ ’ਤੇ ਨਜ਼ਰ ਰੱਖ ਰਹੀ ਹੈ ਅਤੇ ਹਾਲ ਹੀ ਵਿੱਚ ਡੀਜ਼ਲ ਦੀ ਚੋਰੀ ਵਿੱਚ ਵਾਧਾ ਦੇਖਿਆ ਗਿਆ ਹੈ। ਉਨ੍ਹਾਂ ਕਿਹਾ, “ਇਹ ਘਟਨਾਵਾਂ ਦਰਸਾਉਂਦੀਆਂ ਹਨ ਕਿ ਸ਼ੱਕੀ ਗਤੀਵਿਧੀ ਦੇਖਦੇ ਹੀ ਪੁਲਿਸ ਨੂੰ ਸੂਚਿਤ ਕਰਨਾ ਕਿੰਨਾ ਜ਼ਰੂਰੀ ਹੈ। ਲੋਕਾਂ ਦੀ ਤੁਰੰਤ ਕਾਰਵਾਈ ਨਾਲ ਹੀ ਦੋਸ਼ੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ।” ਮਿਡਲ ਈਸਟ ਵਿੱਚ ਚੱਲ ਰਹੇ ਸੰਘਰਸ਼ ਕਾਰਨ ਪੈਦਾ ਹੋਏ ਇੰਧਨ ਸੰਕਟ ਦੇ ਚਲਦੇ ਡੀਜ਼ਲ ਦੀਆਂ ਕੀਮਤਾਂ ਪੈਟਰੋਲ ਨਾਲੋਂ ਤੇਜ਼ੀ ਨਾਲ ਵਧ ਰਹੀਆਂ ਹਨ।
ਯੂਜ਼ਰ-ਜਨਰੇਟਡ ਐਪ Gaspy ਮੁਤਾਬਕ, ਨਿਊਜ਼ੀਲੈਂਡ ਵਿੱਚ 91 ਆਕਟੇਨ ਪੈਟਰੋਲ ਦੀ ਔਸਤ ਕੀਮਤ $3.49 ਪ੍ਰਤੀ ਲੀਟਰ ਹੈ, ਜਦਕਿ ਡੀਜ਼ਲ $3.84 ਪ੍ਰਤੀ ਲੀਟਰ ਤੱਕ ਪਹੁੰਚ ਗਿਆ ਹੈ। ਇਸ ਦਰਮਿਆਨ ਪ੍ਰਧਾਨ ਮੰਤਰੀ Christopher Luxon ਨੇ ਡੀਜ਼ਲ ਦੀਆਂ ਕੀਮਤਾਂ ਵਿੱਚ ਰਾਹਤ ਦੇਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਇਹ ਕਦਮ “ਮਹਿੰਗਾ ਅਤੇ ਗੈਰ-ਜ਼ਿੰਮੇਵਾਰਾਨਾ” ਹੋਵੇਗਾ ਅਤੇ ਇਸ ਨਾਲ ਮਹਿੰਗਾਈ ਵਿੱਚ ਹੋਰ ਵਾਧਾ ਹੋ ਸਕਦਾ ਹੈ।