ਵਾਇਕਾਟੋ ਖੇਤਰ ਵਿੱਚ ਇਸ ਹਫ਼ਤੇ ਟਰੱਸਟ ਵਾਇਕਾਟੋ ਦੇ ਮੀਟਿੰਗ ਰੂਮਾਂ ਵਿੱਚ ਇੱਕ ਮਹੱਤਵਪੂਰਨ ਬਹੁ-ਭਾਈਚਾਰਕ ਹੁਈ (ਮੁਲਾਕਾਤ) ਆਯੋਜਿਤ ਕੀਤੀ ਗਈ, ਜਿਸ ਨੇ ਮਾਓਰੀ, ਭਾਰਤੀ ਅਤੇ ਹੋਰ ਦੱਖਣੀ ਏਸ਼ੀਆਈ ਭਾਈਚਾਰਿਆਂ ਨੂੰ ਇਕੱਠੇ ਲਿਆ ਕੇ ਏਕਤਾ, ਮਿਲਾਪ ਅਤੇ ਸਾਂਝੇ ਭਵਿੱਖ ਵੱਲ ਨਵਾਂ ਕਦਮ ਚੁੱਕਿਆ। ਵਾਇਕਾਟੋ ਹੁਈ ਨੇ ਸਭਿਆਚਾਰਾਂ ਵਿੱਚ ਏਕਤਾ ਦੀ ਨਵੀਂ ਚਿੰਗਾਰੀ ਜਗਾਈ” ਸਿਰਲੇਖ ਹੇਠ ਜਾਰੀ ਕੀਤੇ ਗਏ ਪ੍ਰੈਸ ਰਿਲੀਜ਼ ਮੁਤਾਬਿਕ, ਇਸ ਹੁਈ ਦਾ ਮੁੱਖ ਉਦੇਸ਼ ਵੱਖ-ਵੱਖ ਭਾਈਚਾਰਿਆਂ ਵਿਚਕਾਰ ਸੰਵਾਦ, ਆਪਸੀ ਸਤਿਕਾਰ ਅਤੇ ਰਿਸ਼ਤਿਆਂ ਨੂੰ ਮਜ਼ਬੂਤ ਕਰਨਾ ਸੀ। ਇੰਡੀਅਨ ਕਲਚਰਲ ਸੋਸਾਇਟੀ ਵਾਇਕਾਟੋ ਇੰਕ. ਦੇ ਪ੍ਰਧਾਨ ਅਤੇ ਡਾਇਰੈਕਟਰ ਆਫ਼ ਇਵੈਂਟਸ ਜੁਝਾਰ ਸਿੰਘ ਰੰਧਾਵਾ ਜੇਪੀ ਨੇ ਕਿਹਾ ਕਿ ਇਹ ਹੁਈ ਵਾਇਕਾਟੋ ਖੇਤਰ ਵਿੱਚ ਏਕਤਾ , ਸਮਝ ਅਤੇ ਸ਼ਾਂਤੀਪੂਰਨ ਸਾਂਝ ਵੱਲ ਇੱਕ ਮਹੱਤਵਪੂਰਨ ਕਦਮ ਹੈ।
ਇਸ ਸਮਾਗਮ ਦੌਰਾਨ ਕਈ ਪ੍ਰਤੀਨਿਧੀਆਂ ਅਤੇ ਸਮੁਦਾਇਕ ਆਗੂਆਂ ਨੇ ਭਾਗ ਲਿਆ ਅਤੇ ਇਕਜੁੱਟ ਹੋ ਕੇ ਸਮਾਜਿਕ ਸਾਂਝ ਅਤੇ ਭਾਈਚਾਰੇਕ ਸਹਿਯੋਗ ਨੂੰ ਅੱਗੇ ਵਧਾਉਣ ਲਈ ਵਿਚਾਰ ਸਾਂਝੇ ਕੀਤੇ। ਹੁਈ ਦੀ ਇੱਕ ਵਿਸ਼ੇਸ਼ ਅਤੇ ਭਾਵੁਕ ਘੜੀ ਉਸ ਵੇਲੇ ਸਾਹਮਣੇ ਆਈ ਜਦੋਂ “ਤੇ ਆਰੋਹਾ” ਨਾਮਕ ਪੌਨਾਮੂ (ਹਰਾ ਪੱਥਰ) ਭੇਟ ਕੀਤਾ ਗਿਆ। ਇਹ ਪੌਨਾਮੂ ਮਿਲਾਪ, ਭਰੋਸੇ ਅਤੇ ਲੰਬੇ ਸਮੇਂ ਦੀ ਭਾਈਚਾਰਕ ਭਾਗੀਦਾਰੀ ਦਾ ਪ੍ਰਤੀਕ ਮੰਨਿਆ ਗਿਆ। ਇਸ ਮੌਕੇ ਸਾਹਮਣੇ ਆਈਆਂ ਤਸਵੀਰਾਂ ਨੇ ਵੱਖ-ਵੱਖ ਸਭਿਆਚਾਰਾਂ ਵਿਚਕਾਰ ਬਣ ਰਹੀ ਨੇੜਤਾ ਅਤੇ ਸਤਿਕਾਰ ਨੂੰ ਦਰਸਾਇਆ।