ਨਿਊਜ਼ੀਲੈਂਡ ਦੇ Christchurch ਸ਼ਹਿਰ ਵਿੱਚ ਤਿੰਨ ਮਹਿਲਾਵਾਂ ਨੇ ਹਿੰਮਤ ਅਤੇ ਸੂਝਬੂਝ ਨਾਲ ਮਿਸਾਲ ਕਾਇਮ ਕੀਤੀ ਹੈ। ਘਰ ਵਿੱਚ ਚੋਰੀ ਹੋਣ ਤੋਂ ਬਾਅਦ ਉਨ੍ਹਾਂ ਨੇ ਪੁਲਿਸ ਦੀ ਉਡੀਕ ਕਰਨ ਦੀ ਬਜਾਏ ਖੁਦ ਹੀ ਚੋਰਾਂ ਦੀ ਭਾਲ ਸ਼ੁਰੂ ਕਰ ਦਿੱਤੀ ਅਤੇ ਕੁਝ ਹੀ ਸਮੇਂ ਵਿੱਚ ਆਪਣਾ ਜ਼ਿਆਦਾਤਰ ਸਮਾਨ ਵਾਪਿਸ ਹਾਸਿਲ ਕਰ ਲਿਆ। 28 ਸਾਲਾ ਸਾਰਾ ਕੈਂਪਬੇਲ, ਉਸਦੀ 25 ਸਾਲਾ ਭੈਣ ਐਨਾ ਕੈਂਪਬੇਲ ਅਤੇ ਉਨ੍ਹਾਂ ਦੀ ਸਾਥਣ ਸ਼ਾਰਲਟ ਵਾਕਰ ਜਦੋਂ ਮੰਗਲਵਾਰ ਸ਼ਾਮ ਕੰਮ ਤੋਂ ਘਰ ਵਾਪਸ ਆਈਆਂ, ਤਾਂ ਉਨ੍ਹਾਂ ਦਾ ਵਾਥਮ ਇਲਾਕੇ ਵਾਲਾ ਘਰ ਬਿਖਰਿਆ ਹੋਇਆ ਸੀ। ਘਰ ਦੇ ਦਰਵਾਜ਼ੇ ‘ਤੇ ਇੱਕ ਅਜੀਬ ਤਬਦੀਲੀ ਨੇ ਉਨ੍ਹਾਂ ਨੂੰ ਪਹਿਲਾਂ ਹੀ ਸੰਦੇਹ ਵਿੱਚ ਪਾ ਦਿੱਤਾ, ਅਤੇ ਅੰਦਰ ਜਾ ਕੇ ਪਤਾ ਲੱਗਾ ਕਿ ਕਈ ਕੀਮਤੀ ਚੀਜ਼ਾਂ ਗਾਇਬ ਹਨ।
ਮਹਿਲਾਵਾਂ ਨੇ ਹੌਸਲਾ ਨਾ ਹਾਰਦੇ ਹੋਏ ਆਪਣੇ ਤਰੀਕੇ ਨਾਲ ਜਾਂਚ ਸ਼ੁਰੂ ਕੀਤੀ। ਕੁਝ ਘੰਟਿਆਂ ਦੀ ਖੋਜਬੀਨ ਤੋਂ ਬਾਅਦ ਉਹ ਕਥਿਤ ਚੋਰਾਂ ਤੱਕ ਪਹੁੰਚ ਗਈਆਂ। ਹੈਰਾਨੀ ਦੀ ਗੱਲ ਇਹ ਰਹੀ ਕਿ ਇੱਕ ਸ਼ੱਕੀ ਵਿਅਕਤੀ ਉਨ੍ਹਾਂ ਦੇ ਚੋਰੀ ਕੀਤੇ ਕੱਪੜੇ ਪਹਿਨੇ ਹੋਏ ਮਿਲਿਆ। ਇਸ ਅਨੋਖੀ ਘਟਨਾ ਨੂੰ ਮਹਿਲਾਵਾਂ ਨੇ “ਪਾਗਲਪਨ ਨਾਲ ਭਰੀ ਪਰ ਦਿਲਚਸਪ” ਤਜਰਬਾ ਦੱਸਿਆ। ਸੋਸ਼ਲ ਮੀਡੀਆ ‘ਤੇ ਵੀ ਲੋਕ ਉਨ੍ਹਾਂ ਦੀ ਹਿੰਮਤ ਅਤੇ ਜਜ਼ਬੇ ਦੀ ਖੂਬ ਸਰਾਹਨਾ ਕਰ ਰਹੇ ਹਨ।