ਨਿਊਜ਼ੀਲੈਂਡ ਦੇ Hawke’s Bay ਵਿੱਚ ਪੁਲਿਸ ਵੱਲੋਂ ਗੈਂਗਾਂ ਖ਼ਿਲਾਫ਼ ਚਲਾਈ ਗਈ ਵੱਡੀ ਕਾਰਵਾਈ ਦੌਰਾਨ 9 ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਇਸ ਮੁਹਿੰਮ ਦੌਰਾਨ ਜ਼ਮਾਨਤ ‘ਤੇ ਰਹਿੰਦੇ ਲੋਕਾਂ ਲਈ ਖਾਸ ਡਰੱਗ ਟੈਸਟਿੰਗ ਵੀ ਕਰਵਾਈ ਗਈ। ਪੁਲਿਸ ਦੇ ਮੁਤਾਬਿਕ “ਓਪਰੇਸ਼ਨ ਟਾਰ” ਨਾਮ ਦੀ ਇਸ ਕਾਰਵਾਈ ਦੀ ਅਗਵਾਈ ਗੈਂਗ ਡਿਸਰਪਸ਼ਨ ਯੂਨਿਟ ਵੱਲੋਂ ਕੀਤੀ ਗਈ, ਜਿਸ ਵਿੱਚ ਗੈਂਗ, ਨਸ਼ੇ ਅਤੇ ਹਥਿਆਰਾਂ ‘ਤੇ ਨਿਸ਼ਾਨਾ ਸਾਧਿਆ ਗਿਆ। ਇਸ ਦੌਰਾਨ 17 ਹਥਿਆਰ, ਸੈਂਕੜੇ ਗੋਲੀਆਂ, 30,000 ਡਾਲਰ ਤੋਂ ਵੱਧ ਨਕਦ ਰਕਮ, ਲਗਭਗ 4 ਕਿਲੋਗ੍ਰਾਮ ਕੈਨੇਬਿਸ ਅਤੇ 15 ਗ੍ਰਾਮ ਮੈਥਾਮਫੈਟਾਮੀਨ ਬਰਾਮਦ ਕੀਤੇ ਗਏ।
ਇਹ ਗ੍ਰਿਫ਼ਤਾਰੀਆਂ Wairoa ਅਤੇ ਹਾਕਸ ਬੇ ਖੇਤਰ ਵਿੱਚ ਕੀਤੀਆਂ ਗਈਆਂ। ਇਸਦੇ ਨਾਲ ਹੀ ਪੁਲਿਸ ਨੇ 7 ਲਾਜ਼ਮੀ ਡੀਐਨਏ ਆਰਡਰ ਵੀ ਜਾਰੀ ਕੀਤੇ। ਡਿਟੈਕਟਿਵ ਇੰਸਪੈਕਟਰ James Keene ਨੇ ਕਿਹਾ ਕਿ ਇਹ ਇੱਕ ਸੁਚੱਜੀ ਅਤੇ ਇੰਟੈਲੀਜੈਂਸ ਅਧਾਰਿਤ ਕਾਰਵਾਈ ਸੀ, ਜਿਸਦਾ ਮਕਸਦ ਸਿਰਫ਼ ਅਪਰਾਧ ਨੂੰ ਰੋਕਣਾ ਨਹੀਂ, ਸਗੋਂ ਇਸ ਨਾਲ ਜੁੜੇ ਸਮਾਜਕ ਨੁਕਸਾਨ ਨੂੰ ਘਟਾਉਣਾ ਵੀ ਹੈ।
ਉਨ੍ਹਾਂ ਨੇ ਦੱਸਿਆ ਕਿ ਗੈਂਗ ਨਾਲ ਜੁੜੇ ਅਪਰਾਧਾਂ ਦਾ ਪ੍ਰਭਾਵ ਪਰਿਵਾਰਾਂ ਅਤੇ ਸਮਾਜ ‘ਤੇ ਵੀ ਪੈਂਦਾ ਹੈ, ਖ਼ਾਸ ਕਰਕੇ ਮੈਥਾਮਫੈਟਾਮੀਨ ਵਰਗੇ ਨਸ਼ਿਆਂ ਦੀ ਲਤ ਕਾਰਨ। ਇਸ ਲਈ ਪੁਲਿਸ ਨੇ ਪ੍ਰਭਾਵਿਤ ਪਰਿਵਾਰਾਂ ਨੂੰ ਸਹਾਇਤਾ ਦੇਣ ਲਈ ਵੱਖ-ਵੱਖ ਏਜੰਸੀਆਂ ਨਾਲ ਜੋੜਿਆ। ਪੁਲਿਸ ਮੁਤਾਬਿਕ ਇਸ ਕਾਰਵਾਈ ਦੇ ਨਤੀਜੇ ਵਜੋਂ ਹੋਰ ਗ੍ਰਿਫ਼ਤਾਰੀਆਂ ਵੀ ਹੋ ਸਕਦੀਆਂ ਹਨ ਅਤੇ ਗ੍ਰਿਫ਼ਤਾਰ ਕੀਤੇ ਗਏ ਲੋਕਾਂ ‘ਤੇ ਨਸ਼ਾ ਤਸਕਰੀ ਅਤੇ ਹਥਿਆਰਾਂ ਨਾਲ ਸੰਬੰਧਿਤ ਕਈ ਦੋਸ਼ ਲਗਾਏ ਗਏ ਹਨ।