ਨਿਊਜ਼ੀਲੈਂਡ ਵਿੱਚ ਟੈਕਸ ਸੀਜ਼ਨ ਦੀ ਸ਼ੁਰੂਆਤ ਨਾਲ ਹੀ ਲੋਕਾਂ ਵਿੱਚ ਇਹ ਜਾਣਨ ਦੀ ਉਤਸੁਕਤਾ ਵਧ ਗਈ ਹੈ ਕਿ ਇਸ ਵਾਰ ਉਨ੍ਹਾਂ ਨੂੰ ਰਿਫੰਡ ਮਿਲੇਗਾ ਜਾਂ ਟੈਕਸ ਅਦਾ ਕਰਨਾ ਪਵੇਗਾ। Inland Revenue Department (IRD) ਵੱਲੋਂ ਉਹਨਾਂ ਕਰਦਾਤਾਵਾਂ ਲਈ ਆਟੋਮੈਟਿਕ ਟੈਕਸ ਅਸੈਸਮੈਂਟ ਤਿਆਰ ਕੀਤੇ ਜਾਂਦੇ ਹਨ, ਜਿਨ੍ਹਾਂ ਦੀ ਆਮਦਨ ਸਿਰਫ਼ ਤਨਖਾਹ ਜਾਂ ਪਹਿਲਾਂ ਹੀ ਟੈਕਸ ਕੀਤੇ ਗਏ ਸਰੋਤਾਂ ਤੱਕ ਸੀਮਿਤ ਹੁੰਦੀ ਹੈ।
ਇਹ ਅਸੈਸਮੈਂਟ ਮਈ ਦੇ ਅਖੀਰ ਤੋਂ ਜਾਰੀ ਹੋਣੇ ਸ਼ੁਰੂ ਹੋ ਜਾਣਗੇ ਅਤੇ ਜੂਨ ਤੋਂ ਜੁਲਾਈ ਤੱਕ ਕਰਮਵਾਰ ਭੇਜੇ ਜਾਣਗੇ। ਜੇ ਕਿਸੇ ਵਿਅਕਤੀ ਦੀ ਆਮਦਨ ਵਿੱਚ ਸਾਲ ਦੌਰਾਨ ਬਦਲਾਅ ਆਇਆ ਹੈ—ਜਿਵੇਂ ਨਵੀਂ ਨੌਕਰੀ ਲੱਗਣਾ, ਕੰਮ ਵਿੱਚ ਬ੍ਰੇਕ ਆਉਣਾ ਜਾਂ ਟੈਕਸ ਕਟੌਤੀ ਵਿੱਚ ਗਲਤੀ—ਤਾਂ ਉਸਨੂੰ ਟੈਕਸ ਦਾ ਬਿਲ ਮਿਲ ਸਕਦਾ ਹੈ। IRD ਦੇ ਨਿਯਮਾਂ ਮੁਤਾਬਿਕ , ਜੇ ਬਕਾਇਆ ਟੈਕਸ $50 ਤੋਂ ਘੱਟ ਹੋਵੇ ਤਾਂ ਉਹ ਮਾਫ਼ ਵੀ ਕੀਤਾ ਜਾ ਸਕਦਾ ਹੈ। ਜਿਨ੍ਹਾਂ ਨੂੰ ਟੈਕਸ ਦੇਣਾ ਹੋਵੇਗਾ, ਉਨ੍ਹਾਂ ਲਈ ਅੰਤਿਮ ਮਿਤੀ 7 ਫ਼ਰਵਰੀ ਨਿਰਧਾਰਤ ਕੀਤੀ ਗਈ ਹੈ।
ਦੂਜੇ ਪਾਸੇ, ਜੇ ਕਿਸੇ ਨੇ ਵੱਧ ਟੈਕਸ ਅਦਾ ਕੀਤਾ ਹੈ, ਤਾਂ ਰਿਫੰਡ ਸਿੱਧਾ ਉਸਦੇ ਬੈਂਕ ਖਾਤੇ ਵਿੱਚ ਜਮ੍ਹਾਂ ਕੀਤਾ ਜਾਵੇਗਾ। ਹਾਲਾਂਕਿ, ਜੇ ਪਹਿਲਾਂ ਤੋਂ ਕੋਈ ਬਕਾਇਆ ਹੈ, ਤਾਂ ਇਹ ਰਕਮ ਉਸ ਵਿੱਚੋਂ ਕੱਟੀ ਜਾ ਸਕਦੀ ਹੈ।
ਖਾਸ ਗੱਲ ਇਹ ਹੈ ਕਿ ਜਿਨ੍ਹਾਂ ਦੀ ਵਾਧੂ ਆਮਦਨ ਹੈ—ਜਿਵੇਂ ਕਿਰਾਏ, ਕ੍ਰਿਪਟੋਕਰੰਸੀ ਜਾਂ ਸਾਈਡ ਕਾਰੋਬਾਰ—ਉਹਨਾਂ ਨੂੰ ਵੱਖਰਾ ਟੈਕਸ ਰਿਟਰਨ ਭਰਨ ਦੀ ਲੋੜ ਪੈ ਸਕਦੀ ਹੈ।
ਇਸ ਦੌਰਾਨ Inland Revenue Department ਨੇ ਲੋਕਾਂ ਨੂੰ ਠੱਗੀਆਂ ਤੋਂ ਸਾਵਧਾਨ ਰਹਿਣ ਦੀ ਵੀ ਚੇਤਾਵਨੀ ਦਿੱਤੀ ਹੈ। ਵਿਭਾਗ ਕਦੇ ਵੀ ਈਮੇਲ ਜਾਂ ਮੈਸੇਜ ਰਾਹੀਂ ਰਿਫੰਡ ਦੀ ਜਾਣਕਾਰੀ ਜਾਂ ਬੈਂਕ/ਕਾਰਡ ਵੇਰਵੇ ਨਹੀਂ ਮੰਗਦਾ, ਇਸ ਲਈ ਸਿਰਫ਼ ਅਧਿਕਾਰਕ ਵੈਬਸਾਈਟ ਰਾਹੀਂ ਹੀ ਆਪਣੀ ਜਾਣਕਾਰੀ ਦੀ ਜਾਂਚ ਕਰਨ ਦੀ ਸਲਾਹ ਦਿੱਤੀ ਗਈ ਹੈ।